1 Awař nni dd-yusin ɣar Irmiya x marra řgens n Yahuda, deg usegʷass wiss arebɛa n Yahuyaqim, mmis n Yuciya, ajeǧid n Yahuda. Tuɣa-t d aseggʷas amezwaru n Nabuxadraṣṣar, ajeǧid n Babil. 2 Inna unabi Irmiya awař-a i marra řgens n Yahuda u i marra imezdaɣ n Urcalim, inna: 3 “Zeg useggʷas wiss třeṭṭac n Yuciya, mmis n Amun, ajeǧid n Yahuda, ɣares ař ass-a, wa d aseggʷas wiss třata u-ɛicrin, yusa-dd ɣari wawař n SIDI u necc tuɣa ssawařeɣ akidwem, wah zeg umezwaru tuɣa necc ssawařeɣ akidwem, maca kenniw war tesřim ca. 4 SIDI issekk-dd ɛawed marra imsexxaren nnes, inabiyyen, zeg umezwaru issekk i-ten-dd, maca kenniw war tesřim u war tewcim ca amezzuɣ nwem ḥima ad tesřem. ^■   5 Nitni nnan: ‘Dewřem-dd, kuř ijj zeg webrid nnes aɛeffan u zi tmegga nwem tiɛeffanin uca zedɣem di temmurt nni d awem iwca SIDI u i ibabaten nwem zi řebda i řebda qaɛ. ^■   6 War ttraddafem irebbiten nneɣni ḥima ad asen tsexxarem u ad asen taḍarem. War d ayi seɛɛarem s tmegga n ifassen nwem maḥend war d awem tteggeɣ řɣar.’ 7 Maca kenniw war ɣari tesřim ca, ammu i iqqar SIDI, ařami d ayi tesɛarem s tmegga n ifassen nwem, i txessart nwem.”

8 “S uyenni, ammu i iqqar SIDI n řɛeskarat: ‘Minzi kenniw war dd-tesřim ca ɣar wawařen inu, 9 xzar, s uya i ɣa dd-ssekkeɣ ijj n ureqqas uca ad awyeɣ marra tiqebbař n řegnus zi ccamal, ammu i iqqar SIDI, uřa d Nabuxadraṣṣar, ajeǧid n Babil, amsexxar inu. Necc ad tent ssiwḍeɣ x temmurt-a u x imezdaɣ nnes u x marra řegnus i d as dd-innḍen uca ad ten ḥarrmeɣ i uteḥḥi. Necc ad ten ggeɣ d ict n řqecɛet n unexřiɛ d tiseḍḥac uřa d uxarreb i řebda. ^■  

10 Necc ad zzaysen kkseɣ řḥess n řefraḥet d řḥess n warcaq, tmijja n muřay d tmijja n tesřit, ddriz n yeẓra n tsirt uřa d tfawt n řefnar. ^■  

11 Tammurt-a marra ad tedweř d řxirbet uřa d ijj n umedya n unexřiɛ, u řegnus-a ad sexxaren ajeǧid n Babil, sebɛin n iseggʷusa.’ ”

12 “Xmi i ɣa ɛdun sebɛin n iseggʷusa nni, xenni ad xeřfeɣ zeg ujeǧid n Babil d řgens nni x řmuɛṣiyyet nsen, ammu i iqqar SIDI, uřa x temmurt n Ikaldaniyyen. Necc ad tt arreɣ d řxirbat i řebda. ^■  

13 Necc ad dd-ssehwiɣ x temmurt nni marra awařen inu nni xas nniɣ, marra min yurin deg wedlis ittwannḍen, min inebba Irmiya x marra řegnus.

14 Maɣar aṭṭas n řegnus d ijeǧiden imeqqranen ad ten jjen ad dd-ɛebden. Necc ad zzaysen xeřfeɣ ɛlaḥsab timegga nsen u ɛlaḥsab řxedmet n ifassen nsen.” ^■  

15 “Maɣar ammu i d ayi inna SIDI, AREBBI n Israil: ‘Ksi řkas-a n binu n wesɛar zeg ufus inu u ewc i-t i marra řegnus mani cek i ɣa ssekkeɣ, ḥima ad swen, ^■  

16 maḥend ad swen, ad sscaren, ad dewřen ttbuhřuyen zi ssibbet n ssif nni dd ɣa ssekkeɣ jar asen.’ ”

17 Awarni i uya ksiɣ řkas zeg ufus n SIDI, wciɣ t i marra řegnus, mani i d ayi issekk SIDI:

18 i Urcalim d tneddam n Yahuda, i ijeǧiden nnes d řḥukkam nnes, ḥima ad ten arreɣ d řxirbet, d ijj n unexřiɛ d tiseḍḥac uřa d nneɛřet, am teǧa ass-a,

19 i Fiřɛun, ajeǧid n Miṣra, i umsexxaren nnes, řḥukkam nnes u i marra řgens nnes, ^■  

20 i ubarru n ɛřam kuř ibarraniyyen u i ijeǧiden n temmurt n Ɛuṣ u i marra ijeǧiden n temmurt n Ifilisṭiniyyen, i Acqalun, Ɣazza, Ɛaqrun u i marra min iqqimen zi Acdud, ^■  

21 i Idum, Mu’ab d ayt n Ɛammun,^■  

22 i marra ijeǧiden n Ṣur, i marra ijeǧiden n Ṣidun u i ijeǧiden n tegzirin x ujemmaḍ n řebḥar, ^■  

23 i Dadan, Tayma, Buz d marra inni ittḥeffan acewwaf ɣar ṭṭrufa n tenyart d tmart, ^■  

24 i marra ijeǧiden n temmurt n Weɛraben u i marra ijeǧiden n ɛřam kuř ibarraniyyen nni izeddɣen di řexřa, ^■  

25 i marra ijeǧiden n Zimri, u i marra ijeǧiden n Ɛilam u i marra ijeǧiden n Maday, ^■  

26 uřa i marra ijeǧiden n ccamal, inni dd-yudsen d yenni iggʷejen, ijjen awarni i wenneɣni, i marra tigeldiwin n ddunect i iǧan x wudem n temmurt, uca awarni asen marra ad isu ujeǧid n Cicak.

27 “Ad asen tinid: ‘Ammu i iqqar SIDI n řɛeskarat, AREBBI n Israil: Swem, scarem u ɛuqqem, wḍam u war tekkarem ɛad zzat i ssif i dd ɣa ssekkeɣ jar awem.’ 28 Xmi i ɣa agin ad ksin řkas zeg ufus nnek maḥend ad t swen, xenni ini asen: ‘Ammu i iqqar SIDI n řɛeskarat: Ad teswem s uɣiř! 29 Maɣar xzar, di tendint i x ittwabarreḥ s Yisem inu, ad bdiɣ s řɣar. Ma ad daywem ggen am tteggen ak-d imezdagen? Kenniw war ttwaḥesben d imezdagen, maɣar ad dd-řaɣiɣ i ssif ḍidd i marra imezdaɣ n temmurt, ammu i iqqar SIDI n řɛeskarat.’ ” ^■  

30 “Ad xasen tnebbid marra awařen-a uca ad d asen tinid: ‘SIDI ad dd-izehhar zi sennej uca Netta ad dd-issgeɛɛed tmijja nnes zi Tzeddiɣt nnes Iqeddsen. Netta ad dd-izehhar x Tzeddiɣt nnes, ad isřiwřew am t tteggen inni yareffsen aḍiř, ḍidd i marra imezdaɣ n ddunect.^■   31 Ad dd-yas ijj n řḥess issnexřiɛen ař tma n temmurt, minzi SIDI ɣares ict n ddeɛwet ak-d řegnus. Netta ad iḥkem x bnadem am ikmeř, ad iɛarren marra iɛeffanen ɣar ssif, ammu i iqqar SIDI.’ ”

32 “Ammu i iqqar SIDI n řɛeskarat: ‘Xzar, ijj n řɣar tessuruf zi řgens ɣar řgens nneɣni, ict n tharyaḍt tewɛar tekkar-dd zi tmuwwa n temmurt. 33 Deg wass nni marra inni ittwasnuqqben s ssif ad iřin x ict n tma n temmurt ɣares ař tma nneɣni. War xasen ttrun, war ten jarrwen u war ten neṭṭřen. Ad dewřen d řeɣbar x wudem n temmurt.^■   34 Rum, kenniw imeksawen, sɣuyyem. Marrɣem deg iɣɣed, kenniw inni ɣar iǧa jjehd x tḥimriwin n wuǧi, maɣar yiweḍ-dd řḥař n tɣarṣt nwem, u Necc ad kenniw zuzzareɣ u kenniw ad tefruryem am ijj n uɣarraf iɣřa. ^■   35 War tneffeɛ tarewřa n imeksawen d wenjam n yinni ɣar iǧa jjehd x tḥimriwin n wuǧi. 36 Sḥessem mammec sɣuyyun imeksawen s jjehd, mammec ttrun inni ɣar iǧa jjehd x tḥimriwin n wuǧi, minzi SIDI ittareddeǧ ddmani nsen n tarewsa. 37 Maɣar ddmani n tarewsa yarsin ad dewřen ugnun zi ssibbet n řḥaduq n weɣḍab n SIDI. 38 Am weyrad ameẓyan ijja Netta adurri nnes, maɣar tammurt nsen tedweř d řxarbet s řḥaduq n ssif n wenni iḥeṣṣaren, s řḥaduq n weɣḍab nnes.’ ”