31
1 “Di řweqt nni, ammu i iqqar SIDI, ad iřiɣ d AREBBI i marra řaǧat n Israil u nitni ad iřin d řgens inu.”2 “Ammu i iqqar SIDI: ‘Řgens n yinni inejmen zi ssif, yufa arḍa di řexřa. Ejj ayi xenni ad uyureɣ maḥend ad t ssareyyḥeɣ, Israil.’ ” ... 3 “Zi řaggʷaj iban ayi-dd SIDI!” ... “Necc tuɣa ttexseɣ cem s tayri n řebda, s uya cem dd-jebdeɣ s tmexsiwt icewwaren. 4 Necc ad cem bniɣ ɛawed, ad tᵉttwabnid ɛawed, a cem Israil taɛzarect. Cem ad tzewwqed ixef nnem ɛawed s ibendiren uca ad teffɣed s ccḍiḥ s nnubtat n yinni ifarrḥen. ■ 5 Ad tegged imarjaɛen n uḍir x idurar n Samarya: inni itteẓẓun ad ten ẓẓun u řɣiǧet ad zzayes arren meẓri. ■ 6 Maɣar ad dd-yas wass nni di ad řaɣan iɛessasen x idurar n Ifrayim: ‘Kkarem, ejj aneɣ ad ngeɛɛed ɣar Ṣihyun, ɣar SIDI, AREBBI nneɣ!’ ” ■ 7 “Maɣar ammu i iqqar SIDI: ‘Ɣennjem s řefraḥet i Yaɛqub uca sřiwřiwem i uzeǧif n řegnus, barrḥem, semɣarem t, inim: A SIDI, senjem řgens nnek, min iqqimen zi Israil. 8 Xzar, Necc ad ten arreɣ ad dd-asen zi temmurt n ccamal u Necc ad ten dd-ssmuneɣ zeg ineggura n temmurt. Aqa din jar asen idarɣařen d ineɛḍaben, tinni iǧan s ddeyset d tinni ittarwen. Ad ɛeqben ɣar da s ijj n wegraw n řgens ameqqran. ■ 9 Ad dd-asen ttrun, ad ten gewwdeɣ am kessin s řmeɛruf, ad ten ssnedheɣ ɣar teɣzarin n waman, x ijj n webrid iseggmen mani war ttneqriḍen, maɣar Necc d Babas i Israil u Ifrayim d mmi amenzu.’ ” ■
10 “Sřem i wawař n SIDI, a kenniw řegnus, barrḥem t x tegzirin nni iggʷejen aṭṭas, inim: ‘D wenni tuɣa izuzzaren Israil, ad t issmun ɛawed u ad t yarwes am mammec yarekkwes umeksaw taḥimart nnes.
11 Maɣar SIDI aqa ifdi Yaɛqub uca ifekk i-t zeg ufus n wenni xas ijehden. □ ■
12 Nitni ad dd-asen u ad sřiwřewen x řgeɛɛdet n Ṣihyun uca ad azzřen ɣar řxar n SIDI, ɣar imendi, ɣar binu n jdid, ɣar zzect, ɣar izmaren u ɣar ifunasen d tfunasin. Řeɛmar nsen ad yiři am řeɛraṣi ittwassun uca ɛemmarṣ ɛad ad iřin ceḍnen. ■
13 Xenni ad tfarḥ teɛzarect ɣar ccḍiḥ s nnubtat, uřa d iḥudriyyen d iwessura, nitni marra munen, minzi Necc ad arreɣ acḍan nsen d arcuq, ad ten ɛezziɣ, ad ten ssfarḥeɣ awarni wecḍan nsen.
14 Necc ad ssjiwneɣ řeɛmar n ikehhanen s tadunt n tɣarṣa uca ad idweř řgens inu ijjiwen s řxar inu, ammu i iqqar SIDI.’ ”
15 “Ammu i iqqar SIDI: ‘Tᵉttwaseř ict n tmijja di Rama, aweɛɛed d imeṭṭawen imarzagen: Raḥil tᵉttru x tarwa nnes u war tᵉttexs ad tᵉttwaɛezza x iḥenjiren nnes, maɣar nitni war ǧin ɛad.’ ■
16 Ammu i iqqar SIDI: ‘Ṭṭef tmijja nnem i unixses u tiṭṭawin nnem i imeṭṭawen, maɣar aqa teǧa řmunet i warber nnem, ammu i iqqar SIDI, maɣar nitni ad dd-ɛeqben zi temmurt n řeɛdu.
17 Aqa din řayas i tarwa nnem, ammu i iqqar SIDI, maɣar iḥenjiren nnem ad dd-dewřen ɣar temmurt nsen.’ ”
18 “Necc sřiɣ mliḥ mammec dd-ittcetca Ifrayim, inna: ‘Cek tarebbid ayi u necc ttwarebbiɣ am ijj n uyenduz war ittḍawaɛen. Arr ayi, deɣya necc xseɣ ad dd-dewřeɣ, maɣar Cek d SIDI, AREBBI inu. ■
19 Maɣar awarni řami dd-dewřeɣ, tubeɣ, u awarni řami dewřeɣ ssneɣ, wtiɣ ixef inu x tmeṣṣaḍin. Necc seḍḥiɣ, nfeḍḥeɣ, maɣar necc arbuɣ řefḍiḥet n temẓi inu.’ ■ 20 ‘Ma war iǧi Ifrayim d mmi iɣřan ɣari d aḥenjir inu iɛizzen? Maɣar waxxa aṭṭas n twařawin ttzawareɣ t, ttidareɣ t maca. S uyenni iccat jjuf inu i netta. Nican Necc ad xas arreḥmeɣ!’, ammu i iqqar SIDI.”
21 “Sbedd iquǧay i wescan n webrid, sars iẓra n jjurrat n webrid, egg uř nnem x webrid iseggmen, x webrid nni di teggured. Dweř, a taɛzarect Israil, dweř ɣar tneddam nnem. 22 Ař meřmi ɛad i ɣa texsed ad ɣares t-i-dd tarr, a cem, yeǧis ikfaren? Maɣar SIDI igga ict n řḥajjet tamaynut di temmurt: ‘Tamɣart ad tᵉtthilla marra i weryaz.’ ”
23 “Ammu i iqqar SIDI n řɛeskarat, AREBBI n Israil: ‘Ad ssiwřen awař-a ɛawed di temmurt n Yahuda u di tneddam nnes xmi i ɣa ssenqeřbeɣ tameḥbast nsen: Ad cem ibarek SIDI, a Tazeddiɣt n tsegda, aya Adrar n tqeddast! ■ 24 Yahuda d marra tineddam nnes ad dayes zeddɣent jmiɛ, ifeǧaḥen d yenni ittetliɛen ak-d tḥimart. 25 Maɣar Necc ssessuɣ řeɛmar nni yuḥřen uca ssjiwneɣ kuř řeɛmar nni iḥeznen.’ ”
26 Awarni aya faqeɣ-dd uca uciɣ mecḥar yiziḍ yiḍes inu.
27 “Xzar, ad dd-asen wussan, ammu i iqqar SIDI, ad zarɛeɣ taddart n Israil d taddart n Yahuda s zzarriɛet n iwdan d řmař. 28 Am mammec xasen ɛesseɣ ḥima ad qeřɛeɣ u ad hedmeɣ u ad arẓeɣ u ad areddǧeɣ u ad ggeɣ řɣar, ammu i xasen i ɣa ɛesseɣ ḥima ad ssbeddeɣ u ḥima ad ẓẓuɣ, ammu i iqqar SIDI. 29 Deg wussan nni war ttɣimin ad inin ɛad: ‘Ibabaten ccin aḍiř asemmam uca dewřent teɣmas n iḥenjiren ḥfant.’ ■ 30 Maca kuř ijj ad immet zi ssibbet n řmuɛṣiyyet n yixef nnes. Zi mkuř bnadem nni i ɣa iccen aḍir asemmam, ad as dewřent teɣmas ḥfant.”
31 “Xzar, ad dd-asen wussan, ammu i iqqar SIDI, nni di ɣa ggeɣ ijj n Řɛahd n Jdid ak-d taddart n Israil u ak-d taddart n Yahuda, ■ 32 war iǧi am mammec tuɣa Řɛahd i ggiɣ ak-d ibabaten nsen umi ten ṭṭfeɣ zeg ufus, ḥima ad ten nedheɣ zi temmurt n Miṣra, Řɛahd inu nni arẓin, waxxa zeɛma Necc dewřeɣ d Aryaz nsen, ammu i iqqar SIDI. 33 Maɣar wa ad yiři d Řɛahd nni i ɣa ggeɣ awarni i wussan nni ak-d taddart n Israil, ammu i iqqar SIDI: Necc ad ggeɣ Ccariɛa inu deg wuř nsen uca ad tt ariɣ deg wuř nsen. Necc ad iřiɣ d SIDI i nitni u nitni ad iřin d řgens i Necc. ■ 34 Uřa d ijjen war isseřmid ɛad amqarreb nnes niɣ umas, am qqaren: Ssen SIDI!, maɣar nitni marra ad ayi ssnen, am umeẓyan am umeqqran jar asen, ammu i iqqar SIDI, maɣar Necc ad asen ɣfareɣ i řmuɛṣiyyet nsen u war ttidareɣ ɛad ddnub nsen.’ ” ■
35 “Ammu i iqqar SIDI, wenni iggin tfuct i tfawt deg wass, wenni yumuren taziri d itran i tfawt di ǧiřet, wenni issehwařen řebḥar ařami dd-duqquzent řemwaj nnes, aqa SIDI n řɛeskarat d Isem nnes: ■ 36 ‘Mařa lfarayiḍ-a ad dd-wḍant zeg wudem inu, iqqar SIDI, xenni ad ibedd uřa d zzariɛet n Israil ad tiři d ijj n řgens zzat i wudem inu, marra ussan.’ 37 Ammu i iqqar SIDI: ‘Mařa ttwaɛbaren ijenwan sennej u mařa zemmaren ad arzun sadu dsusa n temmurt, xenni uřa d Necc ad nḍareɣ zzariɛet n Israil zi ssibbet n marra min ggin, ammu i iqqar SIDI.’ ”
38 “Xzar, ammu i iqqar SIDI, ad dd-asen wussan nni di ɣa bnan tandint ɛawed i SIDI, zi Ṣṣumɛet n Ḥananiyil ař Tewwart n Teɣmart. 39 uca ad iffeɣ ufiřu n řeqyas ɛad ktar, nican ɣar zzat ɣar tewrirt n Jarib uca xenni ad imeyyeř ɣar Juɛa 40 u marra taysart s řxecbat immuten d yiɣɣeḍ d marra iyyaren ař teɣzart n Qidrun, ař teɣmart n Tewwart n Yeysan ɣar ccarq, ad tiři d tamqeddast i SIDI. Ɛemmarṣ ad tᵉttwaqřeɛ u ad tᵉttwahdem uřa d ict n řḥajjet ɛad i řebda.”