1 Awař n SIDI i dd-yusin ɣar Irmiya x řaẓaɣ ameqqran.

2 “Tammurt n Yahuda tecḍen uca tiwwura nnes heyyfent, qqimen nitni x temmurt s werruḍ d abarcan, uca tɣuyyit n ucetci n Urcalim tgeɛɛed ɣar ujenna. 3 Ayt n jjehd sekken ixemmasen nsen imuqřiřen ɣar waman. Řami dd-usin nitni ɣar wanuten n wenẓar, war daysen ufin aman. Nitni ɛeqben-dd s ibuqaren nsen xwan, sseḍḥan, ucin s ubarreq uca řeḥḥfen i uzeǧif nsen, 4 minzi tᵉttwacarreg temmurt, maɣar war din anẓar di temmurt. Ifeǧaḥen ttseḍḥan, ttřeḥḥafen i uzeǧif nsen. 5 Maɣar řa d tudadt deg iyyar turuw-dd, maca xenni tesmeḥ di mmis, minzi war din iqqim arrbiɛ ɛad. 6 Iɣyař n řexřa bedden x tewririn iquccaren, ssɣatan ɣar řeɛwin am wuccanen n řexřa. Tiṭṭawin nsen xesyent maɣar war iqqim wefsu aziza ɛad.” ^■  

7 “Waxxa cehhdent xaneɣ řmuɛṣiyyat nneɣ, a SIDI, egg i-t di ṭṭweɛ n Yisem nnek, maɣar aweddar nneɣ deg waṭṭas, aqa nexḍa akidek. 8 Cek d Řayas n Israil, cek d Amsenjem nnes di řweqt n řeḥṣaret, mayemmi i ɣa tiřid am ijj n ubarrani di temmurt, am ijj n umsebrid ittnusan ǧiřet waha? 9 Mayemmi teǧid am ijj n weryaz iweddaren, am ijj n bu-teɣruḍt i war izemmaren ad ifekk? Aqa Cek di řwest nneɣ, a SIDI, Isem nnek ittwabarreḥ xaneɣ, war dayneɣ semmeḥ!”

10 “Ammu i iqqar SIDI x řgens-a: ‘Tuɣa iɛjeb asen ad telɛen, war ssɛizzen x iḍaren nsen. S uyenni SIDI war xasen yarḍa. Řexxu ad yidar Netta řmuɛṣiyyet nsen uca ad ixeǧeṣ ddnub nsen.’ ”

11 Inna ayi SIDI: “War tᵉttar i řgens-a maḥend ad yiři mliḥ! ^■  

12 Waxxa ẓummen, Necc war ttesřiɣ ca ɣar tɣuyyit nsen, waxxa nitni iwyen ict n tɣarṣt n wecmaḍ d ict n tewhibt n řɣiǧet, Necc war xasen arḍiɣ ca, maɣar Necc ad ten qḍiɣ s ssif d řaẓ d ṭṭaɛun.”^■  

13 Xenni nniɣ necc: “Wayyaw, a Sidi inu, SIDI, xzar, inabiyyen qqaren asen: ‘Kenniw war tẓarrem ssif, war ittiři řaẓ, maɣar Necc ad awem wceɣ řehna d tidett deg wemcan-a’ ”

14 Inna ayi SIDI: “Inabiyyen ttnebban s ixarriqen s Yisem inu. Necc war ten dd-ssekkeɣ u war ten umureɣ u war kidsen ssiwřeɣ. Nitni ttnabben tameẓriwt war iǧin, aɛezzem, min ibeḍřen uřa d acmat n wuř nsen.” ^■  

15 “S uyenni, ammu i iqqar SIDI: ‘X inabiyyen nni ittnebban s Yisem inu, waxxa Necc war ten dd-ssekkeɣ ca, uca qqaren: War ittiři ssif uřa d řaẓ di temmurt-a!, aqa inabiyyen nni ad ttwaqḍan s ssif d řaẓ.

16 Řgens umi nebban, ad immenḍar deg ibriden n Urcalim zi ssibbet n řaẓ d ssif, uca war ittiři wi ten i ɣa ineḍřen: nitni, timɣarin nsen, iḥenjiren nsen d tḥenjirin nsen. Ammu d xasen i ɣa zeǧɛeɣ řɣar n yixef nsen.’ ”

17 “S uyenni ad asen tinid awař-a: ‘Imeṭṭawen ad dd-ssefyent zi tiṭṭawin inu ad dd-hwant, ǧiřet d wass, břa qeṭṭu!’ Maɣar tᵉttwarẓ teɛzarect, iǧis n řgens inu, s tareẓẓit d tameqqrant, s uyezzim itteqqes aṭṭas. ^■  

18 Xmi i ɣa ffɣeɣ, ɣar yeyyar, aqa da inni ittwasnuqqben s ssif, u xmi i ɣa adfeɣ ɣar tendint, xzar, inni iheřcen s řaẓ! Anect n inabiyyen, anect n ikehhanen tᵉttliɛen deg ict n temmurt i war ssinen.

19 Ma tenḍared Cek Yahuda marra? Ma icarreh řeɛmar nnek Ṣihyun? Mayemmi i d aneɣ tewtid ammu ařami war d aneɣ iqqim bu ugenfu? Sittimen ad yiři řehna, maca war din amcan i řxar, u deg ijj n řweqt n ugenfi, maca xzar, mɣir asnexřiɛ. ^■   20 A SIDI, neccin war nessin řɣar nneɣ d řmuɛṣiyyet n ibabaten nneɣ, maɣar neccin nexḍa akidek. ^■   21 War d aneɣ sseḥqara ca di ṭṭweɛ n Yisem nnek, war sseḥqara řɛarc n uɛuǧi nnek. Idar aneɣ, war tareẓẓa Řɛahd i kidneɣ teggid! 22 Ma aqa din jar l’aṣnam ifennan n řegnus nni izemmaren ad wcen anẓar, niɣ iccat ujenna s wenẓar s simant nnes? Ma war iǧi d Cek, a SIDI, AREBBI nneɣ? S uyenni ad Cek nraja, maɣar Cek i itteggen marra aya.”^■