1 Awař nni dd-yusin zi SIDI ɣar Irmiya awarni řami t-i-dd-yiwi Nebuzaradan, řqebṭan n iɛessasen n arrimet, zi Rama. Umi t-i-dd-iwyen ittwacarf netta s ssnaseř di řwest n imenfiyyen zi Urcalim d Yahuda, inni ittwanedhen d imenfiyyen ɣar Babil. 2 Řqebṭan n iɛessasen n arrimet i dd-yiwi Irmiya, inna as: “SIDI, AREBBI nnek, tuɣa ittbarreḥ s řɣar-a x wemcan-a 3 uca yarra i-t SIDI ad dd-yas uca Netta igga s min tuɣa inna, maɣar kenniw texḍam ak-d SIDI u war tesřim ca ɣar tmijja nnes. S uyenni kenniw iřqef man aya. 4 Řexxu maca, xzar, ad fesyeɣ ass-a ssnaseř nni deg ifassen nnek. Mařa i cek mliḥ di tiṭṭawin nnek ad kidi dd-tased ɣar Babil, xenni as-dd, u necc ad cek ksiɣ. Maca mařa d aɛeffan di tiṭṭawin nnek maḥend ad kidi tuyured ɣar Babil, ejj i-t xenni. Xzar, marra tammurt zzatek. Cek tzemmared ad tuyured mani iǧa mliḥ u nican di tiṭṭawin nnek ḥima ad tuyured!” 5 Umi tuɣa war ixs ad iɛqeb, inna: “Dweř-dd ɣar Jadalya, mmis n Axiqam, mmis n Cafan, wenni igga ujeǧid n Babil x tneddam n Yahuda uca qqim ɣares jar řgens, niɣ uyur mani tᵉttwarid mliḥ di tiṭṭawin nnek maḥend ad traḥed.” Xas uca iwca as řqebṭan n iɛessasen n arrimet řeɛweč i umuddu d ict n tarzeft uca ijja i-t ad yuyur. 6 Yuyur Irmiya ɣar Jadalya, mmis n Axiqam, ɣar Miṣfat. Iqqim ittnusa ɣares di řwest n řgens nni tuɣa iqqimen ɛad di temmurt.

7 Řami marra imeqqranen n řɛeskarat nni iǧan deg iyyaren, nitni d iryazen nsen, sřin aqa ajeǧid n Babil igga Jadalya, mmis n Axiqam, x temmurt u igga i-t x yeryazen d temɣarin d iḥenjiren uca uřa x imezřaḍ qaɛ n temmurt, x marra inni tuɣa war ittwanedhen ɣar Babil, 8 usin-dd nitni ɣar Jadalya di Miṣfat: Ismaɛil, mmis n Natanya, Yuḥanan d Yunatan, iḥenjiren n Qariḥa, Saraya, mmis n Tanḥumat, arni xas iḥenjiren n Ɛifa zi Neṭufa d Yazanya, mmis n Umaɛki, marra nitni ak-d yeryazen nsen. 9 Jadalya, mmis n Axiqam, mmis n Cafan, ijjuǧ asen u i yeryazen nsen, inna: “War tteggʷdem maḥend ad tsexxarem i Ikaldaniyyen. Qqimem di temmurt uca sexxarem i ujeǧid n Babil, xenni ad tiřim mliḥ.

10 Xzar, necc zeddɣeɣ di Miṣfat maḥend ad beddeɣ d awkiř di ṭṭweɛ nwem zzat i wudem n Ikaldaniyyen nni ɣarneɣ i dd ɣa yasen. Kenniw maca, smunem binu d tini n unebdu d zzect uca ggem aya deg iqdiḥen nwem uca zedɣem di tneddam nni tᵉṭṭfem.”

11 Uřa d marra Udayen nni iǧan di Mu’ab u jar ayt n Ɛammun u di Idum u di marra timmura, sřin aqa ajeǧid n Babil ijja min iqqimen n imezdaɣ di Yahuda u igga xasen Jadalya, mmis n Axiqam, mmis n Cafan. ^□  

12 S uyenni dd-ɛeqben marra Wudayen zi marra imucan mani xasen uẓẓřen uca iwḍen ɣar temmurt n Yahuda ɣar Jadalya ɣar Miṣfat. Nitni ssmunen aṭṭas n binu d tini n unebdu.

13 Uřa d Yuḥanan, mmis n Qariḥa, d marra ikumandaren n řɛeskar nni tuɣa deg iyyaren usin-dd ɣar Jadalya ɣar Miṣfat.

14 Nitni nnan as: “Ma tessned cek, aqa Baɛlis, ajeǧid n ayt n Ɛammun, issekk-dd Ismaɛil, mmis n Natanya, ḥima ad cek ineɣ?” Jadalya, mmis n Axiqam, maca war ten yumin.

15 Yuḥanan, mmis n Qariḥa, maca issiweř ak-d Jadalya s tnuffra di Miṣfat, inna: “Ejj ayi ad din řaḥeɣ u ad nɣeɣ Ismayil, mmis n Natanya. War t ittessen uřa d ijj. Mayemmi i ɣa ineɣ netta ḥed u marra ayt n Yahuda i dd-xak imunen ad ttwasszzuzaren d min iqqimen zi Yahuda ad iweddar?”

16 Maca Jadalya, mmis n Axiqam, inna i Yuḥanan, mmis n Qariḥa: “War ttegg aya, maɣar min teqqared cek x Ismaɛil d ixarriqen waha.”