1 “Ammu i iqqar SIDI: ‘Hwa ɣar taddart n ujeǧid n Yahuda, ini din awař-a, 2 ad tinid: A ajeǧid n Yahuda, wenni iqqimen x řɛarc n Dawud, seř i wawař n SIDI, cek d imsexxaren nnek d řgens nnek i ittadfen zi tewwura-ya! 3 Ammu i iqqar SIDI: Ggem řḥeqq d tsegda u ssnejmem min ittwakeccḍen zeg ufus n wenni iḥeṣṣaren. War ḥeṣṣarem, war ccatem řbarrani d uyujiř d tajjač. War ssizziřem idammen imezdagen di temmurt-a! ^■   4 Mařa kenniw ad teggem awař-a s tidett, xenni ad dd-adfen ijeǧiden zi tewwura n tendint-a, inni i ɣa iqqimen x řɛarc n Dawud, inni i ɣa inedhen ikarruten d yeysan, netta d imsexxaren nnes d řgens nnes. ^■   5 Mařa war tesřim ca ɣar wawařen-a, ammu i jjuǧeɣ i Yixef inu, iqqar SIDI, ad tedweř taddart-a d řxirbet.’ ”

6 “Maɣar ammu i iqqar SIDI x taddart n ujeǧid n Yahuda: ‘Cek tusid ayi x řxaḍar am Jilɛad u am tqiccet n Lubnan! Uct, mařa Necc war cek tteggeɣ d řexřa, tineddam war izdiɣen. 7 Necc ad ḥuzeɣ ḍidd nnek imteḥḥayyen, kuř ijj s řesnaḥ nnes i wenɣay. Nitni ad qessen ticejjura nnek n tengelt i icnan aṭṭas s ccwaqar nsen uca ad tent wcen i tmessi. ^■   8 Xenni ad dd-kken aṭṭas n řegnus x tendint-a, ad inin, kuř ijj i umqarrab nnes: Mayemmi SIDI igga ammu i tendint-a tameqqrant? ^■   9 Ad inin: Minzi nitni semḥen di Řɛahd n SIDI, AREBBI nsen, uca uḍaren i irebbiten nneɣni uca dewřen ttsexxaren asen.’ ”

10 “War ttrum x umettin u war xas ccatem agejdur. Rum x wenni yuyuren, maɣar netta ɛemmarṣ ad dd-iɛqeb, ɛemmarṣ ad iẓar ɛad tammurt nnes mani ixřeq.

11 Maɣar ammu i iqqar SIDI x Callum, mmis n Yuciya, ajeǧid n Yahuda, wenni idewřen d ajeǧid deg wemcan n babas Yuciya wenni dd-iffɣen zeg wemcan-a: ‘Netta ɛemmarṣ ad dd-iɛqeb dinni ɛad.

12 Maɣar deg wemcan mani t nedhen di tmeḥbast, dinni i ɣa immet, ɛemmarṣ ad iẓar tammurt-a ɛawed.’ ”

13 “Axeyyeb i wenni i ɣa issbedden tazeddiɣt nnes s řmuɛṣiyyet, u tiɣurfin nnes s řɣecc, wenni issxeddamen wenni t yudsen nehřa axeǧeṣ u war d as ittic řmunet nnes, ^■  

14 wenni iqqaren: ‘Necc ad ssbeddeɣ i yixef inu ict n tzeddiɣt yuɛřan aṭṭas s tɣurfin iwesɛen.’ Xenni ad dayes igg tiburjatin uca ad tt iseqqef s ukeccuḍ n tcejjura n tengelt uca ad tt izewweq s tintat tizeggʷaɣin.

15 Ma tdewřed d ajeǧid umi tᵉttemḥizwared zi ssibbet n tneglin? Babac ma war icci, ma war iswi u ma war iggi řḥeqq d tsegda? Netta tuɣa mliḥ xas xenni!

16 Netta iḥkem tamesřact n wenni ittwaḥṣaren d umezřuḍ. Tuɣa mliḥ xas xenni. Ma aya war ixs ad yini aqa bnadem issen ayi?, ammu i iqqar SIDI.

17 Maca tiṭṭawin nnek d wuř nnek aqa tent mɣir x tizi nnek waha, u x idammen imezdagen maḥend ad ten tessizzřed, u x ddeǧ d ubeɛɛej, maḥend ad ten tegged.’ ”

18 “S uyenni, ammu i iqqar SIDI x Yahuyaqim, mmis n Yuciya, ajeǧid n Yahuda: ‘Nitni war xas ceṭṭnen: Ax, uma! niɣ: Ax, učma! Nitni war ceṭṭnen: Ax, sidi! niɣ: Ax, lɛaḍim! ^■  

19 Ad ittwanḍeř ijj n wenḍař n ijj n weɣyuř. Ad t jarren u ad t nḍaren ɣar řaggʷaj, barra i tiwwura n Urcalim.’ ” ^■  

20 “geɛɛed x idurar n Lubnan, sɣuyy uca sgeɛɛed tmijja nnem x Bacan. Sɣuyy-dd ɛawed zi Abarim, maɣar marra inni cem ittexsen ttwarẓan. 21 Necc ssiwřeɣ akidem řami cem tuɣa di řaman, cem maca tennid: ‘Necc war xseɣ ad sřeɣ!’ Ammu i t teggid zi temẓi nnem, maɣar cem tuɣa war tᵉttexsed ad tesřed i tmijja inu. ^■   22 Marra imeksawen ad ten yarwes usemmiḍ uca inni cem ittexsen ad uyuren di tmeḥbast. Xenni ad tᵉsseḍḥid uca ad tenfeḍḥed zi ssibbet n marra tuɛeffna nnem. ^□   23 Cem, a tenni izeddɣen x idurar n Lubnan, tenni iḥebḍen di tcejjura n tneglin, mammec i ɣa tzehhared xmi d am dd ɣa yasen řewjeɛ, řeḥriq am icten tᵉttaru!”

24 “S tidett am ddareɣ Necc, ammu i iqqar SIDI: ‘Waxxa mařa Kun-Yahu, mmis n Yahuyaqim, ajeǧid n Yahuda, tuɣa d txadent n ucemmiɛ deg ufus inu, aqa ad cek kkseɣ ssenni. 25 Necc ad cek wceɣ deg ufus n yinni yarezzun tudart nnek u deg ufus n wenni zi tᵉtteggʷeded, deg ufus n Nabuxadraṣṣar, ajeǧid n Babil, u deg ufus n Ikaldaniyyen. ^□   26 Cek d yemmac, ad kenniw nḍareɣ ɣar ict n temmurt nneɣnit mani war texřiqem, uca dinni ad tmetnem. 27 War ttɛiqqibem ɛemmarṣ ɣar temmurt nni di temmeẓrem maḥend ad ɣares dd-tɛeqbem.’ ”

28 “Ma Kun-Yahu aryaz-a d ijj n uɣarraf immenḍar, yarreẓ? Niɣ netta d ijj n uɣarraf war t ittexs ɛad uřa d ijj? Mayemmi t ḥejjaren, netta d zzariɛet nnes, nḍaren ten ɣar ict n temmurt war tt ssinen? 29 A tammurt, tammurt, tammurt, seř i wawař n SIDI! 30 Ammu i iqqar SIDI: ‘Zemm aryaz-a nhřa iḥenjiren, ijj n weryaz nni war ɣar iǧi zzhir deg wussan nnes. Maɣar uřa d ijj zeg warraw nnes ad ɣares yiři zzhir ařami i ɣa iqqim x řɛarc n Dawud u ad iḥkem ɛawed di temmurt n Yahuda.’ ”