1 Xenni qarrben-dd marra imeqqranen n řɛeskar, Yuḥanan, mmis n Qariyaḥ, d Yazanya, mmis n Hucaɛya, d marra řgens, zeg umeẓyan ař ameqqran. 2 Nitni nnan i unabi Irmya: “Iři ad yaf tutra nneɣ arḍa zzat i wudem nnek uca ttar aneɣ ɣar SIDI, AREBBI nnek, di ṭṭweɛ n marra min iqqimen, minzi neccin neqqim ɛad s drus zeg waṭṭas am mammec tzemmared ad aneɣ tessecned s tiṭṭawin nnek. 3 Iři SIDI, AREBBI nnek, ad aneɣ isscen man abrid i ɣa neḍfar d min ɣa negg.” 4 Inna asen unabi Irmiya: “Necc sřiɣ t. Xzar, necc ad ttareɣ di ṭṭweɛ nwem ɣar SIDI, AREBBI nwem, ɛlaḥsab awařen nwem. Necc ad awem iniɣ marra awař nni zi dd xawem i ɣa yarr SIDI, war zzaywem ssnuffareɣ uřa d ijj n wawař.” 5 Nitni nnan i Irmiya: “SIDI ad yiři d Ccahed d amtiqqi d aṣdiq jar aneɣ mařa war nettegg ɛlaḥsab kuř awař nni kidek ɣarneɣ dd ɣa issekk SIDI, AREBBI nnek! 6 D aṣebḥan niɣ d aɛeffan, ad nseř ɣar tmijja n SIDI, AREBBI nneɣ, i umi cek i ɣa nessekk maḥend ad niři mliḥ xmi i ɣa nseř ɣar tmijja n SIDI, AREBBI nneɣ.” ^■  

7 Awarni řami ɛdun ɛecra n wussan, imsar aqa iffeɣ wawař n SIDI ɣar Irmiya. 8 Xas uca iřaɣa-dd netta x Yuḥanan, mmis n Qariyaḥ, u x marra ikumandaren n řɛeskar nni tuɣa ɣares iǧan uřa x marra řgens, zeg umeẓyan ař ameqqran. 9 Inna asen: “Ammu i iqqar SIDI, AREBBI n Israil, ɣar wenni d ayi tessekkem, ḥima ad as ssiwḍeɣ tutra nwem zzat i wudem nnes:

10 ‘Mařa kenniw teqqimem tzeddɣem di temmurt-a, ammu kenniw i ɣa ssbeddeɣ u war kenniw heddmeɣ, ad kenniw ẓẓuɣ u war kenniw qeřɛeɣ, maɣar Necc ndemmeɣ x řɣar i daywem ggiɣ. ^■  

11 War tteggʷdem ca zeg ujeǧid n Babil, wenni zi tᵉtteggʷedem. War zzayes teggʷdem, ammu i iqqar SIDI. Maɣar Necc akidwem ḥima ad kenniw ssnejmeɣ u ad kenniw fekkeɣ zeg ufus nnes.

12 Necc ad kenniw areḥmeɣ maḥend netta ad kenniw yarḥem u ad kenniw yarr ad tdewřem ɣar temmurt nwem.

13 Mařa kenniw maca teqqarem: ‘Neccin war nettɣimi ca di temmurt-a!’, u war tᵉttesřim ca ɣar tmijja n SIDI, AREBBI nwem,

14 maca teqqarem: ‘Lla, nexs ad nuyur ɣar Miṣra mani neccin war nẓarr amenɣi u war nettesři i uṣuḍi deg uyicc n icarri u war nettřiẓi aɣrum, aqa dinni i nexs ad neqqim!’,

15 xenni sřem řexxu ɣar wawař n SIDI, kenniw min iqqimen n Yahuda! Ammu i iqqar SIDI n řɛeskarat, AREBBI n Israil: Mařa kenniw tɛemmdem ad tuyurem ɣar Miṣra uca ad dd-tawḍem ḥima ad din tzedɣem am ibarraniyyen,

16 xenni ssif i zi tᵉtteggʷedem ad kenniw iřqef dinni di Miṣra u řaẓ i zi teggʷedem ad kenniw dd-iḍfar dinni di Miṣra u ad dinni temmtem.

17 Xenni marra iryazen nni ixsen ad uyuren ɣar Miṣra ḥima ad din zedɣen am ibarraniyyen ad mmten s ssif d řaẓ d ṭṭaɛun. War zzaysen inejjem uřa d ijjen uca uřa d ijj zzaysen war yarekkweř zi řɣar i xasen dd ɣa ɣeḍřeɣ.’ ”

18 “Maɣar ammu i iqqar SIDI, AREBBI n Israil: ‘Am mammec aɣḍab inu d wesɛar inu ttwazeǧɛen x imezdaɣ n Urcalim, ammu i ɣa ittwazeǧeɛ uřa d asɛar inu xawem mařa tusim-dd ɣar Miṣra. Kenniw ad tdewřem d řqecɛet n wexzi d weḍḥac, i nneɛřet d řḥegra. Tammurt-a ɛemmarṣ ad tt tẓarem ɛad. ^■  

19 SIDI issiweř-dd ɣarwem, a min iqqimen n Yahuda! War dd-tidfem ɣar Miṣra. Snem mliḥ aqa necc ɛeřmeɣ awem ass-a. 20 Maɣar kenniw tɣeccem x yixef nwem. Kenniw simant nwem tessekkem ayi-dd ɣar SIDI, AREBBI nwem, tennam: ‘Ẓaǧ aneɣ ɣar SIDI, AREBBI nneɣ. Ini aneɣ marra min ɣa yiři ad yini SIDI, AREBBI nneɣ, uca neccin ad t negg!’ 21 Ass-a nniɣ awem, maca kenniw war tesřim ca ɣar tmijja n SIDI, AREBBI nwem, ɣar marra s min zi i d ayi ɣarwem dd-issekk. 22 Xenni řexxu, ssnem mliḥ aqa ad temmtem s ssif d řaẓ d ṭṭaɛun deg wemcan mani texsem ad tuyurem ḥima ad dinni teqqimem am ibarraniyyen.’ ”