5
1 “Necc usiɣ-dd ɣar weḥwic inu, a učma, a tasřit inu, řeqḍeɣ mirru inu ak-d řeɛtur,
cciɣ aɣrum n tzizwa ak-d tamment,
swiɣ binu inu d uɣi.
Imeddukkař, ccem, swem, sscarem, a imɛizzen!” □
Tasřit tzehza ad tarzem i yesři
2 “Necc ṭṭseɣ, maca uř inu ifaq.
Aqa da tmijja n llif inu wenni issqarqben
‘Arzem ayi, a učma, tameddukkeč inu,
tadbirt inu, a kuřci inu,
maɣar azeǧif inu iccur s nnda,
imuzaren inu ccuren s tuddimin n ǧiřet!’
3 Aqa kkseɣ arruḍ inu,
mammec i t ɣa yarḍeɣ ɛawed?
Iḍaren ssirdeɣ ten,
ma ad ten ssxemjeɣ ɛawed?
4 Llif inu issekk-dd afus nnes zeg unuqqib n tewwart,
uca inhezz wuř inu zzayes.
5 Necc beddeɣ ḥima ad arzmeɣ i llif inu,
ifassen inu udumen s mirru,
u zeg iḍewḍan inu issizzeř mirru
x ifassen n zzekrun.
6 Necc arzmeɣ i llif inu,
maca llif inu tuɣa yuyur, iɛdu.
Iffeɣ řeɛmar inu umi tuɣa issawař!
Necc arzuɣ xas, maca war t ufiɣ.
Necc řaɣiɣ as, netta war xafi dd-yarri.
7 Ufin ayi iɛessasen ɣar wenneḍ nsen di tendint,
nitni wtin ayi, yezmen ayi,
aqendur inu kksen ayi t iɛessasen n řeḥyuḍ.”
Izři n tesřit ak-d yessis n Urcalim
8 “Necc ad kennint arreɣ ttjjaǧant, a yessis n Urcalim,
mařa kennint tufint llif inu, min d as ɣa tinint?
Aqa tesseḥřec ayi tayri.”
9 “Min ɣares ɣar llif nnem ktar x llif nneɣni,
a cem i di iǧa waẓri qaɛ zi temɣarin?
Min ɣares ɣar llif nnem ktar x inneɣni,
aqa cem ammu i d aneɣ tarrid nettjjaǧa?”
10 “Llif inu d acemřař ittissiqen d azeggʷaɣ am idammen,
ittban am tɛeǧant sennej x ɛecra n řuřuf.
11 Azeǧif nnes d ureɣ iqqur iṣfan,
imuzaren n ucewwaf nnes d tiwririn i itteggen am řemwaj,
d ibarcanen am ibaɣřiwen.
12 Tiṭṭawin nnes ggint am tedbirin ɣar tseǧyawin n waman,
ttwasirdent s uɣi,
qqiment di tcuyar nsen am iẓra iɣřan.
13 Imeggizen nnes ggin am iḥwicen n řeɛṭur,
jar řeɛcub ittfuḥen,
iyencicen nnes am tlillicin,
ttudumen s mirru ifesyen. □
14 Ifassen nnes am tebriqin n wureɣ,
ɛemmarent s iẓra zi Tarcic,
aɛeddis nnes igga am řɛaj ittissiqen,
řeḥḥfen t s tyaqutin n ṣaffir.
15 Imesḍan nnes d ipilaren n řmarmur,
x dsusa n wureɣ ittwaṣeffan.
Iban-dd netta am Lubnan,
ittwafarz am tcejjart n tengelt.
16 Aneɣ nnes iccur s taẓyudi,
uca marra min ɣares icuwwar.
Wa d llif inu,
wa d ameddukkeř inu,
a kennint yessis n Urcalim!”