Arcam n tesřit
2
1 “Necc d tanewwact n Carun, d talillect n teysarin.” □
2 “Am tlillect jar tzeggʷart,
ammu i teǧa tameddukkeč inu jar tyeǧitin.”
Arcam n yesři
3 “Am tcejjart n tteffaḥt jar tcejjura n wezɣar,
ammu i yeǧa llif inu jar warrawen.
Necc aqa ayi mmeẓreɣ ad qqimeɣ di tiři nnes.
řɣiǧet nnes d miẓid i waneɣ inu.□
4 Netta indeh ayi di taddart n binu,
u tayri d taɛeǧant nnes xafi.
5 Sjehdem ayi s ɣaryita n zzbib,
sbarrdem ayi s tteffaḥin,
maɣar necc heřceɣ s tayri.
6 Afus azeřmaḍ nnes sadu uzeǧif inu,
afusi nnes idarreɛ ayi-dd.
7 Necc ad kennint arreɣ ttjaǧant, a yessis n Urcalim,
ɣar tɣayḍin n wezɣar u ɣar tudadin deg iyyaren,
aqa kennint war hekkwřent tayri,
war tt-i-dd-ssekkarant ař tᵉttexs simant nnes.”
Tawasit n yesři
8 “Řḥess n llif inu!
Aqa da, ittas-dd,
ineṭṭu x idurar,
ineggez x tewririn!
9 Llif inu yarwes deg iɣayḍ n wezɣar,
niɣ deg ijj n umeẓyan n wudaden.
Aqa-t da, ibedd awarni i řḥiḍ nneɣ,
ixezzar zi řekwazi,
ittceyyeɛ zi ccebbac.”
Tasřit tessiweř x řeɛruḍ n yesři
10 “Llif inu ittarra-dd uca inna ayi:
‘Kkar, bedd, a tameddukkeč inu, aẓri inu,
uca as-dd!
11 Maɣar aqa da, tagerst teɛdu,
iksi wenẓar, aqa iruḥ.
12 Banen-dd inuwwaren di temmurt,
řḥař n wenziz aqa-t da,
uca tmijja n tjlilleḥt nesřa i-tt ɛawed di temmurt nneɣ.
13 Artu n tazart ittxemmař řbacur nnes,
uca tizayarin ittnewwaren arxun i řefwaḥ.
Kkar, bedd, tameddukkeč inu, aẓri inu,
uca as-dd!’ ”
Isři yarenni di řeɛruḍ
14 “Tadbirt inu deg imucan n udurri di řejruf,
deg ijj n wemcan innuffaren di tsawent n wedrar,
ejj ayi ad ẓareɣ aɣembub nnem, ad sřeɣ i tmijja nnem,
maɣar d tmiẓidti teǧa tmijja nnem, iṣbeḥ uɣembub nnem.”
Tasřit texs ad tiři i yesři waha
15 “Ṭṭfem aneɣ-dd iceɛbawen, iceɛbawen imeẓyanen,
inni ittarytaren aneɣ imarjaɛen n uḍiř,
maɣar tizayarin deg imarjaɛen nneɣ ttnewwarent ɛad.
16 Llif inu aqa-t inu u necc nnes,
d wenni yarekkwsen jar tlillicin.
17 ař i ɣa ismeḍ wass,
u ad arewřent tiřiwin.
Nneḍ-dd, a llif inu,
iři am ijj n iɣayḍ n wezɣar
niɣ am ijj n umeẓyan n wudaden
x idurar n řejruf.”