1 Imsar umi ikemmeř Irmiya řhard nnes i řgens marra s marra awařen n SIDI, AREBBI nsen, s minzi tuɣa SIDI, AREBBI nsen, issekk i-t-i-dd ɣarsen, 2 aqa issiweř Ɛazarya, mmis n Hucaɛya, u nnan ɛawed Yuḥanan, mmis n Qariyaḥ, d marra yeryazen imɛeffaren i Irmiya: “Cek tessxarriqed. SIDI, AREBBI nneɣ, war cek isekk maḥend ad tinid: ‘War iɛeddeř ad traḥem ɣar Miṣra maḥend ad dinni teqqimem am ibarraniyyen!’ 3 Maca Barux, mmis n Niri-Yah, i cek i dd-iḥarrcen xaneɣ ḥima ad aneɣ tsellem ɣar ifassen n Ikaldaniyyen, maḥend ad aneɣ nɣen u ad aneɣ nedhen di lmenfa ɣar Babil.”

4 Ammu war isři Yuḥanan, mmis Qariyaḥ, d marra imeqqranen n řɛeskar uřa d marra řgens ɣar tmijja n SIDI maḥend ad qqimen di temmurt n Yahuda. 5 Yuḥanan, mmis n Qariyaḥ, d marra imeqqranen n řɛeskar ksin marra min iqqimen n Yahuda nni tuɣa i dd-idewřen zi marra řegnus ɣar mani xasen uẓẓřen, ḥima ad qqimen di temmurt n Yahuda: 6 iryazen ijehden d temɣarin d iḥenjiren imeẓyanen d yessis n ujeǧid d marra řeɛmar nni tuɣa ijja Nebuzaradan, řqebṭan n iɛessasen ifarzen n arrimet, ɣar Jadalya, mmis n Axiqam, mmis n Cafan, uřa d anabi Irmiya d Barux, mmis n Niri-Yah. 7 Nitni usin-dd ɣar temmurt n Miṣra, minzi nitni war sřin ca ɣar tmijja n SIDI uca usin-dd ɣares ař Taḥfanis.

8 Xenni yusa-dd wawař n SIDI ɣar Irmiya di Taḥfanḥis, inna: 9 “Ksi iẓra imeqqranen deg ufus nnek uca seřseq i-ten deg ubeǧaɛ n tisi n luṣa ɣar wadaf n taddart n Firɛun di Taḥfanis. Egg i-t zzat i tiṭṭawin n yeryazen n Yahuda

10 uca ini asen: ‘Ammu i iqqar SIDI n řɛeskarat, AREBBI n Israil: Xzar, Necc ad awyeɣ Nabuxadraṣṣar, ajeǧid n Babil, amsexxar inu, uca ad ggeɣ řɛarc nnes x yeẓra aya nni ssnuffareɣ, uca netta ad iwwet aqiḍun nnes igellden tiwa nsen. ^■  

11 Netta ad dd-yas uca ad iwwet tammurt n Miṣra: wenni iǧan i řmewt, s řmewt, d wenni iǧan i tmeḥbast, i uḥebbes, d wenni iǧan i ssif, s ssif. ^■  

12 Netta ad ssareɣ ict n tmessi deg ixxamen n ṣṣanam n Miṣra uca ad tent sscemḍeɣ u ad ten awyeɣ d imeḥbas. Netta ad yarḍ tammurt n Miṣra amecnaw ameksaw yarḍ arruḍ nnes uca netta ad zzayes dd-iffeɣ di řehna.

13 Netta ad yarẓ imayḍuten nsen iqeddsen, nni iǧan di temmurt n Miṣra, uca ad issecmeḍ ixxamen n ṣṣanam n Miṣra s tmessi.’ ”