1 Awař nni dd-yusin zi SIDI ɣar Irmiya, inna:

2 “Kkar, hwa ɣar taddart n bu-třaxt. Dinni i ɣa jjeɣ awařen inu ad ttwasřen.” ^□   3 Xenni hwiɣ ɣar taddart n bu-třaxt, uca xzar, ufiɣ t ixeddem ict n řqecɛet x iẓra ittennḍen. 4 Ixsar uɣarraf nni tuɣa ittegg n třaxt, deg ufus n bu-třaxt. Netta igga zzayes ɛawed ijj n uɣarraf nneɣni, am mammec i d as ittɣiř d lemliḥ i bu-třaxt maḥend ad t igg.

5 Xenni yusa-dd ɣari wawař n SIDI, inna:

6 “Ma war zemmareɣ Necc ad ggeɣ akidwem am bu-třaxt wanita, a taddart n Israil, ammu i iqqar SIDI. Xzar, am třaxt deg ufus n bu-třaxt, ammu i teǧam deg ufus inu, a taddart n Israil!^■   7 Ict n twařa ad ssiwřeɣ x ijj n řgens u x ict n tgeldit aqa ad t qeřɛeɣ, ad t hedmeɣ u ad t teḥḥiɣ. ^■   8 Maca mařa řgens nni x ssiwřeɣ, ad dd-idweř zi tuɛeffna nnes, xenni ad nedmeɣ zi řɣar i tuɣa nwiɣ ad as t ggeɣ. 9 Ict n twařa nneɣni ad ssiwřeɣ x ijj n řgens u x ict n tgeldit belli ad t ssbeddeɣ u ad t ẓẓuɣ.

10 Maca mařa ad yegg min iǧan d aɛeffan di tiṭṭawin inu umi war ttesřin ɣar tmijja inu, xenni ad nedmeɣ x min icnan i nniɣ ad kidsen t ggeɣ.

11 Xenni řexxu, siweř ak-d iryazen n Yahuda u ak-d imezdaɣ n Urcalim, ini: ‘Ammu i iqqar SIDI: Xzar, Necc sswejdeɣ ijj n řɣar ḍidd nwem u Necc ttxarraṣeɣ deg ijj n wenway xawem. Dewřem-dd xenni, kuř ijj zeg webrid nnes aɛeffan, u ɛedřem ibriden nwem d tmegga nwem. ^■  

12 Maca nitni qqaren: Řayas walu! Neccin ad neḍfar inwayen n yixef nneɣ uca ad negg kuř ijj ɛlaḥsab řeqsaḥet n wuř nnes!’ ” ^■  

13 “S uyenni, ammu i iqqar SIDI: ‘Seqsam řegnus, man wen isřin ɛemmarṣ am wa? Taɛzarect Israil tegga ijj n nnɛi d ameqqran. ^■  

14 Ma ad iḥeyyed ɛemmarṣ wedfeř n Lubnan zeg ict n teṣḍart deg iyyar? Ma ad aẓɣen ɛemmarṣ waman isemmaḍen ittazzřen i dd-yusin zi řaggʷaj?

15 Maca waxxa amenni ittu ayi řgens inu. Nitni ttawyen tiwhibin n řebxur i řexyařat ibeṭṭřen inni ten ijjin ad nnqarḍen deg ibriden nsen, di jjurat n wecḥař uya, maḥend ad uyuren deg izubaq n ijj n webrid war iwiṭin, ^■  

16 maḥend ad arren tammurt nsen d řxarbet, i tseḍḥact i řebda. Qaɛ wenni ssenni i ɣa ikken, ad innexřeɛ, ad ihezz azeǧif nnes. ^■  

17 Am usemmiḍ n manis i dd-tneqqar tfuct ad ten zuzzareɣ zzat i řeɛdu. Necc ad asen ssecneɣ aɛrur, war iǧi udem, deg wass n uhellek nsen.”^■  

18 “Nitni maca nnan: ‘Asem-dd, jjem aneɣ ad negg tameɛmuč x Irmiya, maɣar Ccariɛa ɛemmarṣ ad iqḍa ɣar ukehhan, uca ccwar i umiɣis, uca awař ɣar unabi. Asem-dd, ejj aneɣ ad t newwet s wawařen n yiřes nneɣ uca ejj aneɣ war nettic taynit i uřa d ijj zeg wawařen i iqqar.’ ” ^■  

19 “Ḥḍa ayi, a SIDI, u seř-dd ɣar tmijja n yinni akidi ittmenɣan. 20 Ma xenni ad ittwaxřef min iṣebḥen s min war iḥřin? Maɣar nitni ɣzin ayi ict n tenḍeč. Idar mammec beddeɣ zzatek ḥima ad ssiwřeɣ di řxir nsen, ḥima ad xasen ḥeyydeɣ asɛar nnek. 21 S uyenni, ewc iḥenjiren nsen i řaẓ uca sellem i-ten i tzemmar n ssif uca ejj timɣarin nsen ad asent acaren iḥenjiren, ad dewřent d tijjař, ejj iryazen nsent ad ttwanɣen u iḥuḍriyyen nsent ad mmten s ssif deg umenɣi. ^■   22 Ejj ad tᵉttwaseř tɣuyyit zi tudrin nsen, mařa Cek deɣya tɣeḍred-dd xasen ict n bandiyya umi ɣzin nitni ict n tenḍeč ḥima ad ayi ṭṭfen, u ssarsen řefxux innuffaren i iḍaren inu. 23 A SIDI, Cek tessned marra anway nsen maḥend ad ayi nɣen. War sdurri řmuɛṣiyyet nsen u war meḥḥi ddnub nsen zzat i wudem nnek, maca ejj i-ten ad wḍan zzatek. Egg asen ammu di řweqt n weɣḍab nnek.”