Egg uř nnek x tiɣit
4
1 Sřem, kenniw iḥenjiren, ɣar ttarbiyyet n babatwem, ḥekkarem mliḥ maḥend ad teksim tussna s řefhamet,
2 maɣar necc ad awem wceɣ taɣuri iṣebḥen,
war semmḥem di tɣuri inu.
3 Maɣar necc tuɣa ayi d mmis i baba,
areqqaɣ d uyenni n mmis zzat i wudem n yemma, ■
4 uca netta isseřmed ayi, inna ayi:
“Ejj uř nnek ad iṭṭef deg wawařen inu,
ḥḍa tiweṣṣa inu, xenni ad teddared!” ■
5 Jbed-dd ɣarek tiɣit, jbed-dd ɣarek řeɛqeř,
war tᵉttu u war tḥeyyid x wawařen n uqemmum inu.
6 War semmeḥ di tiɣit, xenni nettat ad cek teḥḍa,
sɛizz i-tt u nettat ad cek tessar. □
7 Beddu n tiɣit d uḍuf n tiɣit,
aqa ad tᵉṭṭfed řefhamet s marra min ɣarek. ■
8 Sgeɛɛed i-tt-i-dd, xenni nettat ad cek tessgeɛɛed,
nettat ad ac tegg ccan mařa tdarrɛed as.
9 Nettat ad ac tewc ict n temrist tecna x uzeǧif nnek,
ad ac tewc ijj n ttaj izewwqen. ■
10 Seř, a mmi inu, u ksi awařen inu,
xenni ad mmarnin iseggʷusa n tudart nnek.
11 Ssřemdeɣ ac abrid n tiɣit,
nedheɣ cek di řatarat iseggmen.
12 Mařa tuyured, aṣurif nnek war ittneḥṣṣar,
mařa tazzřed, war ttneqriḍed.■
13 Cebbar di ttarbiyyet, war xas temmsebḍa,
ḥḍa tt, maɣar nettat d tudart nnek.
14 War ggur x umesruq n iɛeffanen,
war ttidif abrid n yinni itteggen řɣar, ■
15 ḥeyyed xas, war xas ggur,
ffeɣ zzayes u ggʷej xas.
16 Maɣar nitni war ttᵉṭṭsen am war zemmaren ad ggen tuɛeffna,
ittraḥ asen iḍes nsen mařa war ssneqriḍen ḥed ɛad,
17 maɣar nitni ttᵉtten aɣrum n řɣecc,
u sessen binu zi tmegga n řexcunect.
18 Amesruq n imseggaden am tfawt ittissiqen n teffut,
tenni tarenni deg useqseq ɣares ař imɣar wass qaɛ.
19 Abrid n iɛeffanen am taǧest,
nitni war ssinen min di i ɣa nqarḍen.
20 Mmi inu, ewc taynit i wawařen inu,
ewc amezzuɣ nnek i wawařen inu,
21 war ten ttejja ad ɣefřen zi tiṭṭawin nnek,
xemmeř i-ten daxeř deg wuř nnek,
22 maɣar nitni d tudart i wenni ten i ɣa yafen,
uřa d agenfu i arrimet nnes marra. ■
23 Ḥḍa uř nnek x marra min izemmar ad ittwaḥḍa,
maɣar zzayes ffɣen iẓewran n tudart.
24 Kkes ixarriqen n uqemmum nnek,
sbeɛɛed xak afaryeḍ n iyencicen nnek.
25 Ejj tiṭṭawin nnek ad xzarent ɣar zzat,
ejj abřiwen nnek ad xzaren ɣar min iǧan arendad nnek.
26 Waṭa řatar n uḍar nnek,
ejj ad iřin marra ibriden nnek sarrḥen.
27 War farreɣ ɣar yeffus uřa ɣar uzeřmaḍ,
sbeɛɛed aḍar nnek zi tuɛeffna. ■