1 Řami Facḥur, mmis n Immir, akehhan nni ittwaggen d ameḥḍay ameqqran x Taddart n SIDI, isřa i Irmiya am ittnebba awařen-a, 2 iwta Facḥur anabi Irmiya uca iḥebbes i-t deg ukeccuḍ nni iǧan deg wexxam n sennej n Tewwart n Binyamin nni iǧan ɣar Taddart n SIDI.

3 Tiwecca nnes ijja Facḥur ad arxun i Irmiya zeg ukeccuḍ. Xenni inna as Irmiya: “War d ac iqqar SIDI Facḥur, maca Majur-Missabib. ^□   4 Maɣar ammu i iqqar SIDI: ‘Xzar, Necc ad cek ggeɣ d asnexřiɛ i yixef nnek u i marra inni cek ittexsen. Nitni ad wḍan s ssif n řɛedyan nsen, am t ttwařant tiṭṭawin nnek, u Necc ad wceɣ marra Yahuda deg ifassen n ujeǧid n Babil nni ten i ɣa inedhen di tmeḥbast ɣar Babil u ad ten ineɣ s ssif. 5 Marra agřa n tendint-a ad ten sellmeɣ, u marra min dayes iɣřan d marra tixuba n ijeǧiden n Yahuda ad ggeɣ aya marra deg ufus n řɛedyan nsen. Nitni ad ten acaren, ad ten ksin akidsen uca ad ten i-dd-awyen ɣar Babil. ^■   6 Cek, Facḥur, d marra ayt n taddart nnek, kenniw ad teffɣem d imeḥbas. Cek ad dd-tawdeḍ ɣar Babil uca ad temmted dinni uca ad ttwaneḍřed dinni, cek d marra imeddukkař nnek inni umi tnebbid s ixarriqen.’ ”

7 “Cek tjebded ayi-dd, a SIDI, uca necc ttwassqenɛeɣ. Cek tjehded xafi aṭṭas uca tɣeřbed ayi. Ass marra ttɣiman deḥḥcen dayi, marra idsen stehzan zzayi. 8 Maɣar meřmi ma ssiwřeɣ, sɣuyyuɣ ‘Řexcunect!’, řaɣiɣ ‘Anexřiɛ!’, maɣar awař n SIDI ittawi ayi-dd ass imun mɣir aseḥqar d ustehzi. ^■   9 Nniɣ: ‘Necc war t ttidareɣ ɛad u war ssiwiřeɣ ɛad s Yisem nnes!’, xenni idweř aya deg wuř inu am ict n tmessi yareqqen, tᵉttwaḥbes deg ixsan inu. Necc arezzuɣ ad ṣbareɣ, maca war d as zemmareɣ.

10 Maɣar sřiɣ aceqqef s řhard n waṭṭas: ‘Majur-Missasib’, ‘Asiggʷed zi marra iɣezdisen’. Nitni qqaren: ‘Sargeb aneɣ! Neccin ad zzayes nbarreḥ!’ Kuř aryaz ak-d ddareɣ di řehna, ittraja ař ɣa nqarḍeɣ. Qqaren: ‘Ad taɣ nzemmar ad t nesseqneɛ, xenni ad t neɣřeb uca ad zzayes nexřef.’

11 SIDI ibedd akidi am ijj n bu-teɣruḍt d ameqqran, s uyenni i ɣa nnqarḍen inni d ayi iḍaffaren, war zemmaren ad ggen walu. Nitni ad sseḍḥan s yixef nsen aṭṭas, minzi war ggin s řeɛqeř. Ad tiři d ict n řefḍiḥet i řebda i war ggur ad tᵉttwattu i řebda. ^■  

12 Cek, a SIDI n řɛeskarat, wenni ittqeǧaben amsegged, wenni ittwařan tiẓẓař d wuř, scen ayi nneqmet nnek xasen, maɣar necc ggiɣ ac taɣawsa inu deg ufus.” ^■  

13 “Zehhdem i SIDI, semɣarem SIDI, maɣar Netta ifekk amezřuḍ zeg ufus n iɛeffanen.”

14 “Aqa ittwanɛeř ass i di dd-ttwarweɣ! Ass i d ayi dd-turu yemma war ittiři ittwabarek. ^■  

15 Ittwanɛeř weryaz nni dd-yiwyen řexbar aṣebḥan i baba, inna: ‘Aqa ittwaruw ac dd uḥenjir!’ uca issfarḥ i-t ammu s waṭṭas. ^■  

16 Ejj aryaz nni ad yiři am tneddam nni issneqřeb SIDI břa ma indem zi man aya. Ejj i-t ad iseř i iɣuyyan n řeḥriq ɣar teffut u i uṣuḍi s wesruddeḥ n umenɣi ɣar ṭṭya n wass,^■  

17 minzi Netta war d ayi inɣi deg uɛeddis n yemma. Ammu tedweř yemma d anḍeř inu uca iqqim uɛeddis nnes iksi s ddeyset i řebda!

18 Mayemmi i dd-ffɣeɣ zeg uɛeddis? Ma ḥima ad ẓareɣ tamara ibeṭṭřen d wecḍan waha u ḥima ad qḍiɣ ussan inu di řefḍiḥet?” ^■