1 SIDI ijja ayi ad ẓareɣ man aya. Xzar, ttwassarsent tnayen n tsuǧatin n tazart qibač i Zzawect Tameqqrant n SIDI awarni i umi tuɣa Nabuxadraṣṣar, ajeǧid n Babil, indeh Yakunya, mmis n Yahuyaqim, ajeǧid n Yahuda, d řḥukkam n Yahuda ak-d iḥrayfiyyen d yemziřen zi Urcalim di lmenfa ɣar Babil. ^■   2 Deg ict n tsuǧet tuɣa din tazart iṣebḥen, amecnaw řbacur. Di tsuǧet nneɣnit tuɣa din tazart war teḥri aṭṭas, zeɛma war teḥri ařami war izemmar ad tᵉttwacc. 3 Inna ayi SIDI: “Min tᵉttwařid cek, Irmiya?” Necc nniɣ: “Tazart. Tazart iṣebḥen teṣbeḥ aṭṭas, uca tenni war iḥřin aṭṭas, war teḥři ařami war tᵉttwicci.”

4 Xenni yusa-dd ɣari wawař n SIDI, inna:

5 “Ammu i iqqar SIDI, AREBBI n Israil: ‘Am tazart iṣebḥen ammu i ɣa ḥesbeɣ ṣebḥen inni ittwanedhen di tmeḥbast zi Yahuda, inni x uẓẓřeɣ zeg wemcan-a ɣar temmurt n Ikaldaniyyen. 6 Necc ad xasen ssarseɣ tiṭṭawin inu s arḍa uca ad ten arreɣ ad ɛeqben ɣar temmurt-a. Necc ad ten ssbeddeɣ, war iǧi ad ten hedmeɣ, ad ten ẓẓuɣ, war iǧi ad ten qeřɛeɣ. 7 Necc ad asen wceɣ ijj n wuř maḥend ad ayi ssnen, belli aqa Necc d SIDI. Nitni ad iřin d řgens inu u Necc ad iřiɣ d AREBBI nsen, maɣar nitni ad ɣari dd-dewřen s wuř nsen imun.’ ” ^■  

8 “Am tazart war iḥřin, tenni war teḥři aṭṭas ařami war tᵉttwicci, iqqar SIDI, ammu i ɣa arreɣ Ṣidqiya, ajeǧid n Yahuda, d řḥukkam nnes d min iqqimen zi Urcalim d yenni izeddɣen di temmurt n Miṣra. ^■   9 Necc ad ten arreɣ ad ttwaɛarrnen ssa d ssa jar marra tigeldiwin n temmurt, ad iřin d řḥegra d ijj n umedya d ict n řqecɛet n ustehzi d ict n nneɛřet di marra imucan mani xasen i ɣa yaẓẓřeɣ. ^■  

10 Necc ad ssekkeɣ jar asen ssif d řaẓ d ṭṭaɛun ɣares ař dd-ttwakksen marra zi temmurt i wciɣ i nitni u i ibabaten nsen.”