Aẓri n tesřit ɣar ccdiḥ
7
1 “Ɛqeb-dd, ɛqeb-dd, a Culamit! Ɛqeb-dd, ɛqeb-dd, maḥend ad dayem nexzar.”
“Min texsem ad tẓarem di Culamit?”
“Nettat am ccḍiḥ s nnubtat n tnayen n řɛeskarat.”
2 “Mecḥař cnan iṣuraf nnem di ṣandaliyyat nnem,
a, cem yessis n ijj n wecrim!
Aḥnunni n tmeṣṣaḍt nnem am tseddyin iɣřan ttraḥent ttasent-dd,
ṣṣenɛet n ifassen n ufennan.
3 Taɛebbuḍt nnem am tsarijt teḥnunni,
mani war ittxeṣṣi binu ixeǧḍen.
Aɛeddis nnem d akemmic n irden,
nnḍent as-dd tlillicin. □
4 Idmaren nnem ggin am tnayen n iɣayḍen imeẓyanen,
am wacniwen n tɣayḍet n wezɣar.
5 Iri nnem igga am ṣṣumɛet n řɛaj,
tiṭṭawin nnem am iyeřmamen n Ḥacbun,
ɣar tewwart n Bat-Rabbim,
tinzart nnem am ṣṣumɛet n Lubnan
i issajjan ɣar Dimacq.
6 Tiwa nnem igga azeǧif nnem am Karmil,
acewwaf n uzeǧif nnem am arjuwani.
Ajeǧid ittwaḥbes deg imuzaren nnem.”
7 “Mecḥař d aẓri i dayem,
u mecḥař tṣebḥed, a tayri,
di kuřci min izemmar bnadem ad yarr meẓri!”
Awař n yesři
8 “Tiddi nnem tarwes di tcejjart n tini,
idmaren nnem deg izekkunen n uḍiř.
9 Necc nniɣ: ‘Ad nyeɣ x tcejjart n tini,
ad ṭṭfeɣ di řefruɛ nnes.’
Idmaren nnem ad iřin am izenkak n uḍiř ɣar tzayart,
u řefwaḥet n wenzaren nnem am tteffaḥin,
10 aneɣ nnem am binu iṣebḥen aṭṭas...”,
“... wenni ittraḥen nican ɣar llif inu,
wenni ittarran iyencicen n yinni iṭṭṣen ad nhezzen.”
Tasřit tessiweř x mmeẓri nnes i yesři.
11 “Necc n llif inu,
ɣari dd-ittas meẓri nnes.
12 As-dd, llif inu, ejj aneɣ ad nuyur ɣar yeyyar,
ad nessens di ředcur.
13 Ejj aneɣ ad nekkar zic ḥima ad nuyur ɣar imarjaɛen n uḍiř,
ejj aneɣ ad nẓar, ma tazayart aqa tessuffuɣ,
ma nnuwwar nnes nnurzmen,
ma ticejjura n aremman newwarent.
Dinni i ɣa wceɣ tayri inu.
14 Ttiffaḥin n tayri arxunt i řefwaḥ,
u tiwa n tewwura nneɣ aqa din frutat icewwaren,
tinni n ṭṭri d tinni ittwaxemmřen.
A llif inu, xemmřeɣ tent i cek!”