1 Inna ayi SIDI: “Waxxa mařa ibedd Musa d Camwil zzat i wudem inu, ɛad war ittiři řeɛmar inu ak-d řgens-a. Siggʷej i-ten zi zzat n wudem inu, ejj i-ten ad uyuren. ^■   2 Xmi d ac i ɣa inin: ‘Mani i ɣa nuyur?’, xenni ad asen tinid: ‘Ammu i iqqar SIDI: Wi iǧan i řmewt, ɣar řmewt, u wi iǧan i ssif, ɣar ssif, u wi iǧan i řaẓ, ɣar řaẓ, u wi iǧan i tmeḥbast, ɣar tmeḥbast!’^■   3 Ad ten xeǧṣeɣ s arebɛa n webriden, ammu i iqqar SIDI: s ssif ařami i ɣa ttwanɣen, s yiṭan ařami ten jarren zeg webrid, s ijḍaḍ n ujenna d řewḥuc n temmurt ař ɣa ttwaṣarḍen u ad ttwareddǧen. ^■   4 Necc ad ten jjeɣ ad xasen aẓẓřen di marra tigeldiwin n ddunect, zi ssibbet n Manassa, mmis n Ḥizqiya, ajeǧid n Yahuda, d axřaf zi min igga di Urcalim. ^■  

5 Maɣar man wen umi ɣa tezziǧed, a Urcalim? Wi d am i ɣa issḥissfen niɣ wi dd ɣa iffɣen zeg webrid maḥend ad xam isseqsa x umeddur nnem? ^■   6 Kenniw tsemḥem dayi, ammu i iqqar SIDI, kenniw tdewřem ɣar ḍeffar. S uyenni i ɣa sswiẓẓḍeɣ afus inu ḍidd nwem uca ad kenniw areddǧeɣ. Necc dewřeɣ neddmeɣ s uḥinni xawem. ^■   7 Necc ad ten zuzzareɣ s ǧuḥ di tewwura n temmurt. Necc keccḍeɣ iḥenjiren zi řgens inu uca sshellkeɣ t. Nitni war dd-dwiřen ca zeg ibriden nsen iɛeffanen.^■   8 Tijjař nsen ad iřint wesɛent x yejdi n řebḥurat. Necc ggur ad xasen dd-ɣeḍřeɣ, x yemmas n uḥudri, ijj n umteḥḥay di ṭṭya n wass. Deɣya ad xasen wḍiɣ s tiggʷudi d unexřiɛ. ^□   9 Tenni i dd-yurwen sebɛa n iḥenjiren, tewḍa ɣar temmurt. Nettat tedřeq i buḥbeř nnes, teɣři tfuct nnes am iǧa ɛad d wass. Nettat tᵉttseḍḥa uca tᵉtteṭṭef i-tt i-dd řefḍiḥet. Min iqqimen zzaysen ad t wceɣ i ssif zzat i wudem n řɛedyan nsen.” ^■  

10 “Uct xafi, yemma, aqa cem turwed ayi-dd: ijj n weryaz n umcubbec, ijj n weryaz n umenɣi i marra tammurt. Necc war d asent arḍřeɣ uca nitni war d ayi ttᵉttursen, waxxa amenni marra neɛɛřen ayi.” ^□  ■  

11 Inna SIDI: “Ah, mařa Necc war tteggeɣ s tcuni ak-d min iqqimen n řgens nnek, mařa Necc war dd-usiɣ ɣarek i řeɛdu deg ict n řweqt d taɛeffant u deg ict n řweqt n řeḥṣaret.

12 Ma izemmar bnadem ad yarẓ uzzař, uzzař dd-yusin zi ccamal niɣ nnḥas? ^■  

13 Agřa nnek d řeknuz nnek ad ten wceɣ d takeccaḍt i řegnus, břa ttaman, zi ssibbet n marra ddnub nnek uca aya di marra tammurt nnek. ^■  

14 Necc ad cek sseɛduɣ ak-d řeɛdu nwem ɣar ict n temmurt nni war tessined ca, maɣar s weɣḍab inu tarɣa tmessi nni i ɣa iqqimen tcemmeḍ ḍidd nwem.”^■  

15 “A SIDI, Cek tessned tt, idar ayi uca řha-dd akidi! Ntaqem ayi zeg yenni d ayi iḍeffaren! War d ayi ttekkes am ɣarek ttasiɛ n řxaḍar aṭṭas. Ssen aqa necc ad xak ksiɣ řɛar di ṭṭweɛ nnek. ^■  

16 Ɣar ad ttwafen wawařen nnek, ad ten cceɣ deɣya. Awař nnek tuɣa-t i necc d arcuq d řefraḥet i wuř inu maɣar ittwabarreḥ Isem nnek di tiwa inu, a SIDI, AREBBI n řɛeskarat.

17 Necc war ttɣimiɣ ca deg wegraw n yinni istehzan, war neggzeɣ s řefraḥet. Zi ssibbet n ufus nnek ttɣimiɣ weḥḥdi, maɣar teccured ayi s wesxeḍ nnek. ^■  

18 Mayemmi řeḥriq inu iddar řebda u mayemmi war izemmar uyezzim inu ɛemmarṣ ad iggenfa, ma netta yugi ad iggenfa? Ma s tidett aqa Cek am waman inhewřen inni war di iǧi řaman?” ^■  

19 “S uyenni, ammu i iqqar SIDI: ‘Mařa cek tdewřed-dd, Necc ad cek arreɣ ad dd-tdewřed u ad tbedded zzat i wudem inu. Mařa tessuffɣed min iɣřan zi jar min war isekkwan walu, ad tiřid amecnaw uqemmum inu. Ejj i-ten ad ɣarek dd-dewřen, maca cek war tzemmared ad ɣarsen dd-tdewřed. 20 Maɣar Necc ad cek ggeɣ i řgens-a d řḥiḍ imetnen n nnḥas. Ad xsen akidek mmenɣen, maca nitni war zemmaren ad cek arenyen, maɣar Necc akidek ḥima ad cek ssnejmeɣ u ḥima ad cek fekkeɣ, ammu i iqqar SIDI.^■   21 Necc ad cek fekkeɣ zeg ufus n iɛeffanen u Necc ad cek fdiɣ zeg wemnaɛ n ayt n bu-řexcunet.”