1 Deg useggʷas nni, deg umezwaru n tgelda n ujeǧid Ṣidqiya, ajeǧid n Yahuda, deg useggʷas wiss arebɛa, deg uyur wiss xemsa, issiweř akidi Ḥananya, mmis n Ɛazur, anabi zi Jibɛun, di Taddart n SIDI zzat i tiṭṭawin n ikehhanen d řgens imun, inna: 2 “Ammu i iqqar SIDI n řɛeskarat, AREBBI n Israil, iqqar: ‘Necc ad arẓeɣ azayřu n ujeǧid n Babil. 3 Ɛad tnayen n iseggʷusa xenni Necc ad dd-arreɣ ɣar temmurt-a marra řeqcuɛ n Taddart n SIDI, inni iksi Nabuxadnaṣṣar, ajeǧid n Babil, zeg wemcan-a uca yiwy-i-ten ɣar Babil. ^■   4 Necc ad ssɛeqbeɣ Yakunya, mmis n Yahuyaqim, d marra imenfiyyen zi Yahuda i dd-yiwḍen ɣar Babil, ɣar wemcan-a, ammu i iqqar SIDI, minzi Necc ad arẓeɣ azayřu n ujeǧid n Babil.’ ”

5 Xenni inna unabi Irmiya i unabi Ḥananya, zzat i tiṭṭawin n ikehhanen u zzat i tiṭṭawin n řgens imun, inni ibedden di Taddart n SIDI, 6 inna Irmiya: “Amin, ammu i ɣa yegg SIDI! Iři ad isseqfeř SIDI awařen nnek i tnebbid ařami i ɣa yarr řeqcuɛ n Taddart n SIDI d marra inni ittwanedhen di tmeḥbast, zi Babil ɣar wemcan-a! 7 Seř maca i wawař-a i zi ssawařeɣ deg imezzuɣen nwem u deg imezzuɣen n řgens imun: 8 ‘Inabiyyen nni tuɣa din iǧan qbeř inu d kenniw zeg wecḥař uya, nebban nitni ḍidd i waṭṭas n temmura u ḍidd i waṭṭas n tgelditin, x garra, x iceřwawen u x ṭṭaɛun. 9 Anabi nni ittnabben x sřam, mařa awař n unabi nni ad dd-iffeɣ, xenni ad yiři ittwassen aqa SIDI issekk-dd anabi nni d tidett.’ ”

10 Xenni iksi unabi Ḥananya azayřu n yiri n unabi Irmiya uca yarẓ i-t.

11 Xas uca issiweř Ḥananya zzat i tiṭṭawin n marra řgens, inna: “Ammu i iqqar SIDI: ‘Qbeř ma ad ɛdun tnayen n iseggʷusa kemmřen ad arẓeɣ azayřu n Nabuxadnaṣṣar, ajeǧid n Babil, i iǧan x yiřawen n marra řegnus.” Uca Irmiya yuyur abrid nnes.

12 Xenni yusa-dd wawař n SIDI ɣar Irmiya awarni i umi yarẓa unabi Ḥananya azayřu x yiřawen n unabi Irmiya uca inna:

13 “Uyur uca siweř ak-d Ḥananya, ini: ‘Ammu i iqqar SIDI: Izayřuten n ukeccuḍ tarẓid ten uca teggid izayřuten n wuzzař deg wemcan nsen.’

14 Maɣar ammu i iqqar SIDI n řɛeskarat, AREBBI n Israil: ‘Ijj n uzayřu n wuzzař ssarseɣ t x yiřawen n marra řegnus, maḥend ad sexxaren i Nabuxadnaṣṣar, ajeǧid n Babil. Nitni ad as sexxaren. Uřa d řmař wciɣ ten deg ufus nnes.’ ” ^■  

15 Xas uca inna unabi Irmiya i unabi Ḥananya: “Seř, Ḥananya, SIDI war cek dd issekk ca u cek tɣarred řgens-a ad ittceř x ixarriqen.

16 S uyenni, ammu i iqqar SIDI, xzar, Necc ad cek nḍareɣ. Ɛad deg useggʷas-a ad temmted minzi tessiwřed x uḥeyyed n SIDI.’ ” ^■  

17 Immut unabi Ḥananya deg useggʷas nni, deg uyur wiss sebɛa.