1 Deg umezwaru n tgelda n Yahuyaqim, mmis n Yuciya, ajeǧid n Yahuda, yusa-dd wawař-a zi SIDI, inna:

2 “Ammu i iqqar SIDI: ‘Bedd di řemraḥ n zzat n Taddart n SIDI uca ini marra awařen-a nni zi cek weṣṣiɣ maḥend ad zzaysen tessiwřed, i imezdaɣ n marra tineddam n Yahuda nni dd-yusin maḥend ad ẓẓaǧen di Taddart n SIDI. War tejji uřa d ijj n wawař war t teqqared. 3 Ad taɣ ad sřen, ad dd-dewřen, kuř ijj zeg webrid aɛeffan nnes, uca ad nedmeɣ x řɣar nni nwiɣ ad daysen t ggeɣ zi ssibbet n tuɛeffna n tmegga nsen.’^■  

4 Ini asen: ‘Ammu i iqqar SIDI: Mařa kenniw war tᵉttexsem ad ɣari dd-tesřem maḥend ad tuyurem am Ccariɛa inu nni d awem ggiɣ deg ufus, 5 u maḥend ad tesřem ɣar wawařen n imsexxaren inu, inabiyyen nni d awem dd-ssekkeɣ zeg umezwaru, waxxa kenniw war d asen tesřim, ^■   6 xenni ad ggeɣ ak-d Taddart-a am ggiɣ ak-d Cilu, uca ad arreɣ tandint d nneɛřet i marra řegnus di temmurt.’ ” ^■  

7 Ikehhanen d inabiyyen d marra řgens sřin mammec issiweř Irmiya awařen-a di Taddart n SIDI.

8 Umi ikemmeř Irmiya awař i marra řgens x marra min tuɣa iweṣṣa SIDI, ṭṭfen t ikehhanen d inabiyyen d marra řgens uca nnan: “Ittxiṣṣa ad temmted! 9 Mayemmi tnebbid s Yisem n SIDI, tennid: ‘Taddart-a ad tedweř am Cilu u tandint-a ad tᵉttwareddeǧ ařami war dayes izeddeɣ uřa d ijjen?’ ” Marra řgens imun x Irmiya di Taddart n SIDI.

10 Umi sřin řḥukkam n Yahuda awařen-a, ffɣen-dd zi taddart n ujeǧid geɛɛden ɣar Taddart n SIDI, qqimen ɣar wadaf n Tewwart Tamaynut n Taddart n SIDI. ^□  

11 Xenni ssiwřen ikehhanen d inabiyyen ak-d řḥukkam u ak-d marra řgens, nnan: “Aryaz-a isdaheǧ řmewt, am mammec tt tesřam s imezzuɣen nwem.”

12 Xenni issiweř Irmiya ak-d marra řḥukkam u ak-d marra řgens, inna: “SIDI issekk ayi-dd ḥima ad nebbiɣ marra awařen i tesřim ḍidd i Taddart-a u ḍidd i tendint-a.

13 Xenni řexxu, ɛedřem ibriden nwem d tmegga nwem uca ṣřem i tmijja n SIDI, AREBBI nwem, xenni ad indem SIDI zi marra řɣar i xawem inna. ^■  

14 Necc maca, xzar, aqa ayi deg ufus nwem, ggem zzayi mammec kenniw issuffuɣ d aṣebḥan u nican di tiṭṭawin nwem.

15 Snem maca nican, mařa kenniw tenɣim ayi, ad dd-tawyem idammen imezdagen x yixef nwem u x tendint-a u x imezdaɣ nnes, minzi s tidett, SIDI issekk ayi-dd ɣarwem maḥend ad awem iniɣ marra awařen-a deg imezzuɣen nwem.”

16 Řḥukkam d marra řgens nnan i ikehhanen u i inabiyyen: “Aryaz-a war issdiḥeǧ řmewt, maɣar netta issawař akidneɣ s Yisem n SIDI, AREBBI nneɣ.”

17 Ca n iryazen zeg imɣaren n temmurt kkaren, bedden. Nitni ssiwřen ɣar marra agraw n řgens, nnan:

18 “Mixa zi Muracit, tuɣa ittnabba deg wussan n Ḥizqiya, ajeǧid n Yahuda, uca issiweř ɣar marra řgens n Yahuda, inna: ‘Ammu i iqqar SIDI n řɛeskarat: Ṣihyun ad tᵉttwacarz am ijj n yeyyar u tandint n Urcalim ad tedweř d řxarbet u adrar n Taddart-a ad idweř d řegɛudi mani i ɣa wehhben tiwhibin deg wezɣar.’ ^□  ■  

19 Ma inɣa i-t Ḥizqiya, ajeǧid n Yahuda, d marra Yahuda? Ma war iggʷid netta SIDI u iksi s řmeɛruf i SIDI ařami indem x řɣar i xasen iqqar? Neccin ggur ad negg ijj n řɛib d ameqqran i yixef nneɣ.” ^□  

20 Tuɣa din ɛad ijj n weryaz nneɣni wenni tuɣa ittnebban s Yisem n SIDI, Uriya, mmis n Cmaɛiya, zi Qaryat-Yaɛarim. Netta inebba ḍidd i tendint-a u ḍidd i temmurt-a ɛlaḥsab marra awařen nni inna Irmiya. 21 Xmi isřa ujeǧid Yahuyaqim jmiɛ ak-d marra řḥukkam awařen nnes, ixs ujeǧid ad t ineɣ. Isřa Uriya aya, iggʷed, yarweř u yiweḍ ɣar Miṣra. 22 Ajeǧid Yahuyaqim maca issekk iryazen ɣar Miṣra: Ilnatan, mmis n Ɛakbur ak-d ca n iryazen. Issekk i-ten ɣar Miṣra. 23 Nitni iwyen-dd Uriya zi Miṣra uca nedhen t ɣar ujeǧid Yahuyaqim u wanita inɣa i-t s ssif. Netta inḍar řxecbet nnes deg imeḍřan n tarwa n řgens.

24 Maca afus n Axiqam, mmis n Cafan, tuɣa-t ak-d Irmiya maḥend war t tticen deg ifassen n řgens maḥend ad t nɣen.