1 Yusa-dd ɣari wawař n SIDI, inna:

2 “War ttawi tamɣart i yixef nnek u war ɣarek ttiřin iḥenjiren d tḥenjirin deg wemcan-a, 3 maɣar ammu i iqqar SIDI x iḥenjiren d tḥenjirin i dd ɣa ittwurwen deg wemcan-a u x yemmatsen i ten dd-yurwen u x babatsen i ten dd-ijjin di temmurt-a: 4 ‘Nitni ad mmten s ibriden iwɛaren aṭṭas, war xasen ceṭṭen u war ten neṭṭřen, nitni ad dewřen d řeɣbar i wudem n temmurt uca ad ttwaɣezzen s ssif d řaẓ u řxecbat nsen ad dewřent d macca i ijḍaḍ n ujenna d řewḥuc n řexřa.’ ” ^■  

5 “Maɣar ammu i iqqar SIDI: ‘War ttadef ɣar ict n taddart n wecḍan u war ggur ad tewted agejdur u war areḥḥem, maɣar Necc kkseɣ řehna inu x řgens-a, tamexsiwt inu icewwaren d arreḥmet, ammu i iqqar SIDI.’ 6 Imeqqranen d imeẓyanen ad mmten di temmurt-a. War ten neṭṭřen u war xasen ccaten agejdur u war xebbcen ixef nsen niɣ ad ssquccaren ixef nsen di ṭṭweɛ nsen. ^■   7 War d asen ittwarẓ weɣrum zi ssibbet n wecḍan ḥima ad ɛezzan ca n yijjen x ijj n umetti, u war d asen tticen ad swen zeg uɣarraf n uɛezzi x babas niɣ yemmas.

8 War ttadef ɣar taddart mani tteggen zzardet maḥend ad teqqimed ɣarsen i macca d tsessit. 9 Maɣar ammu i iqqar SIDI n řɛeskarat, AREBBI n Israil: ‘Xzar, Necc ad ssbeddeɣ zzat i tiṭṭawin nwem deg wemcan-a tmijja n warcaq d tmijja n řefraḥet, tmijja n muřay d tmijja n tesřit.’ ” ^■  

10 “Xmi i ɣa tbarrḥed marra awařen-a i řgens-a uca nitni ad sseqsan: ‘Mayemmi iqqar SIDI marra řɣar-a ameqqran xaneɣ u min iǧan d ljarima nneɣ u min iǧan d ddenb nneɣ i negga neccin ak-d SIDI, AREBBI nneɣ?’ ^■  

11 Xenni ad asen tinid: ‘Maɣar ibabaten nwem semḥen dayi, ammu i iqqar SIDI, uca uyuren awarni i irebbiten nneɣni uca sexxaren u uḍaren asen, maca semḥen dayi u war ḥḍin Ccariɛa inu.

12 U kenniw simant nwem maca teggim mahu i ibabaten nwem, minzi xzar, kuř ijj zzaywem iḍaffar řeqsaḥet n wuř aɛeffan nnes ařami kenniw war dd ɣari tesřim qaɛ. ^□  ■  

13 S uyenni ad kenniw ḥejjareɣ ɣar barra zi temmurt-a ɣar ict n temmurt i war tessinem kenniw uřa d ibabaten nwem, uca dinni i ɣa tɛebdem irebbiten nneɣni, ass d ǧiřet, minzi Necc war ɣarwem-dd ttarzifeɣ ɛad s ca n řxaḍar.’ ” ^■  

14 “S uyenni, xzar, ad dd-asen wussan, ammu i iqqar SIDI war d as qqaren ɛad: ‘S tidett am iddar SIDI nni i dd issuffɣen ayt n Israil zi Miṣra!’ ^■  

15 maca: ‘S tidett am iddar SIDI wenni dd-issuffɣen ayt n Israil zi temmurt n ccamal u zi marra timmura mani xasen yuẓẓeř!’ Minzi Necc ad ten arreɣ ɣar temmurt nni wciɣ i ibabaten nsen.

16 Xzar, Necc ad ssekkeɣ aṭṭas n ineymaren n iseřman, ammu i iqqar SIDI, inni ten i ɣa ymaren, u xenni ad ssekkeɣ aṭṭas n ineymaren nni xasen i ɣa yaẓẓřen zi mkuř adrar u zi mkuř tawrirt u zeg ifeǧiqen jar řejruf.

17 Maɣar tiṭṭawin inu ttwařant marra ibriden nsen, nitni war zemmaren ad zzayi nnuffaren uca řmuɛṣiyyet nsen war tzemmar ad tennuffar zzat i tiṭṭawin inu. ^■  

18 Amezwar ad xeřfeɣ s uḍeffus marra řmuɛṣiyyet nsen d marra ddnub nsen, minzi nitni ssɛiǧten tammurt inu. Nitni ccuren tasɣart inu s řxecbat n nnɛawat n ṣṣanam nsen u s jjɛayef nsen.” ^■  

19 “A SIDI, Cek d Jjehd inu d Adurri inu d Arwař inu deg wass n řeḥṣaret. Ad ɣarek dd-asen řegnus zeg ineggura n ddunect, ad inin: ‘Tasɣart nni ṭṭfen ibabaten nneɣ, dayes mɣir acmat d aɛbed n řexyařat ibeṭṭiřen, timesřayin i war ineffɛen.

20 Ma izemmar bnadem ad igg irebbiten i yixef nnes? Nitni maca war ǧin d irebbiten. 21 S uyenni, xzar, Necc ad ten arreɣ ad cehden, uřa d twařa aya ad ten arreɣ ad cehden aqa d afus inu d jjehd inu. Nitni ad ssnen belli Isem inu ‘SIDI’.” ^■