6
1 “Mani yuyur llif nnem, a cem icnan qaɛ x temɣarin?
Mani yarra s uzeǧif llif nnem?
Neccin nexs ad xas narzu akidem!”
2 “Llif inu ihwa ɣar uḥwic nnes,
ɣar tbuda s řeɛṭur,
ḥima ad yarwes deg iḥwicen,
ḥima ad issmun tilillicin. □
3 Necc zeg llif inu,
u llif inu aqa-t inu,
netta d wenni yarekkwsen jar tlillicin.”
Asři iɣennej x weẓri n tesřit
4 “Cem tṣebḥed, a tameddukkeč inu,
amecnaw Tirṣa,
tecnid am Urcalim,
tessaggʷaded am iseddiyyen n řɛeskar s tɛeǧanin nsen.
5 Kkes tiṭṭawin zzayi,
maɣar nitenti ɣeḍřent ayi ifadden aṭṭas.
Acewwaf nnem amecnaw taḥimart n iɣayḍen
i ijnan x idurar n Jilɛad.
6 Tiɣmas nnem ggint am tḥimart n wuǧi,
i dd-ittgeɛɛaden zeg wemcan n uṣebben,
marra tixeswin urwent tacniwt,
war teqqim ict nbřa iḥenjiren.
7 Lḥenkat nnem am tremmant ibḍan
awarni i lltam nnem.
8 Aqa din settin n tjeǧidin d tmenyin n tiyya,
uřa d tiɛzariyyin břa řeḥsab.
9 Weḥḥdes nettat, tadbirt inu, tenni ikemmřen inu,
ayenni n yessis n yemmas,
nettat d tenni ifarzen ɣar tenni i d as dd-yurwen.
Mařa zřint tt tyessit, ad tt ssɛuǧant,
tijeǧidin d tiyya ad tt cennɛent s izřan.”
10 “Min teɛna tenni dd-issijjen am tfawt n řefjar,
tecna am tziri iqefřen, teṣfa am tfuct yareqqen,
tessaggʷad am iseddiyyen n řɛeskar s tɛeǧanin?”
11 “Necc ḥwiɣ ɣar teḥwict n tcejjura n teɣyact
ḥima ad xzareɣ aɣemmuy ibedden di teɣzurt,
ḥima ad xzareɣ ma tazayart tessuffeɣ-dd,
ma ticejjura n aremman ttnewwarent.
12 Tuɣa war dd-arriɣ taynit aqa řeɛmar inu inḍar ayi
deg ikarruten n řgens inu, n ijj n wecrim.”