1 Awař n SIDI i dd-yusin ɣar Irmiya deg wussan n Yahuyaqim, mmis n Yuciya, ajeǧid n Yahuda, inna: 2 “Uyur ɣar taddart n ayt n Rikab uca siweř akidsen u awyi ten ɣar Taddart n SIDI, deg ijj zeg ixxamen nnes, u ewc asen binu ḥima ad swen.”

3 Xenni iwyeɣ-dd Yazanya, mmis n Irmiya, mmis n Ḥabṣiniya, jmiɛ ak-d marra aytmas d marra iḥenjiren nnes d marra taddart n ayt n Rikab, ^□   4 uca iwyeɣ ten ɣar Taddart n SIDI, deg wexxam n ayt n Ḥanan, mmis n Yajdalya, aryaz n AREBBI, axxam nni iǧan zzat i wexxam n řḥukkam, tiwa i wexxam n Maɛsayya, mmis n Callum, aɛessas n tewwart. 5 Necc ssarseɣ iɣarrafen ccuren s binu d řkisan zzat i wudem n ayt n Rikab uca nniɣ asen: ‘Swem binu!’ 6 Maca nitni nnan: ‘Neccin war nsess ca binu, maɣar babatneɣ Yunadab, mmis n Rikab, iweṣṣa aneɣ, inna: Kenniw ɛemmarṣ war ttsessem binu, kenniw d iḥenjiren nwem, ař i řebda. 7 War iɛeddeř ad tebnam taddart niɣ ad tzarɛem zzariɛet niɣ ad teẓẓum tazayart deg umarjuɛ uřa ad ɣarwem yiři umarjuɛ n uḍiř, maca min ɣa tekkem teddarem ad tzedɣem deg iqiḍan, maḥend ad teddarem ussan aṭṭas di temmurt mani i ɣa tzedɣem am ibarraniyyen. 8 Neccin nesřa ɣar babatneɣ Yunadab, mmis n Rikab, di marra min zi i d aneɣ iweṣṣa, maḥend war nsess binu marra tudart nneɣ, neccin d temɣarin nneɣ d iḥenjiren nneɣ d yessitneɣ, ^□   9 u maḥend war nbenni tudrin d tazeddiɣt i yixef nneɣ. War ɣarneɣ bu umarjuɛ n uḍiř niɣ iyyar niɣ zzariɛet,

10 uca neccin tuɣa nzeddeɣ deg iqiḍan. Ammu i nesřa u negga ɛlaḥṣab marra min zi i d aneɣ iweṣṣa babatneɣ Yunadab.

11 Umi maca Nabuxadnaṣṣar, ajeǧid n Babil, igeɛɛed x temmurt-a, imsar, aqa nenna neccin: Asem-dd, ad nraḥ ɣar Urcalim zi ssibbet n řɛeskar n Ikaldaniyyen u zi ssibbet n řɛeskar n Aram! S uyenni i nzeddeɣ di Urcalim.’ ”

12 Xenni yusa-dd wawař n SIDI ɣar Irmiya, inna:

13 “Ammu i iqqar SIDI n řɛeskarat, AREBBI n Israil: Uyur, ini i yeryazen n Yahuda u i imezdaɣ n Urcalim: Ma war tᵉttexsem ad teksim ttarbiyyet s utesři i wawařen inu?, iqqar SIDI.

14 Awařen n Yunadab, mmis n Rikab, inni yumur i iḥenjiren nsen ḥima war sessen binu, aqa ḍfaren ten-dd, maɣar ɣares ař ass-a war swin ca, minzi nitni sřin ɣar tewṣeyyet n babatsen, maca Necc ssiwřeɣ akidwem, wah ɛad zeg umezwaru ssiwřeɣ akidwem, maca kenniw war ɣari dd-tesřim ca. ^■  

15 Necc ssekkeɣ-dd ɣarwem marra imsexxaren inu, inabiyyen. Ɛad zic sekkeɣ ten ḥima ad inin: Dewřem-dd xenni, kuř ijj zeg webrid nnes aɛeffan u ggem řexdayem tiṣebḥanin u war traddafem irebbiten nneɣni maḥend ad asen tsexxarem, xenni tzemmarem ad teqqimem di temmurt i d awem wciɣ u i ibabaten nwem. Kenniw maca war tewcim amezzuɣ u war ɣari tesřim. ^■  

16 Iḥenjiren n Yunadab, mmis n Rikab, ssqefřen tawṣeyyet n babatsen nni ten yumur, waxxa amenni řgens-a maca war ɣari isři.”

17 “S uya, ammu i iqqar SIDI, AREBBI n řɛeskarat, AREBBI n Israil: Xzar, Necc ad awyeɣ x Yahuda u x marra imezdaɣ n Urcalim marra řɣar nni d asen nniɣ, minzi ssiwřeɣ akidsen maca nitni war sřin ca, uca řaɣiɣ asen maca nitni war dd-arrin ca.”

18 Inna Irmiya i taddart n ayt n Rikab: “Ammu i iqqar SIDI n řɛeskarat, AREBBI n Israil: ‘Umi tesřim ɣar tewṣeyyet n babatwem Yunadab uca teḥḍam marra tiweṣṣa nnes u teggim ɛlaḥsab marra min d awem yumur,

19 x uya, ammu i iqqar SIDI n řɛeskarat, AREBBI n Israil: Marra ussan war ittxeṣṣi ɛemmarṣ i Yunadab, mmis n Rikab, ijj n weryaz nni ittbeddan zzat i wudem inu!’ ”