1 Awař i dd-iffɣen zi SIDI ɣar Irmiya, umi Nabuxadraṣṣar, ajeǧid n Babil, d marra řɛeskar nnes d marra tigeldiwin n ddunect i iǧan sadu fus nnes d marra řegnus tuɣa ttmenɣan ak-d Urcalim u ak-d marra tineddam nnes, i innan: ^■  

2 “Ammu i iqqar SIDI, AREBBI n Israil: ‘Uyur uca siweř ak-d Ṣidqiya, ajeǧid n Yahuda, ini as: Ammu i iqqar SIDI, xzar, Necc ad wceɣ tandint-a deg ufus n ujeǧid n Babil u netta ad as iqqed timessi. ^■   3 Uřa d cek s yixef nnek war tnejjmed i ufus nnes, maca ad tᵉttwaṭṭfeḍ ad temmewced deg ufus nnes. Tiṭṭ di tiṭṭ ad tẓared ajeǧid n Babil uca ad kides tessiwřed zeg uqemmum ɣar uqemmum uca ad dd-tawḍed ař Babil.’ ” ^■  

4 “Seř maca i wawař n SIDI, Ṣidqiya, ajeǧid n Yahuda, ammu i xak iqqar SIDI: ‘Cek war tᵉttwanɣed ca s ssif. 5 Ad temmted di řehna uca am mammec ssarɣen timessiyat i ibabaten nnek, ijeǧiden n zic nni tuɣa iǧan qbeř i cek, ad ssarɣen ɛawed d timessiyat i cek uca ad xak wten agejdur, ad inin: Ax, sidi!, maɣar Necc ssiwřeɣ awař-a, ammu i iqqar SIDI.’ ”

6 Issiweř unabi Irmiya marra awařen-a i Ṣidqiya, ajeǧid n Yahuda, di Urcalim, 7 umi tuɣa řɛeskar n ujeǧid n Babil ittmenɣa ak-d Urcalim u ak-d marra tineddam n Yahuda nni iqqimen, ak-d Laxic d Ɛaziqa, maɣar ina tuɣa ɛad qqimen jar tneddam n Yahuda minzi tuɣa atent d tineddam ifaryen.

8 Awař nni dd-iffɣen zi SIDI ɣar Irmiya, awarni ma iqqen ujeǧid Ṣidqiya ijj n řɛahd ak-d marra řgens nni iǧan di Urcalim maḥend ad ittwabarreḥ s ijj n usarreḥ jar asen, ^■   9 maḥend kuř ijjen ad yarxu i ismeɣ nnes u i tesmeɣt nnes, i Uɛibri u i Tɛibrect, ařami war ittɣimi jar asen uřa d ijjen wenni iǧan d ismeɣ ɣar ijj n weryaz zi Yahuda, ɣar umas.

10 Marra řḥukkam d marra řgens nni iqqnen řɛahd, sřin aqa kuř aryaz ad yarxu i ismeɣ nnes u kuř aryaz ad yarxu i tesmeɣt nnes ḥima war ittɣimi ɣarsen uřa d ijj n ismeɣ. Nitni wcin amezzuɣ i man aya uca ssekken ten.

11 Maca awarni as beddřen, arrin isemɣan d tesmeɣin inni umi tuɣa arxun, ggin ten s uɣiř ɛawed d imsemɣan d tsemɣin.

12 Xenni dd-yusa wawař n SIDI ɣar Irmiya, inna:

13 “Ammu i iqqar SIDI, AREBBI n Israil: ‘Necc ggiɣ ijj n Řɛahd ak-d ibabaten nwem deg wass nni di ten dd-ssuffɣeɣ zi Miṣra, zi taddart n tesmuɣi, nniɣ:

14 Awarni řami ɛdun sebɛa n iseggʷusa ittxeṣṣa kuř ijj ad issekk umas Aɛibrani nni d ac izzenzen ixef nnes uca tuɣa ixeddem i cek setta n iseggʷusa. Ittxeṣṣa ad as tarxud ad yuyur di třelli! Maca ibabaten nwem war ɣari dd-sřin u war d ayi wcin ca amezzuɣ. ^■  

15 Waxxa kenniw tdewřem-dd, teggim min iǧan nican di tiṭṭawin inu am ibarreḥ kuř ijj s usarxu i umqarreb nnes uca teggim ijj n řɛahd zzat i wudem inu di Taddart min xef ittwabarreḥ Isem inu,

16 kenniw maca tennqeřbem ɛawed uca tessɛiǧtem Isem inu. Kuř ijj yarra-dd ismeɣ nnes u kuř ijj yarra-dd tismeɣt nnes nni umi tuɣa tarxum maḥend ad uyuren nitni mani xsen, uca kenniw teḥṣarem ten ɛawed maḥend ad awem iřin d imsemɣan d tsemɣin.’ ”

17 “S uyenni, ammu i iqqar SIDI: ‘Kenniw war ɣari dd-tesřim maḥend kuř ijj ad ibarreḥ s usarxu i umas u kuř ijj i umqarreb nnes. Xzar, ammu Necc ad awem barrḥeɣ s usarxu, ammu i iqqar SIDI, maḥend ad kenniw sellmeɣ i ssif, i ṭṭaɛun u i řaẓ. Necc ad kenniw ggeɣ d ijj n umedya n usiggʷed i marra tigeldiwin n ddunect. ^■  

18 Necc ad arreɣ iryazen nni iɛdun x řɛahd inu, inni war iṭṭifen deg wawařen n řɛahd nni ggin zzat i wudem inu, am uyenduz nni bḍan x tnayen d wenni jar izeynat nnes cuqqen:

19 řḥukkam n Yahuda d řḥukkam n Urcalim, imsexxaren icenɛen, ikehhanen d marra řgens n temmurt, inni icuqqen marra jar iziynat n uyenduz. 20 Necc ad ten wceɣ deg ufus n řɛedyan nsen u deg ufus n yinni yarezzun ad ten nɣen uca řxecbat nsen ad iřint d macca i ijḍaḍ n ujenna u i řmař n temmurt. ^□  ■   21 Uřa d Ṣidqiya, ajeǧid n Yahuda, d řḥukkam nnes ad ten ggeɣ deg ufus n řɛedyan nsen, deg ufus n yinni yarezzun tudart nsen, deg ufus n řɛeskar n ujeǧid n Babil nni xawem iffɣen řexxu. ^■   22 Xzar, Necc ad umureɣ, ammu i iqqar SIDI, u Necc ad ten dd-arreɣ ɣar tendint-a u nitni ad kides mmenɣen, ad tt ṭṭfen uca ad as qqden timessi. Necc ad arreɣ tineddam n Yahuda d řxarbet war dayes ittɣimi uřa d ijj n umezduɣ ɛad.’ ”