1 Ammu i iqqar SIDI: “Uyur uca seɣ ijj n uɣarraf n třaxt uca awi ca zeg imɣaren n řgens u zeg imɣaren n ikehhanen akidek. 2 Ffeɣ ɣar barra ɣar Teɣzurt n mmis n Hinnum, tenni ɣar wadaf n Tewwart n Iceqfan, uca barreḥ dinni awařen nni d ac i ɣa iniɣ,

3 ini: ‘Sřem i wawař n SIDI, a ijeǧiden n Yahuda d imezdaɣ n Urcalim! Ammu i iqqar SIDI n řɛeskarat, AREBBI n Israil: Xzar, Necc ad ssiwḍeɣ ijj n řɣar d ameqqran x wemcan-a, maḥend marra wenni i ɣa isřen, imezzuɣen ggur ad ṭneṭnen, ^■   4 maɣar nitni ḥeyyden xafi uca arrin amcan-a d ijj n wemcan i ibarraniyyen uca qeddmen tiwhibin n řebxur i irebbiten nneɣni inni war ssinen, war iǧi nitni, uřa d ibabaten nsen d ijeǧiden n Yahuda. Nitni ɛemmaren amcan-a s idammen n imezdagen. ^■   5 Minzi nitni ssbedden řegɛudi mani ttwehhben ddbayeḥ nsen i Baɛl, ḥima ad sscemḍen iḥenjiren nsen s tmessi, am tɣarṣa n wecmaḍ i Baɛl, min war d asen umureɣ d min war ɣarsen ssiwřeɣ d min ɛemmarṣ war t ggiɣ deg wuř inu.’ ”

6 “S uyenni, xzar, ad dd-asen wussan, ammu i iqqar SIDI, war daysen qqaren ɛad i wemcan-a Tufat niɣ taɣzurt n mmis n Hinnum, maca Taɣzurt n Wenɣay. ^■   7 Maɣar ad ssbeṭṭřeɣ inwayen n Yahuda d Urcalim deg wemcan-a u ad ten ɣeḍřeɣ zzat i wudem n řɛedyan nsen s ssif u s ufus n yinni yarezzun tudart nsen. Necc ad wceɣ řxecbat nsen d macca i ijḍaḍ n ujenna u i řmař n temmurt. ^□  ■   8 Necc ad arreɣ tandint-a d ijj n umedya n usnexřiɛ d tiseḍḥac. Kuř ijj wenni xas dd ɣa ikken, ad innexřeɛ u ad iṣeffar s asrubi x marra jjɛayef nnes. 9 Necc ad asen ggeɣ ad ccen aysum n iḥenjiren nsen d weysum n yessitsen. Nitni ad ccen, kuř ijj aysum n umqarreb nnes, di řweqt nni di dd-quwwaren i tendint, di řeḥṣaret i zi ten i ɣa ḥṣaren řɛedyan nsen d yenni yarezzun tudart nsen.” ^□  ■  

10 “Xenni ittxeṣṣa ad tarẓed aɣarraf jar tiṭṭawin n yeryazen nni akidek yuyuren.

11 Ittxeṣṣa ad asen tinid: ‘Ammu i iqqar SIDI n řɛeskarat: Ammu i ɣa arẓeɣ řgens-a d tendint-a, am mammec ttareẓẓan ijj n uɣarraf n třaxt nni war izemmaren ad t ɛedřen ɛad. Nitni ad ten neḍřen di Tufat umi war din iqqim wemcan mani i ɣa neḍřen. ^□  ■  

12 Ammu i ɣa ggeɣ zeg wemcan-a u ak-d imezdaɣ nnes, iqqar SIDI, ḥima ad arreɣ tandint-a amecnaw Tufat.

13 Tudrin n Urcalim d tudrin n ijeǧiden n Yahuda ad dewřent xemjent am wemcan n Tufat, zi ssibbet n marra tudrin nni zi x tzeɣwin nsent qeddmen nitni řebxur i marra řɛeskar n ujenna d tewhibin n useyyeb i irebbiten nneɣni.’ ” ^■  

14 Umi dd-iɛqeb Irmiya zi Tufat, mani tuɣa t issekk SIDI maḥend ad inebba, yuyur di řemraḥ n zzat n Taddart n SIDI uca inna i řgens marra:

15 “Ammu i iqqar SIDI n řɛeskarat, AREBBI n Israil: ‘Xzar, Necc ad ssiwḍeɣ x tendint-a u x marra tineddam nnes marra řɣar nni x ssiwřeɣ, minzi nitni menɛen taɣennant am ugin ad sřen ɣar wawařen inu.’ ” ^■