1 “Arzuɣ xas di ǧyaři am ǧiɣ x tassut inu,

arzuɣ x wenni ittexs řeɛmar inu.

Necc arzuɣ xas,

maca necc war t ufiɣ.

2 Necc nniɣ: ‘Ad kkareɣ, ad suḥeɣ di tendint,

deg ibriden u x izzariyen.

Necc ad xas arzuɣ, ad arzuɣ x wenni ittexs řeɛmar inu.’

Necc arzuɣ xas, maca war t ufiɣ.

3 Ufin ayi iɛessasen am ttennḍen di tendint.

Necc nniɣ: ‘Ma teẓrim kenniw wenni ittexs řeɛmar inu?’

4 Řami tuɣa ɛad war xasen ɛduɣ, ufiɣ t,

wenni ittexsen řeɛmar inu.

Necc ṭṭfeɣ t, war zzayes arexxuɣ

ařami t-i-dd iwyeɣ ɣar taddart n yemma,

deg wexxam n daxeř n tenni i dd ayi yurwen.

5 Necc ad kennint arreɣ ad ttjjaǧant, a yessis n Urcalim,

ɣar tɣayḍin n wezɣar u ɣar tudadin deg iyyaren,

aqa kennint war hekkwřent tayri,

war tt-i-dd-ssekkarant ɣares ař texs simant nnes.”

6 “Min teɛna tenni i dd-igeɛɛden zi řexřa,

am iqellijen n ddexxan,

deg ijj n useynu n mirru d řebxur,

u s marra řebzar ittfuḥen n usebbab?

7 Xzar, rectu n trebbut n Suliman,

ttennḍen as-dd settin n ayt n bu-teɣruḍt,

zeg ayt n bu-teɣruḍt n Israil,

8 marra inni itteṭṭfen ssif, inni iřemmden amenɣi,

kuř ijj s ssif nnes ɣar tmeṣṣaḍt nnes

zi ssibbet n min issaggʷaden di ǧiřet.

9 Ajeǧid Suliman igga ijj n rectu i trebbut i yixef nnes

s ukeccuḍ n Lubnan.

10 Iɛumad ɣar teɣmart igga i-ten s nnuqart,

aɛemmed n weɛrur n wureɣ uca aɣimi n arjuwani.

Daxeř nnes yarḍen t

s tayri n yessis n Urcalim.”

11 “Ffɣent u xzarent, kennint yessis n Ṣihyun,

aqa da ajeǧid Suliman ak-d ttaj i zi t tgelled yemmas

deg wass n wurar nnes,

deg wass n řefraḥet yuẓɣen deg wuř nnes.”