1 Awař nni dd-yusin zi SIDI i Irmiya, inna:

2 “Ammu i iqqar SIDI, AREBBI n Israil, iqqar: ‘Ari marra awařen nni d ac nniɣ deg ijj n wedlis. 3 Maɣar xzar, ad dd-asen wussan, ammu i iqqar SIDI, ad qeřbeɣ tameḥbast n řgens inu, Israil d Yahuda, iqqar SIDI. Necc ad ten dd-arreɣ ɣar temmurt i wciɣ i ibabaten nsen u nitni ad tt ṭṭfen d tasɣart.’ ”

4 Ina d awařen i zi issiweř SIDI x Israil d Yahuda:

5 “Maɣar ammu i iqqar SIDI: ‘Nesřa řḥess n iɣuyyan n tiggʷudi s tarjijit, n unexřiɛ, war iǧi n řehna. 6 Seqsam u xzarem, ma izemmar weryaz ad yaruw? Mayemmi i ttwařiɣ marra iryazen s ifassen x tejɛinna nsen am ict n temɣart tᵉttaru u qaɛ aɣembub yarjef iwarɣ am řxecbet? ^■   7 Uct, maɣar d ameqqran ass nni, war iǧi uřa d ijjen am netta. Ict n řweqt n řeḥṣaret i Yaɛqub, maca netta ad zzayes ittwassenjem. ^■   8 Deg wass nni ad imsar, ammu i iqqar SIDI n řɛeskarat, ad arẓeɣ azayřu x yiřawen nnek. Ibarraniyyen war t ttejjin ad xasen isexxar ɛad am yismeɣ, 9 maca nitni ad sexxaren i SIDI, AREBBI nsen, uřa i ujeǧid nsen Dawud wenni dd ɣa ssekkareɣ di ṭṭweɛ nsen.’ ” ^■  

10 “War tteggʷed ca cek, a amsexxar inu Yaɛqub, ammu i iqqar SIDI, war tefciř ca, a Israil, maɣar xzar, Necc i cek i ɣa issnejmen zi temmura iggʷejen uřa d zzariɛet nnek zi temmurt n tmeḥbast nsen. Yaɛqub ad idweř, ad ihna, ad iddar di řaman, uca uřa d ijj war t issnexřiɛ.^■  

11 Maɣar Necc akidek, ammu i iqqar SIDI, ḥima ad cek ssnejmeɣ, maɣar Necc ad qḍiɣ marra řegnus nni ɣar cek zuzzareɣ, maca ɛemmarṣ war cek qeṭṭiɣ, maca ad cek arebbiɣ s řeɛbar iseggden u war cek heṣṣbeɣ d amezdag. ^■  

12 Maɣar ammu i iqqar SIDI: ‘Tareẓẓit nnem war tzemmar ad teggenfa, ayezzim nnem itteqqes. ^■  

13 Uřa d ijj war ittegg min teḥwajed, war ɣarem ca ddwawat i tḥebbuct nnem.

14 Marra inni tuɣa i cem ittexsen ttun cem, war xam ttseqsin, maɣar am mammec iccat řeɛdu ammu i cem wtiɣ, amecnaw ijjen i yarebban s řeqsaḥet, zi ssibbet n řmuɛṣiyyet nnem imɣaren, maɣar ddnub nnem wesɛen aṭṭas. ^■  

15 Mayemmi tesɣuyyud ammu x treẓẓit nnem, x řeḥriq nnem i war izemmaren ad iggenfa? Zi ssibbet n řmuɛṣiyyet nnem imɣaren, maɣar ddnub nnem wesɛen aṭṭas, Necc ggiɣ dayem man aya. ^■  

16 S uyenni, marra inni cem itteffzen, ad ttwaccen simant nsen, uca marra iɣrimen nnem ad uyuren di tmeḥbast, u inni cem ikeccḍen, ad ttwakeccḍen u marra inni cem yucaren, ad ten wceɣ d tukkarḍa. ^■  

17 Maɣar Necc ad cem jbareɣ u ad cem ssgenfiɣ zeg iyezzimen nnem, ammu i iqqar SIDI, minzi nitni řaɣan am ‘Tamenḍart!’, qqaren: ‘Aqa-tt d Ṣihyun, war xas ittseqsi uřa d ijj!’ ”

18 “Ammu i iqqar SIDI: ‘Xzar, ad ssenqeřbeɣ tameḥbast n iqiḍan n Yaɛqub uca ad areḥmeɣ x tzeddiɣin nsen. Ad bnan tandint ɛawed x řxirbat nnes uca řeqṣar ad dd-idweř ɣar wemcan nnes iṣeḥḥ.

19 Ad zzaysen iffeɣ uqadi d tmijja n yewdan ifarrḥen. Necc ad ten arreɣ deg waṭṭas, nitni war dd-dikkwiřen drus, u Necc ad asen ggeɣ řɛezz u nitni war ttwaseḥqirin ɛad. ^■   20 Iḥenjiren nnes ad iřin am mecḥař uya uca tamesmunt nnes ad tiři zzat i wudem inu u Necc ad xeřfeɣ zeg inni i-ten iḥṣaren. 21 Amzemmar nnes ad zzayes yiři u Řḥakem nnes ad zzayes dd-iqqars u Necc ad t-i-dd-ssqarrbeɣ u Netta ad ayi dd-yades, maɣar man Wen iǧan d aḍman s wuř nnes maḥend ad ɣari dd-yades?’, ammu i iqqar SIDI.”

22 “Kenniw ad ayi tiřim d řgens inu d Necc ad iřiɣ d AREBBI nwem.”^■  

23 “Xzar, taḥaryaḍt n SIDI, iffeɣ-dd zzayes wesɛar, am tḥaryaḍt tezzebzib nni i ɣa ihwan x uzeǧif n iɛeffanen. ^■   24 Řḥaduq n weɣḍab n SIDI war dd-iddikkʷiř ca ař ɣa yiřin ixarriṣen n wuř nnes. Deg uneggar n wussan ad as tfehmem.”