Izři n yesři x tesřit
4
1 “Xzar, tecnid cem, tameddukkeč inu, cem tecnid. Awarni i lltam nnem tiṭṭawin nnem d tidbirin.
Acewwaf nnem amecnaw taḥimart n iɣayḍen
i ijnan x idurar n Jilɛad.
2 Tiɣmas nnem ggint am tḥimart n wuǧi řsin ten,
inni dd-ittgeɛɛaden zeg wemcan n uṣebben,
marra tixeswin urwent tacniwin,
war teqqim ict nbřa iḥenjiren.
3 Iyencicen nnem am ufiřu azeggʷaɣ iḥedqen,
iṣbeḥ uqemmum nnem.
Lḥenkat nnem am tremmant ibḍan
sadu lltam nnem.
4 Iri nnem am ṣṣumɛet n Dawud,
bnan tt am tesfifin n tseddyin.
Ařef n tseddariyin n uɛeskari uyřent ɣares,
marra am tseddariyin iqesḥen iquraren n ayt n bu-teɣruḍt.
5 Idmaren nnem ggin am tnayen n iɣayḍen imeẓyanen,
am wacniwen n tɣayḍet n wezɣar,
heddan di tlillicin.□
6 Ař i ɣa ismeḍ wass u ad arewřent tiřiwin,
ad uyureɣ ɣar wedrar n umirru,
ɣar tewrirt n jjawi.
7 Cem marra d aẓri, tameddukkeč inu,
war dayem uřa d ijj n řɛib.
8 Hwa-dd akidi zeg idurar n Lubnan, a tasřit inu,
hwa-dd akidi zeg idurar n Lubnan,
ṣwed-dd zi tqiccet n Amana,
zi tqiccet n Canir d Hirmun,
zi ɣar řmargaḥat n wayraden,
zeg idurar n iɣiřasen.
9 Tucared ayi uř, a učma, a tasřit inu,
wah tucared ayi uř,
s ict n řxezrat n tiṭṭawin nnem,
s ict n tseddect n yiri nnem.
10 Mammec tecna tayri nnem, a učma, a tasřit inu,
mecḥař teṣbeḥ tayri nnem x binu,
řefwaḥet n zzect nnem x marra řeɛṭur.
11 Zeg iyencicen nnem, a tasřit inu,
tᵉttudum tamment n teɣraṣt,
tamment d uɣi sadu iřes nnem,
u řefwaḥet n warruḍ nnem am řefwaḥet n idurar n Lubnan.
12 A učma, a tasřit inu, cem d taḥwict ibellɛen,
d tařa iqqnen, d řɛunṣar icemmɛen.
13 Řefruɛ i zzayem issneṭṭiyen d jennet n tremmanin,
s řɣiǧet iṣebḥen aṭṭas, nnewwac n řḥenni d ṣṣenbel.
14 Ṣṣenbel d zzɛefran,
aɣanim uḥemmum ittfuḥen ak-d řqarfa,
ɛřam kuř ticejjura n jjawi, mirru d wecfiř,
ak-d marra řeɛṭur iṣebḥen qaɛ.
15 A tařa n iḥwicen,
anu n waman iddaren
inni dd-ittazzřen zeg idurar n Lubnan.”
Tasřit tessiweř, isři yarra-dd
16 “Kkar, a asemmiḍ n nnej,
as-dd, a asemmiḍ n swadday,
ṣuḍ x weḥwic inu, ejj řefwaḥet n řeɛṭur nnes ad tuyur.
Ejj llif inu ad dd-yas ɣar weḥwic nnes,
ad icc zi řɣiǧet nnes iṣebḥen!”