51
1 “Ammu i iqqar SIDI: ‘Xzar, Necc ad dd-ssekkareɣ ijj n buḥbeř n wareddeǧ x Babil u x yenni din izeddɣen deg wuř n iɣrimen inu. ■ 2 Necc ad ssekkeɣ ibarraniyyen ɣar Babil, ad tt zuzzaren uca ad farḍen tammurt nnes, minzi deg wass n řɣar ad dd-bedden arendad nnes ɣar marra iɣezdisen.■ 3 Ejj amjebbad n řqews ad imḥeḍ řqews nnes ḍidd n wenni imeḥḍen řqews u ḍidd n wenni issgeɛɛaden ixef nnes deg werruḍ nnes n wuzzař. War ttḥiwiřem x iḥudriyyen nnes, ḥarrmem marra řɛeskar nnes i uteḥḥi. 4 Inni ittwanɣen wḍan di temmurt n Ikaldaniyyen u inni ittwasxarrqen aqa aten x ibriden nnes. ■ 5 Maɣar uřa d Israil d Yahuda řa d nettat, war ttwajjen d tajjač zi AREBBI nsen, zi SIDI n řɛeskarat, minzi tammurt n Ikaldaniyyen teccur s umarwas ɣar Umqeddas n Israil. 6 Arwřem zi Babil, ejj ad issenjem kuř ijj tudart nnes, war tejjim ad ttwasbekkmem s řmuɛṣiyyet nnes, maɣar ta d řweqt n wexřaf n SIDI, Netta ad zzayes ixřef min tesdaheǧ.’ ” ■ 7 “Babil tuɣa-tt d ijj n řkas n wureɣ deg ufus n SIDI, isscar marra tammurt. Zi binu nnes swin marra řegnus, x uyenni iffeɣ řeɛqeř i řegnus. 8 Deɣya tewḍa tendint n Babil u tᵉttwahdem. Wtem xas agejdur, awyem as-dd balsam i řeḥriq nnes, ad taɣ ad tᵉttwasgenfa.■ 9 Neccin nexs ad dd-nawi agenfu i Babil, maca war ɣares agenfu. Jjem tt, tandint nni, u ejj kuř ijj ad iraḥ ɣar temmurt nnes, maɣar řḥukm xas yiweḍ ɣares ař ajenna, igeɛɛed ɣares ař iseynuten. ■
10 SIDI issiweḍ-dd řmuɛṣiyyet nneɣ ɣar tfawt. Asem-dd, ejj aneɣ ad nɛawed di Ṣihyun min igga SIDI, AREBBI nneɣ.”
11 “Sqeḍɛem fřitcat, ṭṭfem tiseddariyin n uɛeskari. SIDI issekkar-dd buḥbeř n ijeǧiden n Maday, minzi Netta iɛewweř ad ihdem Babil, maɣar wa d axřaf n SIDI, axřaf i Zzawect nnes Tameqqrant. ■
12 Sgeɛɛdem taɛeǧant x řeḥyuḍ n Babil, zeyyarem taɛessast, sbeddem iɛessasen, ggem tixecfin, maɣar ɛlaḥsab aɛewweř n SIDI, ammu i ɣa yegg marra min inna x imezdaɣ n Babil.
13 Cem, a tenni izeddɣen ɣar mani wesɛen waman, tenni ɣar iǧa waṭṭas n wagřa, qeṭṭu nnem yiweḍ-dd, aqa iccur řqedd n ṭṭmeɛ nnem.
14 Ijjuǧ SIDI n řɛeskarat ɣar yixef nnes: ‘Waxxa Necc ccureɣ cem s iwdan am tmurɣi, ɛad ad xam dd-řaɣan s ict n tɣuyyit n usřiwřew!’ ” ■
15 “Netta maca igga tammurt s jjhed nnes, igga ddunect zi tiɣit, u ibezzeɛ ajenna s řefhamet nnes. ■
16 Řami ittejja tmijja nnes ad tt sřen, xenni tegga am ucarcur n waman deg ujenna. Iseynuten issgeɛɛad i-ten zeg ineggura n ddunect, ittegg assam ak-d wenẓar uca issekka-dd asemmiḍ zeg ixxamen nnes n txubay.
17 Kuř bnadem d agarruḍ, břa tussna, kuř amziř n wureɣ ittseḍḥa zi ssibbet n řexyař i igga, maɣar řexyař nnes ifesyen d ixarriqen, war dayes iǧi buḥbeř.
18 Řexyařat n ṣṣanam ad fnant, aqa atent d řeqcuɛ n tseḍḥact! Di řweqt n wexřaf nsent, ad fnant.”
19 “Tasɣart n Yaɛqub war teǧi amecnaw tasɣart nsent, minzi Netta d wenni iggin marra, uca Israil d taqbič n tesɣart nnes, aqa SIDI n řɛeskarat d Isem nnes. ■ 20 Cek teggid ayi am ijj n wefḍis, řesnaḥ inu i umenɣi. Zzayek i ɣa řebzeɣ řegnus, zzayek i ɣa ɣeḍřeɣ tigeldiwin. ■ 21 Zzayek i ɣa řebzeɣ ayis d wenni xas inyin u zzayek i ɣa řebzeɣ akarru n umenɣi d wenni t ineddhen. 22 Zzayek i ɣa řebzeɣ aryaz d temɣart, zzayek i ɣa řebzeɣ awessar d uḥuḍri u zzayek i ɣa řebzeɣ abɣiř d tebɣirt. 23 Zzayek i ɣa řebzeɣ ameksaw d tḥimart nnes, zzayek i ɣa řebzeɣ afeǧaḥ d zzayřet nnes s iyenduzen, u zzayek i ɣa řebzeɣ lwulat d imseyyaren n temmurt. 24 Zzat i tiṭṭawin nwem ad xeřfeɣ Necc zi Babil u zi marra imezdaɣ n Kaldiya x marra řɣar i ggin di Ṣihyun, ammu i iqqar SIDI.” □
25 “Xzar, Necc ad kidek dd-řhiɣ, cek adrar n wareddeǧ, iqqar SIDI, cek d wenni yareddǧen marra tammurt. Necc ad xak dd-swiẓẓḍeɣ afus inu u ad cek sseqnunnyeɣ zi jjarf u ad cek ggeɣ d adrar icemmḍen. 26 Ɛemmarṣ war zzayek ttawyen ɛad aẓru i weẓru n teɣmart uřa d aẓru i dsusa, maɣar ad tdewřed i řxirbat i řebda, iqqar SIDI.”
27 “Sgeɛɛdem taɛeǧant di temmurt, ṣuḍem deg uyicc n icarri jar řegnus, farzem řegnus ḍidd nnes, řaɣam ḍidd nnes i tgeldiwin n Araraṭ, Minni d Ackanaz, ggem ijj n řɛeskar ḍidd nnes, jjem iysan ad ffɣen am ijj n weyřaf n tmuɣri iṣarrḍen iqesḥen. 28 Farzem řegnus ḍidd nnes, ijeǧiden n Maday ak-d lwulat nnes d marra imseyyaren nnes, marra tammurt i x teǧa ṣṣulṭa nnes. 29 Xenni ad tenhezz temmurt uca ad tfarɣ s řeḥriq, minzi inwayen n SIDI bedden nican maḥend ad arren tammurt n Babil d ict n řxarbet war dayes izeddeɣ ɛad uřa d ijj. 30 Ayt n bu-teɣruḍt n Babil semḥen deg umenɣi, qqimen di lqelɛat nsen. Tefceř tzemmar nsen, nitni dewřen d timɣarin. Nitni qqden i tzeddiɣin nsen uca iɛumad n wefray nsen ttwarẓen. ■ 31 Amsazzař nni x umsazzař nneɣni ittazzeř-dd, areqqas nni x ureqqas nneɣni, ḥima ad ḥajan i ujeǧid n Babil, aqa tandint nnes tᵉttwaṭṭef zi marra iɣezdisen. 32 aqa imucan n uẓekkwu ttwamenɛen uca iyyaren n uɣanim ttwacemḍen s tmessi uca iɛeskariyyen ttwanhezzen. 33 Maɣar ammu i iqqar SIDI n řɛeskarat, AREBBI n Israil: ‘Yeǧis n Babil tegga am unedrar, aqa tiweḍ-dd řweqt ḥima ad xas ɛefsen. Ɛad drus i iqqimen, xenni yiweḍ-dd wakud n tmejra i nettat.”
34 “Nabuxadraṣṣar, ajeǧid n Babil, icca ayi, iřbez ayi, igga ayi d ijj n weqdiḥ ixwan, isarḍ ayi am řhaycet, iɛemmar aɛeddis nnes s řeḥzut inu uca yuẓẓeř xafi. 35 Ejj ad dd-yas x Babil lɛunf i d ayi iggin u deg yenni i iǧan d ddat inu, ammu i teqqar tenni izeddɣen di Ṣihyun. ‘Ejj ad dd-asen idammen inu x imezdaɣ n temmurt n Kaldiya, ammu i teqqar Urcalim.”
36 “S uyenni, ammu i iqqar SIDI: ‘Necc simant inu ttedɛiɣ ddɛawi nnem u ad zzayem ttxeřfeɣ. Necc ad ssiẓɣeɣ řebḥar nnes u ad jjeɣ tařa nnes ad taẓeɣ. ■ 37 Babil ad tedweř mɣir d řxirbat, ict n tzeddiɣt n wuccanen n řexřa, ict n řqecɛet n unexřiɛ d usemẓi maḥend war dayes ittɣimi izeddeɣ ɛad uřa d ijjen.’ ”
38 “Marra idsen ad zehharen am wayraden, ad ssmiɛɛriwen am wayraden imeẓyanen. 39 Xmi i ɣa yiřin ḥman, ad ssarseɣ zzatsen tasessit nsen. Necc ad ten sscareɣ ař ɣa dewwxen uca ad ṭṭṣen iḍeṣ n řebda, ɛemmarṣ ad dd-faqen ɛad, ammu i iqqar SIDI. 40 Necc ad ten dd-ssehwiɣ am izemrawen ɣar tɣarṣt, am icarriyyen ak-d iɣayḍen. 41 Mammec ittwaṭṭef Cicak u mammec ittwaṭṭef řɛezz n marra tammurt! Mammec tedweř tendint n Babil d ict n řqecɛet n unexřiɛ jar řegnus! ■ 42 Igeɛɛed-dd řebḥar x tendint n Babil, s ubarru n řemwaj nnes tᵉttwadeř nettat. 43 Tineddam nnes dewřent d řxarbet, tammurt tedweř d tammurt yuẓɣen d tnezruft d ict n temmurt mani war izeddeɣ ɛad uřa d ijj u mani war ittcuqi uřa d ijj n mmis n bnadem. 44 Necc ad xeřfeɣ zi Bil di Babil u ad kkseɣ zi tmijja nnes min tuɣa iṣarḍ. Řegnus war ɣares ttazzřen ɛad. Ɛad řḥiḍ n Babil ad iwḍa.”
45 “Ffeɣ zzayes, a řgens inu, ejj kuř ijj ad issenjem tudart nnes zi řḥaduq n weɣḍab n SIDI. 46 Mařa lla xenni ad ḍeɛfen wuřawen nwem uca ad ggʷeden zi řexbar nni i ɣa sřen di temmurt, maɣar ijj n řexbar ad ittwaseř deg ijj n useggʷas uca awarni i yijj n useggʷas ad dd-yas ijj n řexbar nneɣni. Ad din yiři lɛunf di temmurt, ijj n řḥakem ad dd-ikkar x ijj n řḥakem nneɣni.”
47 “S uyenni xzar, ad dd-asen wussan nni di ɣa xeřfeɣ zi Babil zi ssibbet n řexyařat ineqcen uca marra tammurt nnes ad tennefḍeḥ u marra inni ittwanɣen ad wḍan di řwest nnes. 48 Ajenna d temmurt d marra min daysen ad sřiweřwen x Babil. Maɣar ad ɣares dd-asen imteḥḥayyen zi ccamal, ammu i iqqar SIDI. 49 Am mammec tuɣa Babil d ssibbet n uweṭṭu n yinni ittwanɣen n Israil, ammu i ɣa wḍan marra inni ittwanɣen zi marra tammurt ɣar tendint n Babil.”
50 “Kenniw, inni inejmen i ssif, ffɣem, war sbeddam ixef nwem! Xemmem-dd zi řaggʷaj di SIDI u jjem Urcalim ad dd-tas ɣar řbař nwem. □ 51 Neccin nesseḍḥa, maɣar nesřa x useḥqar, tezweɣ n řeḥya tedřa aɣembub nneɣ maɣar ibarraniyyen ggaɛden x Tzawiyyin Iqeddsen n Taddart n SIDI.”
52 “S uyenni xzar, ad dd-asen wussan, ammu i iqqar SIDI, Necc ad xeřfeɣ zi řexyařat nnes ineqcen uca di marra tammurt nnes ggur ad ttwazbaren inni ittwanɣen. 53 Waxxa mařa tandint n Babil tgeɛɛed ɣares ař ajenna, waxxa tegga lbaraj nnes ijehden yuɛřan ɣares ař mani war yiwiḍ uřa d ijj, waxxa amenni ad ɣares dd-asen imteḥḥayen zzayi, ammu i iqqar SIDI.”
54 “Iffeɣ-dd řḥess n tɣuyyit tameqqrant zi Babil, amecnaw n ict n lmuṣiba d tameqqrant zi temmurt n Ikaldaniyyen. 55 Maɣar SIDI igga ad ixarreb Babil u ad iqḍa x ddriz nnes ameqqran, minzi řemwaj nsen ad zharen am waman imeqqranen, ddriz n uzehhar nsen ad ittwaseř. 56 Minzi ad xas dd-asen imteḥḥayen, x Babil, uca ttwaḥebbsen ayt n bu-teɣruḍt nnes, řeqwas nsen ad ttwarẓen, maɣar SIDI aqa-t d Arebbi n wexřaf, ad zzayes ixřef nican.”
57 “Ad sscareɣ řḥukkam nnes d imiɣisen nnes d lwulat nnes d imseyyaren nnes d ayt n bu-teɣruḍt nnes uca nitni ad ɣeḍsen deg yiḍes n řebda u ɛemmarṣ ad faqen, ammu i iqqar Ajeǧid, wenni d Isem nnes ‘SIDI n řɛeskarat’. 58 Ammu i iqqar SIDI n řɛeskarat: Ad arren řeḥyuḍ imiriwen n Babil ad sseḍḥan aṭṭas uca tiwwura nnes yuɛřan ad tent qedden s tmessi. Řegnus ad aḥřen baṭeř u ccuɛub i tmessi. Nitni ggur ad sřawen.”
59 Awař nni yumur unabi Irmiya i Saraya, mmis n Niri-Yah, mmis n Maḥsiyya, umi wanita yuyur zi Ṣidqiya, ajeǧid n Yahuda, ɣar Babil, deg useggʷas wiss arebɛa n řeḥkamet nnes. Tuɣa Saraya d řḥakem x řemrageḥ n řɛeskar.
60 Irmiya yura marra řɣar i dd ɣa yasen x Babil deg ijj n wedlis ittwannḍen, marra awařen nni ittwarin x Babil. 61 Xenni inna Irmiya i Saraya: “Xmi dd ɣa tased ɣar Babil, xzar mammec i ɣa tegged ad tbarrḥed s marra awařen-a, 62 ad tinid: ‘A SIDI, Cek simant nnek teqqared x wemcan-a belli ad zzayes tekksed imezdaɣ maḥend war dayes izeddeɣ ɛad uřa d ijj, řa bnadem uřa d řmař, u belli amcan-a ad yiři d ict n řxarbet!’ 63 Xmi i ɣa tkemmřed zeg uɣari n wedlis ittwannḍen, ad ɣares teqqned ijj n weẓru, ad t tenḍared di řwest n yeɣzar n Lfuraṭ 64 ad tinid: ‘Ammu i ɣa tɣebba tendint n Babil u war tgiɛɛid ɛad zi ssibbet n řɣar i xas dd-ssehwiɣ. Nitni ad sřawen.’ ” Ař da i yiwḍen wawařen n Irmiya.