1 Imsar deg uyur wiss sebɛa aqa yusa-dd Ismaɛil, mmis n Natanya, mmis n Ilicamaɛ nni d ijj zi řwacun n ujeǧid, jmiɛ ak-d imeqqranen n ujeǧid u akides ɛad ɛecra n yeryazen, ɣar Jadalya, mmis n Axiqam, ɣar Miṣfat. Nitni munen ttᵉtten din di Miṣfat. ^■   2 Xenni ikkar Ismaɛil, mmis n Natanya, jmiɛ ak-d ɛecra n yeryazen nni tuɣa ɣares iǧan uca wtin Jadalya, mmis n Axiqam, mmis n Cafan, s ssif. Ammu i inɣa Ismaɛil wenni tuɣa igga ujeǧid n Babil x temmurt. 3 Inɣa Ismaɛil uřa d marra Udayen i ɣares, ixs ad yini inni tuɣa ɣar Jadalya di Miṣfat, uřa d Ikaldaniyyen nni ittwafen din, iɛeskariyyen.

4 Deg wass wiss tnayen awarni řami inɣa Jadalya u uřa d ijj war yargib ɛad, 5 usin-dd iryazen zi Cakim, Cilu d Samarya, tmenyin n yeryazen, s timira ḥeffent d werruḍ icarreg d ixebbicen. Nitni iwyen-dd deg ifassen nsen ict n tewhibt n řɣiǧet d řebxur maḥend ad tt awyen ɣar Taddart n SIDI. 6 Uca iffeɣ ɣarsen Ismaɛil, mmis n Natanya, zi Miṣfat u umsagar akidsen, iru am iggur. Umi ten immeřqa, inna: “Asem-dd ɣar Jadalya, mmis n Axiqam!” 7 Umi dd-iwḍen nitni ɣar řwest n tendint, iɣarṣ asen Ismaɛil, mmis n Natanya. Netta d yeryazen i kides iǧan, nḍaren ten di řwest n wanu. 8 Maca ttwafen ɛecra n yeryazen jar asen inni innan i Ismaɛil: “War d aneɣ neqq ca, maɣar deg iyyar neccin ɣarneɣ řeɛweč ixemmřen n irden, imendi, zzect d tamment.” Xenni iḥta xasen, war ten inɣi di řwest n aytmas. 9 Anu nni di inḍar Ismaɛil marra arrimat n yeryazen nni inɣa ɣar uɣezdis n Jadalya, tuɣa d wenni igga ujeǧid Asa zi ssibbet n Baɛca, ajeǧid n Israil. Ismaɛil, mmis n Natanya, iccur i-t s yenni ittwanɣen.

10 Indeh Ismaɛil marra min iqqimen ɛad zi řgens i iǧan di Miṣfat, d imeḥbas, aqa yessis n ujeǧid d marra řgens nni tuɣa iqqimen ɛad di Miṣfat, inni x tuɣa igga Nebuzaradan, řqebṭan n iɛessasen n arrimet, Jadalya, mmis n Axiqam. Ismaɛil, mmis n Natanya indeh i-ten d imeḥbas uca yuyur ḥima ad iɛdu x L'Urdun ɣar temmurt n ayt n Ɛammun.

11 Umi Yuḥanan, mmis n Qariha, d marra ikumandaren n řɛeskar nni tuɣa ɣares iǧan, sřin s marra řɣar i tuɣa igga Ismaɛil, mmis n Natanya,

12 iwyen nitni marra iryazen uca uyuren deg webrid ḥima ad mmenɣen ak-d Ismaɛil, mmis n Natanya. Nitni ufin t ɣar waman imeqqranen ɣar Jibɛun.

13 Řami marra řgens i tuɣa ak-d Ismaɛil, inṭeḥ Yuḥanan, mmis n Qariḥa, d marra imeqqranen n řɛeskar nni ɣares, farḥen aṭṭas.

14 Marra řgens nni tuɣa indeh Ismaɛil d ameḥbus zi Miṣfat, qeřben, dewřen-dd uca ɛdun ɣar Yuḥanan, mmis n Qariḥa.

15 Ismaɛil maca, mmis n Natanya, yarweř-dd zi zzat n wudem n Yuḥanan ak-d tmenya n yeryazen uca yuyur ɣar ayt n Ɛammun.

16 Xenni iksi Yuḥanan, mmis n Qariyaḥ, netta jmiɛ ak-d marra imeqqranen n řɛeskar nni ɣares iǧan, marra min iqqimen n řgens nni tuɣa dd-isseɛqeb zi Ismaɛil, mmis n Natanya, zi Miṣfat, awarni řami inɣa wanita Jadalya, mmis n Axiqam: aqa iryazen ijehden, iɛeskariyyen, timɣarin, iḥenjiren imeẓyanen d imsexxaren icenɛen nni dd-isseɛqeb netta zi Jibɛun.

17 Nitni uyuren deg webrid uca qqimen deg wemcan n arraḥet n Kimhan nni ɣar Bayt-Laḥm maḥend ad ssenni dd-ɛdun ařami dd-udfen ɣar Miṣra.

18 Nitni arewřen zi zzat n wudem n Ikaldaniyyen, maɣar ggʷeden zzaysen, maɣar Ismaɛil, mmis n Natanya, inɣa Jadalya, mmis n Axiqam, wenni igga ujeǧid n Babil d řbaca x temmurt.