8
1 “Ax, maɛlik qaɛ cek d uma, wenni iṭṭeḍen di tbibbicin n yemma.
Mařa ufiɣ cek di barra, ad cek ssudmeɣ,
břa ma d ayi sseḥqaran.
2 Iři ad cek nedheɣ, ad cek awyeɣ ɣar taddart n yemma,
cek ad ayi tessřemded din.
Ad ac wceɣ binu ittfuḥen s řeɛtuř ad teswed,
aẓemmi n tcejjart inu n waremman.
3 Azeřmaḍ nnes aqa-t sadu uzeǧif inu,
uca afusi nnes idarreɛ ayi-dd.
4 Necc ad kennint arreɣ ttjjaǧant, a yessis n Urcalim:
Mayemmi i ɣa thewřent tayri
niɣ ad tt-i-dd-tessekkarent,
qbeř ma tᵉttexs nettat.”
Tasřit teffeɣ-dd zi řexřa ak-d yesři nnes
5 “Min teɛna nni din ittgeɛɛaden zi řexřa,
tᵉttɛemmed x llif nnes?”
“Sadu tcejjart n tteffaḥt arreɣ meẓri nnem,
mani cem dd-tejja yemmam s řeḥriq n tarwa,
mani cem dd-tejja tenni cem dd-yurwen.”
6 “Sars ayi am ṭṭabeɛ x wuř nnek,
am ṭṭabeɛ x uɣiř nnek,
maɣar tayri tejhed am řmewt,
tusmi teqseḥ am řaxart.
Tifeṭṭutin nnes d tifeṭṭutin n tmessi, aqa atent am uceɛɛař n SIDi.
7 Aṭṭas n waman war zemmaren ad ssxesyen tayri,
uřa d iɣezran war tt ttiwyen.
Waxxa iwca ijjen i tayri marra agřa n taddart nnes,
ad t sseḥqaren d aseḥqar.”
Tasřit d aytmas
8 “Neccin ɣarneɣ ict n učmatneɣ tameẓyant,
ɛad war d as dd-ffiɣen idmaren.
Min i ɣa negg i učmatneɣ,
deg wass i di xas i ɣa ssiwřen?”
9 “Mařa nettat d řḥiḍ,
ad xas nessbedd acbar am ict n temrist n nnuqart.
Mařa nettat d tawwart,
ad tt neqqen s tfeřwin n ukeccuḍ n tengelt.”
10 “Necc d řḥiḍ u idmaren inu amecnaw lburjat.
Xenni dewřeɣ necc di tiṭṭawin nnes am tenni yufin řeḥna.”
Aḥwic n tzayart n Suliman d weḥwic n tzayart n tesřit
11 “Suliman tuɣa ɣares ijj n umarjuɛ n uḍiř di Baɛl-Hamun.
Iwca amarjuɛ nni i iɛessasen.
I řɣiǧet nnes qaɛ ijj yiwi-dd ařef n řewzen n nnuqart.
12 Aḥwic n uḍiř inu, aqa-t zzat i tiṭṭawin inu.
Ařef n řewzen n nnuqart aqa aten i cek, a Suliman,
u ařfayen i iɛessasen n řɣiǧet zzayes.”
Ařaɣi n yesři d tesřit
13 “A cem tenni izeddɣen deg iḥwicen,
iɛciren nnem ttesřan s imezzuɣen i tmijja nnem,
qqaren: ‘Ejj ayi ad tt sřeɣ!”
14 “Deɣya, a llif inu,
iři am iɣayḍ n wezɣar,
niɣ am umeẓyan n udaden,
x idurar iccuren s řeɛcub ittfuḥen.”