1 “Uct x imeksawen i ineqqen u zuzzaran uǧi n ddmani inu n tarewsa, ammu i iqqar SIDI. ^□  ■   2 S uyenni ammu i iqqar SIDI, AREBBI n Israil, x imeksawen nni yarekkwsen řgens inu: Kenniw tzuzzarem uǧi inu uca tuẓẓřem xasen. Kenniw war ten teḥḍim. Xzar, Necc ad xeřfeɣ zi tuɛeffna d tmegga nwem, ammu i iqqar SIDI. 3 Necc ad ssmuneɣ min iqqimen n wuǧi inu zi marra timmura, mani xasen uẓẓřeɣ. Necc ad ten arreɣ ɣar řkurit nsen, ad arwent, ad mmarnint. 4 Necc ad asent ggeɣ imeksawen nni tent i ɣa yarewsen. Nitni war tteggʷdent ɛad u war ttnexřiɛent u war ttweddirint, ammu i iqqar SIDI.” ^■  

5 “Xzar, ad dd-asen wussan, ammu i iqqar SIDI, aqa Necc ad ssekkareɣ i Dawud ijj n UƔEDDU n tsegda. Netta ad iḥkem am Ujeǧid, ad ifřeḥ uca ad igg řḥeqq d tsegda di temmurt. ^■   6 Deg wussan nnes ad ittwassenjem Yahuda uca Israil ad izdeɣ di řaman. Wa ad yiři d Isem i zi d as i ɣa řaɣan: SIDI, Tasegda nneɣ.” ^■  

7 “S uyenni, xzar, ad dd-asen wussan, ammu i iqqar SIDI, war qqaren ɛad: ‘S tidett am iddar SIDI nni dd-issuffɣen ayt n Israil zi Miṣra!’, ^■   8 maca: ‘S tidett am iddar SIDI nni dd-isgeɛɛden zzariɛet n taddart n Israil, wenni ten dd-yarrin zi temmurt n ccamal u zi marra timmura manis xasen uẓẓřeɣ. Nitni ad zedɣen di temmurt nsen.’ ”

9 X inabiyyen. “Uř inu ittwarẓ di daxeř inu, marra ixsan inu ttarjijin. Necc dewřeɣ am ijj n umescur, am weryaz nni yarni binu, zi ssibbet n SIDI, u zi ssibbet n wawařen nnes iqeddsen.

10 Maɣar tammurt teccur s yenni izennan, maɣar tammurt tecḍen zi ssibbet n nneɛřet, ddmani n heddu uẓɣent. Mani xsen ad awḍen aqa-t d aɛeffan, uřa d jjehd nsen war iǧi ca nican. ^■  

11 Maɣar am unabi am ukehhan ttwafesden, ɛad di Taddart inu ttafeɣ tuɛeffna nsen, ammu i iqqar SIDI. ^■  

12 S uyenni ad dd-asen idweř webrid nsen am ijj n řewḍa itteḥruǧuḍ di taǧest. Ad ttwaɛarrnen u nitni ad zzayes dd-wḍan, maɣar ad xasen dd-ssehwiɣ ict n tecti taɛeffant deg useggʷas i zzaysen i ɣa xeřfeɣ, ammu i iqqar SIDI.” ^■  

13 “Aqa Necc ẓriɣ tubbuheřya ɣar inabiyyen n Samarya: nitni tuɣa ttnabben s Baɛl uca ttɣarran řgens inu.

14 Ɣar inabiyyen n Urcalim maca ẓriɣ nnɛi: nitni zennan uca uyuren am ssxarriqen uca ssjehden ifassen n iɛeffanen ařami uřa d ijj war dd-iɛqeb zeg webrid nnes aɛeffan. Mammec ttwařiɣ Necc marra idsen am Sadum, uca imezdaɣ n Urcalim i Necc am Ɛamurra. ^■  

15 S uyenni, ammu i iqqar SIDI n řɛeskarat, AREBBI n Israil: Xzar, Necc ad wceɣ cciḥ d macca i řgens-a uřa d aman n arrhaj maḥend ad ten swen, minzi zeg inabiyyen di Urcalim iffeɣ-dd uɣesseb n Ccariɛa ɣar marra tammurt. ^■  

16 Ammu i iqqar SIDI n řɛeskarat: War ttesřim ca i wawařen n inabiyyen nni d awem ittnebban. Nitni ssawařen baṭeř. Nitni ssawařen ict n tmeẓriwt n wuř n yixef nsen i war iǧin d tameẓriwt zeg uqemmum n SIDI.

17 Řebda qqaren i yenni d ayi isseḥqaran: SIDI inna i-t, ad ɣarwen yiři řehna! U i kuř ijj wenni igguren di řeqsaḥet n wuř nnes, qqaren: War dd xawem ittemsar uřa d ijj n řɣar! ^■  

18 Maɣar man wen iqqimen ibedd di řḥeřqet n imcawaren n SIDI uca iẓra awař nnes u isřa as? Wi issḥessen i wawař nnes uca isřa ɣares?

19 Xzar, taḥaryaḍt n SIDI, iffeɣ-dd zzayes wesɛar, am ict n tḥaryaḍt tezzebzib nni dd ɣa ihwan x uzeǧif n iɛeffanen. ^■   20 Aɣḍab n SIDI war dd-iddikkʷiř ca ař ɣa yiřin ixarriṣen n wuř nnes. Deg uneggar n wussan ad as tfehmem s řefhamet tekmeř. 21 Necc war dd-ssekkiɣ ca inabiyyen nni, waxxa amenni gguren nitni. Necc war ɣarsen ssiwřeɣ ca, waxxa amenni bdan ad nebban zeg yixef nsen. ^■   22 Mři qqimen nitni bedden di řheřqet n imcawaren inu, iři arrin řgens inu ad iseř i wawařen inu u iři arrin ten ad dd-dewřen zeg webrid nsen aɛeffan u zi řɣar n tmegga nsen.”

23 “Ma Necc d ijj n AREBBI zi řadas, ammu i iqqar SIDI, war iǧi ijj n AREBBI zi řaggʷaj? 24 Ma izemmar ca n yijjen ad innuffar deg imucan innuffaren, ařami Necc war t ẓarreɣ, iqqar SIDI. Ma war iǧi d Necc wenni iccuren ajenna d temmurt?, iqqar SIDI. ^■   25 Necc sřiɣ min qqaren inabiyyen nni ittnebban am ssxarriqen deg Yisem inu, qqaren: ‘Tuɣa ɣari ict n tirja, ict n tirja!’ 26 Ɣares ař meřmi ɛad ad iřint tirja deg wuř n inabiyyen nni ittnebban am ssxarriqen? Nitni d inabiyyen n wecmaṭ n wuř n yixef nsen, 27 inni yarezzun ad arren řgens inu ad ittu Isem inu s tirja nsen nni tthajan ijj i wenneɣni, amecnaw ibabaten nsen ttun Isem inu s Baɛl. ^■   28 Anabi nni ɣares ict n tirja, ejj i-t ad tt iḥaja, u anabi nni ɣar iǧa wawař inu, ejj i-t ad issiweř awař inu s tidett. Maɣar min dd-yiwyen řum ɣar imendi, iqqar SIDI. 29 Ma war iǧi wawař inu am tmessi, iqqar SIDI, uca am ijj n wefḍis i iřebbzen taṣḍart? 30 S uyenni, xzar, Necc ad řeqfeɣ inabiyyen nni, ammu i iqqar SIDI, inni ittacaren awařen inu ijj n wenneɣni. ^■   31 Xzar, Necc ad řeqfeɣ inabiyyen nni, iqqar SIDI, inni issxeddamen iřes nsen u zzayes i ssawařen: ‘Netta iqqar ...!’ 32 Xzar, Necc ad řeqfeɣ inni ittnebban s tirja ixarriqen, ammu i iqqar SIDI. Nitni ttḥajan tirja nni u ammu i ttɣarran řgens inu zeg ixarriqen nsen d řhard nsen ibeṭṭřen. Necc maca war ten dd-ssekkeɣ u war d asen wciɣ awař. Nitni war ǧin d nnfeɛ i řgens, ammu i iqqar SIDI.” ^■  

33 “Xmi cek i ɣa isseqsa ijj n řgens niɣ ijj n unabi niɣ ijj n ukehhan, ad yini: ‘Min iɛna xenni řḥukm issaggʷaden n SIDI?’, xenni cek ad asen tinid: ‘Min iɛna xenni řḥukm issaggʷaden?’ ‘Ad kenniw nḍareɣ jjeɣ!’, ammu i iqqar SIDI. 34 Anabi d ukehhan d řgens nni iqqaren: ‘Řḥukm issaggʷaden n SIDI!?’, aryaz nni d taddart nni ad zzayes xeřfeɣ. 35 Ammu ittxeṣṣa ad tinim, kuř ijj i umqarreb nnes u kuř ijj i umas: ‘Mammec xak dd-yarra SIDI?’, u: ‘Min inna SIDI?’ 36 War tidarem ɛad řḥukm issaggʷaden n SIDI, maɣar řḥukm issaggʷaden n SIDI ad yiři min ɣa yini kuř ijj: aqa kenniw tessfarɣem awařen n AREBBI iddaren, SIDI n řɛeskarat, AREBBI nneɣ.

37 Ammu i ɣa tinid i unabi: ‘Mammec xak dd-yarra SIDI?, niɣ: ‘Min inna SIDI?’ 38 Maca umi teqqarem kenniw: ‘Řḥukm issaggʷaden n SIDI!?’, ammu i iqqar SIDI, umi kenniw teqqarem awař-a ‘Řḥukm issaggʷaden n SIDI!?’, waxxa Necc ssekkeɣ-dd ɣarwem ijjen ḥima ad awem yini: ‘Kenniw war teqqarem ca: Řḥukm issaggʷaden n SIDI!?’, 39 s uyenni, xzar, Necc ad kenniw ttuɣ qaɛ u Necc ad kenniw nḍareɣ zi zzat i wudem inu ak-d tendint nwem nni d awem wciɣ i kenniw uřa i ibabaten nwem. 40 Necc ad xawem dd-ssehwiɣ řḥegra i řebda d řefḍiḥet i řebda nni war ittwattun ɛemmarṣ.” ^■