1 Ina d awařen n tebrat i dd-issekk unabi Irmiya zi Urcalim i min iqqimen n imɣaren n řgens jar imenfiyyen, i ikehhanen d inabiyyen u i marra řgens nni tuɣa indeh Nabuxadnaṣṣar zi Urcalim ɣar Babil, 2 awarni i umi iffeɣ ujeǧid Yakunya d yemma as n ujeǧid, řa imsexxaren icenɛen, řa řḥukkam n Yahuda d Urcalim, řa řemɛuǧam uřa d imziřen zi Urcalim. ^■   3 Netta issekk tabrat-a s ufus n Alɛasa, mmis n Cafan, d Jamarya, mmis n Ḥilqiya, inni issekk Ṣidqiya, ajeǧid n Yahuda, ɣar Babil ɣar Nabuxadnaṣṣar, ajeǧid n Babil, tabrat tenna:

4 “Ammu i iqqar SIDI n řɛeskarat, AREBBI n Israil, i marra imenfiyyen nni dd-iwyeɣ zi Urcalim ɣar Babil:

5 Sgeɛɛdem tudrin uca zedɣem daysent, ẓẓum iḥwicen uca ccem řɣiǧet nsen, 6 awyem timɣarin uca jjem-dd iḥenjiren d tḥenjirin, awyem i iḥenjiren nwem timɣarin uca wcem tḥenjirin nwem i yeryazen, maḥend ad urwent iḥenjiren d tḥenjirin. Kenniw ad dinni temmarnim, war iǧi ad tdewřem ad tneqsem, 7 arzum řehna i tendint mani kenniw i ɣa nedheɣ u ttarem i man aya i SIDI, maɣar di řehna nnes i iǧa řehna nwem.

8 Maɣar ammu i iqqar SIDI n řɛeskarat, AREBBI n Israil: War ttejjim ad kenniw cemten inabiyyen d igezzanen nni iǧan di řwest nwem u war ttesřam ca ɣar ayt n bu-tirja i kenniw ittejjan ad tarjam, ^■   9 maɣar nitni ttnebban ixarriqen s Yisem inu. Necc war ten dd-sekkeɣ ca, ammu i iqqar SIDI.

10 Minzi ammu i iqqar SIDI: Xmi i ɣa qefřen sebɛin n iseggʷusa i Babil, xenni ad ɣarwem dd-arzfeɣ uca ad awem kemmřeɣ awař inu aṣebḥan umi kenniw dd-arriɣ ɣar temmurt-a. ^■  

11 Maɣar Necc ssneɣ man ixarriṣen i ɣari xawem, ammu i iqqar SIDI: ixarriṣen n řehna, war iǧi n řɣar, ḥima ad awem wceɣ imar d usitem.

12 Xenni kenniw ad ayi dd-třaɣam uca ad dd-tuyurem ad ɣari dd-teẓẓaǧem u Necc ad ɣarwem sřeɣ. ^■  

13 Ad xafi tarzum uca ad ayi tafem mařa kenniw tarzum xafi s wuř nwem iccur.

14 Ad zzaywem ttwafeɣ, ammu i iqqar SIDI, uca ad ssenqeřbeɣ tameḥbast nwem uca ad kenniw ssmuneɣ zi marra řegnus u zi marra imucan mani xawem uẓẓřeɣ, ammu i iqqar SIDI, u Necc ad kenniw dd-arreɣ ɣar wemcan i zi kenniw nedheɣ di lmenfa. ^■  

15 Minzi tennam: ‘SIDI issnekkar aneɣ-dd inabiyyen di Babil!’,

16 x uya, ammu i iqqar SIDI x ujeǧid, wenni iqqimen x řɛarc n Dawud, u x marra řgens i izeddɣen di tendint-a, aytmatwem inni war akidwem yuyuren di lmenfa,

17 ammu i iqqar SIDI n řɛeskarat: Xzar, Necc ad ssekkeɣ jar asen ssif d řaẓ d ṭṭaɛun uca ad ten jjeɣ am tazart ixsaren, tenni war iḥřin maḥend ad zzayes ccen. ^■  

18 Necc ad ten ḍfareɣ s ssif d řaẓ d ṭṭaɛun u Necc ad ten arreɣ ad ttwaɛarrnen ssa d ssa s ufus n marra tigeldiwin n ddunect, ad iřin i nneɛřet d řɛurret d tseḍḥac uřa i řḥegra jar marra řegnus mani ten i ɣa ssuffɣeɣ. ^■  

19 minzi nitni war sřin ɣar wawařen inu, ammu i iqqar SIDI, umi ɣarsen dd-ssekkeɣ imsexxaren inu, inabiyyen. Ɛad zeg umezwaru ssekkeɣ ten, maca kenniw war tesřim ca, ammu i iqqar SIDI.

20 Kenniw maca, sřem i wawař n SIDI, marra kenniw inni ittwanedhen di tmeḥbast, inni ssekkeɣ zi Urcalim ɣar Babil.

21 Ammu i iqqar SIDI n řɛeskarat, AREBBI n Israil, x Axab, mmis n Qulaya, u x Ṣidqiya, mmis n Maɛasiya, inni d awem ittnebban deg Yisem inu s ixarriqen: Xzar, Necc ad ten ggeɣ deg ufus n Nabuxadraṣṣar, ajeǧid n Babil, u netta ad ten ineɣ zzat i tiṭṭawin nwem. 22 Marra ayt n lmenfa zi Yahuda nni iǧan di Babil ad zzaysen kksen ict n nneɛřet, ad inin: ‘SIDI ad cek yegg amecnaw Ṣidqiya d Aḥab, inni issecmeḍ ujeǧid n Babil s tmessi!’, 23 minzi nitni ggin ict n tubbuheřya di Israil, znan ak-d temɣarin n wi ten yudsen u barrḥen s Yisem inu awařen n ixarriqen i tuɣa war d asen nniɣ. Necc d wenni issnen u wenni icehden x man aya, ammu i iqqar SIDI.”

24 I Cmaɛya zi Naḥlam, ittxeṣṣa ad kides tessiwřed ad as tinid ammu:

25 “Ammu i iqqar SIDI n řɛeskarat, AREBBI n Israil, iqqar ‘Minzi s isem nnek i-dd-tessekked tibratin i marra řgens di Urcalim u i ukehhan Ṣafanya, mmis n Maɛasiya, u i marra ikehhanen, yura daysen: ^□  

26 SIDI igga cek d akehhan deg wemcan n ukehhan Yahuyadaɛ maḥend ad din iřin imeḥdayen di Taddart n SIDI x kuř ijj ubuhaři nni itteggen ixef nnes d anabi. Ad t teqqned x ukeccuḍ d řgid x yiri nnes. ^■   27 Xenni řexxu, mayemmi war tɛaqbed Irmiya zi Ɛanatut, wenni xawem ittarran ixef nnes d anabi? 28 Maɣar s uyenni issekk-dd ict n tebrat i neccin ɣar Babil mani iqqar: Aṭṭas i ɣa iqqimen! Sbeddem tudrin u zedɣem daysent, ẓẓum iḥwicen u ad tawyem řiqqi i řɣiǧet nsen!

29 Tuɣa iqqar ukehhan Ṣafanya tabrat-a deg imezzuɣen n unabi Irmiya.

30 Xenni yusa-dd wawař n SIDI ɣar Irmiya, inna:

31 “Sqad areqqas-a i marra imenfiyyen maḥend ad tinid: ‘Ammu i iqqar SIDI x Cimɛiya zi Naḥlam: Minzi Cmaɛya tuɣa ittnabb awem, waxxa Necc war t-i-dd ssekkeɣ, uca yarra kenniw ad tᵉttiqqem deg ixarriqen, ^■   32 s uyenni ammu i iqqar SIDI: Xzar, Necc ad xeřfeɣ i Cmaɛya zi Naḥlam, u zi tarwa nnes. Uřa d ijjen zeg inni nnes war ittɣimi izdeɣ di řwest n řgens-a u netta war iẓarr řxir i ɣa ggeɣ i řgens inu, ammu i iqqar SIDI, minzi s řhard nnes igga ad ḥeyyden x SIDI.’ ” ^■