1 Yusa-dd wawař n SIDI ɣar Irmiya i twařa wiss tnayen, umi tuɣa ɛad ittwabelleɛ xas di řemraḥ n řeḥbes, inna:

2 “Ammu i iqqar SIDI, wenni t iggin, SIDI, wenni d as iwcin addud nnes ařami man aya ad iqqim ibedd, SIDI d Isem nnes: 3 ‘Řaɣa ayi-dd, uca ad xak dd-arreɣ u ad ac ssecneɣ timesřayin timeqqranin d innufaren, war tent tessined.’ 4 Maɣar ammu i iqqar SIDI, AREBBI n Israil, x tudrin n tendint-a u x tudrin n ijeǧiden n Yahuda nni ittwahedmen di ṭṭweɛ n wecbaren n řeḥṣaret u ḍidd n ssif, 5 - inni dd-yusin ḥima ad mmenɣen ak-d Ikaldaniyyen, maca aqa usin-dd ḥima ad tent ɛemmaren s řxecbat n iwdan nni nɣiɣ deg weɣḍab inu u deg wesɛar inu, minzi ssdurryeɣ udem inu x tendint-a zi ssibbet n marra tuɛeffna nsen ... : 6 Xzar, Necc ad as-t-i-dd-awyeɣ ařeqqem d ugenfu u Necc ad ten ssgenfiɣ uca ad xasen ɛarriɣ ijj n řɛunṣar ifeyyḍen s řehna d tidett. 7 Necc ad ssenqeřbeɣ tameḥbast n Yahuda d tmeḥbast n Israil, u ad ten bniɣ am umezwaru. ^■   8 Necc ad ten ssizedgeɣ zi marra řmuɛṣiyyet nsen i zi kidi xḍan. Ad ɣfareɣ marra řmuɛṣiyyat nsen i zi xḍan akidi uca ɛeddan xafi. ^■   9 Ad tiři tendint n Urcalim i Necc d isem issefraḥen d usemɣar d ccan ɣar marra řegnus n ddunect nni i ɣa isřan řxar nni d asen i ɣa ggeɣ. Nitni ad ggʷeden u ad arjijen x marra řxar u x marra řehna nni d as i ɣa ggeɣ.”

10 “Ammu i iqqar SIDI: ‘Deg wemcan-a i x teqqarem kenniw: Aqa-t d řxirbet ařami war iqqim uřa d ijj n bnadem niɣ d řmař!, wah di tneddam n Yahuda u deg ibriden n Urcalim, tinni ittwareddǧen ařami war iqqim uřa d ijj n bnadem niɣ d amezduɣ niɣ d řmař, ad ittwaseř ɛad

11 tmijja n warcaq d tmijja n řefraḥet, tmijja n muřay d tmijja n tesřit, tmijja n yinni iqqaren:

Qadam SIDI n řɛeskarat

maɣar SIDI icna,

minzi ad tiři tamexsiwt nnes icewwaren

i řebda qaɛ!

tmijja n yinni i dd-ittawyen aqadi di Taddart n SIDI, maɣar Necc ad ssenqeřbeɣ tameḥbast n temmurt, am deg umezwaru!’, iqqar SIDI.” ^■  

12 “Ammu i iqqar SIDI n řɛeskarat: ‘Deg wemcan-a i ittwareddǧen ařami war iqqim ɛad uřa d ijj n bnadem niɣ d řmař, wah di marra tineddam nnes ad iřint ɛawed ddmani n tarewsa i imeksawen nni i ɣa issareyyḥen uǧi nsen. ^□  

13 Di Temmurt n Idurar, di tneddam n Temmurt Iwaṭan, di tneddam n Temmurt n Ljanub, di temmurt n Binyamin, deg imucan i d as dd-innḍen i Urcalim u di tneddam n Yahuda ad ɛdun wuǧi ɛawed sadu ifassen n yinni i ten iḥessben!’, ammu i iqqar SIDI.”

14 “Xzar, ad dd-asen wussan, ammu i iqqar SIDI, ad ssqefřeɣ awař aṣebḥan nni ssiwřeɣ i taddart n Israil d taddart n Yahuda. ^■  

15 Deg wussan nni u di řweqt nni ad ssɣemyeɣ i Dawud ijj n UƔEDDU n tsegda. Netta ad yegg řḥeqq d tsegda di temmurt. ^■  

16 Deg wussan nni Yahuda ad ittwassenjem uca Urcalim ad tezdeɣ di řaman uca ad as ggen i Urcalim isem wanita: ‘SIDI d Tasegda nneɣ.’ ”

17 “Maɣar ammu i iqqar SIDI: ‘Ɛemmarṣ ad inqeṣ i Dawud ijj n weryaz nni iqqimen x řɛarc n taddart n Israil,

18 uca uřa d ikehhanen Ilawiyyen war ggur ad qqimen ɛemmarṣ břa ijj n weryaz nni i ɣa iqeddmen zzat i wudem inu taɣarṣt n wecmaḍ niɣ ad issbexxar tawhibt n řɣiǧet niɣ ad issewjed ict n tɣarṣt, marra ussan.’ ”

19 Yusa-dd wawař n SIDI ɣar Irmiya, inna:

20 “Ammu i iqqar SIDI: ‘Mařa izemmar ad tarẓmem řɛahd inu s wass d řɛahd inu s ǧiřet ař ass d ǧiřet war ttiřin ɛad di řweqt nsen, 21 xenni iři ad ittwarẓ uřa d Řɛahd inu ak-d umsexxar inu Dawud, ařami war ɣares ittiři ɛad mmis nni i ɣa iḥekmen x řɛarc nnes, uca uřa ammu Řɛahd inu ak-d Ilawiyyen, ikehhanen, inni iǧan d imsexxaren inu. 22 Řami war izemmar ad ittwaḥseb řɛeskar n ujenna u uřa d ijdi n řebḥar war izemmar ad ittwaɛbar, ammu s waṭṭas i ɣa ggeɣ tarwa n umsexxar inu Dawud u n Ilawiyyen nni d ayi ittsexxaren.’ ”

23 Yusa-dd wawař n SIDI ɣar Irmiya, inna:

24 “Ma war teẓrid mammec issawař řgens-a, qqaren: ‘Tnayen n řaǧat nni ifarz SIDI, aqa inḍar i-tent řexxu?’ Aqa nitni stehzan zi řgens inu ařami war iǧi ɛad d řgens i nitni.”

25 “Ammu i iqqar SIDI: ‘Mařa war iǧi ɛad Řɛahd inu s wass d ǧiřet, mařa Necc war ttɣimiɣ ḥeṭṭiɣ ɛad lfarayiḍ n ijenwan d temmurt, 26 ad nḍareɣ uřa d tarwa n Yaɛqub d tarwa n Dawud ařami war tteggeɣ ɛad zi zzariɛet nnes inni ɣa iḥekmen x zzariɛet n Ibrahim d Isḥaq d Yaɛqub. Maɣar Necc ad ssenqeřbeɣ tameḥbast nsen u Necc ad xasen ḥinneɣ.’ ” ^■