1 Awař nni dd-iffɣen ɣar Irmiya i marra Udayen nni tuɣa izeddɣen di temmurt n Miṣra, inni tuɣa izeddɣen di Majdal d Taḥfanḥis d Nuf u di temmurt n Fatrus, i innan: 2 “Ammu i iqqar SIDI n řɛeskarat, AREBBI n Israil: ‘Kenniw simant nwem teẓrim řɣar i ggiɣ x Urcalim u x marra tineddam n Yahuda, uca xzar, řexxu dewřent nitenti d řxirbet, war daysent izeddeɣ ɛad uřa d ijj, 3 zi ssibbet n řɣar i ggin umi d ayi sɛaren ařami wehhben řebxur maḥend ad zzayes ɛebden i irebbiten nneɣni inni war ssinen nitni, řa d kenniw uřa d ibabaten nwem. 4 Necc ssekkeɣ-dd ɣarwem marra imsexxaren inu, inabiyyen, ɛad zeg umezwaru ssekkeɣ ten ḥima ad inin: War tteggem nnɛi aya nni carrheɣ Necc aṭṭas. 5 Nitni maca war sřin u war d ayi wcin amezzuɣ nsen umi dd-dewřen nedmen zi řɣar nsen, war wehhben ɛad ktar tiwhibin nsen n řebxur i irebbiten nneɣni. 6 S uya i farɣeɣ asɛar inu d weɣḍab inu x tneddam n Yahuda u x ibriden n Urcalim, ařami dewřent d řxirbet, ttwaredǧent am teǧa ass-a.’ ” ^■  

7 “Xenni řexxu, ammu i iqqar SIDI n řɛeskarat, AREBBI n Israil: Mayemmi tᵉtteggem řɣar am wanita x tudart nwem ařami tqeṭṭam x weryaz d temɣart, aḥenjir d useymi zi řwest n Yahuda ařami war xawem iceṭṭ min iqqimen, 8 umi d ayi tseɛɛarem s řxedmet n ifassen nwem, umi tessbexxaram řebxur i irebbiten nneɣni zi temmurt n Miṣra mani ɣar dd-tiwḍem řexxu ḥima ad dinni tzedɣem am ibarraniyyen, ařami i ɣa tqeḍɛem ixef nwem ammu u ḥima ad tdewřem d ict n řqecɛet n wexzi d řḥegra jar marra řegnus n temmurt? 9 Ma tᵉttum kenniw qaɛ řɣar i ggin ibabaten nwem d řɣar i ggin ijeǧiden n Yahuda d řɣar i ggint temɣarin nsen uřa d řɣar i teggim kenniw simant nwem d řɣar i ggint temɣarin nwem di temmurt n Yahuda u deg ibriden n Urcalim?

10 Ař ass-a i di neǧa ɛad war ttwarrẓen deg wuř, war zzayi tteggʷden u war gguren ad ḍfaren Ccariɛa inu d tweṣṣa inu nni kenniw wciɣ zzat i wudem nwem u zzat i wudem n ibabaten nwem.”

11 “S uyenni, ammu i iqqar SIDI n řɛeskarat, AREBBI n Israil: ‘Xzar, Necc ad arreɣ udem inu i řɣar xawem u ḥima ad qḍiɣ marra Yahuda. ^■  

12 Necc ad kkseɣ min iqqimen n Yahuda, inni iɛemmden ad uyuren ɣar temmurt n Miṣra ḥima ad dinni zedɣen am ibarraniyyen. Nitni ad ttwahellken marra, ad wḍan di temmurt n Miṣra. Nitni ad ttwahellken s ssif d řaẓ, am umeẓyan am umeqqran. Nitni ad mmten s ssif d řaẓ uca ad dd-dewřen d ict n řqecɛet n wexzi d unexřiɛ d nneɛřet d řḥegra. ^■  

13 Necc ad xeřfeɣ zeg inni izeddɣen di temmurt n Miṣra am mammec tuɣa xeřfeɣ zi Urcalim, s ssif, s řaẓ u s ṭṭaɛun.

14 Zi min iqqimen n Yahuda, zeg inni iwḍen ɣar temmurt n Miṣra ḥima ad dinni zedɣen am ibarraniyyen, war inejjem uřa d ijj niɣ ad yarweř ḥima ad dd-iɛqeb ɣar temmurt n Yahuda mani ttexsen ad dd-ɛeqben maḥend ad din zedɣen. War dd-tteɛqiben ca, mɣir inni izemmaren ad nejmen.”

15 Xenni arrin-dd x Irmiya marra iryazen, inni issnen aqa timɣarin nsen wehhbent řebxur i irebbiten inneɣni, uřa d marra timɣarin i din ibedden, ijj n ubarru d ameqqran, marra řgens nni tuɣa izeddɣen di temmurt n Miṣra, di Fatrus, nnan:

16 “X wawař i kidneɣ tessiwřed deg Yisem n SIDI, war ɣarek nettesři ca.

17 Maɣar kuř awař i dd-iffɣen zeg uqemmum nneɣ ad t negg umi ɣa nessbexxar i tjeǧidt n ujenna u umi d as i ɣa nseyyeb tiwhibin n useyyeb am mammec tuɣa negga, neccin d ibabaten nneɣ uřa d ijeǧiden nneɣ d řḥukkam nneɣ, di tneddam n Yahuda u deg ibriden n Urcalim, umi tuɣa nejjiwen neccin s weɣrum u tuɣa aneɣ mliḥ, tuɣa war din tarjijat zi ḥed. ^■  

18 Zeg wami maca nessbedd nettwehheb řebxur i tjeǧidt n ujenna u zeg useyyeb n tewhibin i nettat, aqa neḥwaj u nefna neccin s ssif d řaẓ.

19 U mařa neccin nessbexxar i tjeǧidt n ujenna u nseyyeb as tiwhibin n useyyeb, ma nhřa argab d řxaḍar n yeryazen nneɣ negga as tifḍirin i ṣṣedqet nni dayes yarwesen u nseyyeb as tiwhibin n useyyeb?”

20 Xenni issiweř Irmiya ɣar marra řgens, ɣar iryazen d temɣarin, ɣar marra řgens nni tuɣa i dd xas yarrin ammu, inna: 21 “Tiwhibin n řebxur nni tessbexxarem di tneddam n Yahuda u x ibriden n Urcalim, kenniw d ibabaten nwem, ijeǧiden nwem d řḥukkam nwem d řgens n temmurt, ma war tent idar SIDI niɣ war dd-usint ɣar řbař nnes? 22 SIDI war iqqim ɛad iṣebbar awem x tmegga nwem tiɛeffanin, x jjɛayef i teggim. S uyenni tedweř temmurt nwem d řxarbet d ict n temmurt ixřan uřa d ict n řqecɛet n unexřiɛ d wexzi, ařami war din izeddeɣ ɛad uřa d ijj, am teǧa ass-a. 23 Minzi kenniw tiwyem-dd řebxur u texḍam ak-d SIDI u war tesřim ca ɣar tmijja n SIDI u war tuyurem di Ccariɛa nnes u di tweṣṣa nnes u di cchadat nnes, x uya i kenniw iřqef řɣar-a, am teǧa ass-a.”

24 Xenni inna Irmiya i marra řgens u i marra timɣarin: “Sřem i wawař n SIDI, marra Yahuda nni iǧan di temmurt n Miṣra. 25 Ammu i iqqar SIDI n řɛeskarat, AREBBI n Israil, iqqar: ‘X kenniw u x temɣarin nwem, aqa tennam t s uqemmum nwem u s ifassen nwem teggim t, tennam: Amewci n wawař i negga, ad t nkemmeř nican ḥima ad nqeddem tiwhibin n řebxur i tjeǧidt n ujenna u ḥima ad nseyyeb tiwhibin n useyyeb. Xenni kemmřem nican amewci n wawař nwem u ggem s tidett min tuɣa twaɛdem.’ ”

26 “S uyenni sřem i wawař n SIDI, marra Yahuda inni izeddɣen di Miṣra: ‘Xzar, Necc jjuǧeɣ s Yisem inu ameqqran, iqqar SIDI, war ittwařaɣa s Yisem inu ɛad zi ca n weryaz mammec ma igga zi Yahuda di marra tammurt n Miṣra, ad yini: S tidett am iddar Sidi inu, SIDI! 27 Xzar, Necc ad xasen ɛesseɣ i řɣar, war iǧi i řxar. Marra iryazen n Yahuda nni iǧan di temmurt n Miṣra, ad hellken s ssif d řaẓ ař ɣa ttwakksen. ^■   28 Maca inni yarewřen zi ssif, ad dd-dewřen zi temmurt n Miṣra ɣar temmurt n Yahuda, mɣir ijj n wuru n yeryazen. Marra min iqqimen n Yahuda inni yiwḍen ɣar temmurt n Miṣra ḥima ad din zedɣen am ibarraniyyen, ad ssnen awař n man wen i ɣa iqqim ibedd, wenni inu niɣ wenni nsen. 29 Man aya ad awem tiři d řeɛřamet, ammu i iqqar SIDI, aqa Necc ad kenniw ɛaqbeɣ deg wemcan-a ḥima ad tessnem aqa awařen inu xawem ad xawem iřin i řɣar. 30 Ammu i iqqar SIDI: Xzar, Necc ad ssiwḍeɣ Firɛun Ḥufraɛ, ajeǧid n Miṣra, ɣar ufus n řɛedyan nnes u ɣar ufus n yinni yarezzun tudart nnes, am mammec ssiwḍeɣ Necc Ṣidqiya, ajeǧid n Yahuda, ɣar ufus n Nabuxadraṣṣar, ajeǧid n Babil, řeɛdu nnes wenni tuɣa yarezzun tudart nnes.’ ”