1 “Ammu i d ayi inna SIDI: ‘Uyur, seɣ i yixef nnek ijj n webyas n řeqṭen uca beys i-t x tejɛinnatin nnek, maca war t tejji ad yadef deg waman!’ 2 Necc sɣiɣ ijj n webyas ɛlaḥsab awař n SIDI uca beyseɣ t x tejɛinnatin inu. 3 Xenni yusa-dd ɣari wawař n SIDI i twařa wiss tnayen, inna: 4 “Ksi abyas i tesɣid, wenni tbeysed x tejɛinnatin nnek uca kkar, uyur ɣar yeɣẓar n Lfuraṭ uca ffar i-t dinni di tazzect n jjarf.” 5 Necc uyureɣ uca ffareɣ t ɣar Lfuraṭ, am mammec tuɣa d ayi yumur SIDI.

6 Awarni i waṭṭas n wussan inna ayi SIDI: “Kkar, uyur ɣar Lfuraṭ uca ksi ssenni abyas nni d ac umureɣ maḥend ad t teffared dinni.” 7 Xenni uyureɣ ɣar Lfuraṭ uca ɣziɣ u kkseɣ-dd abyas zeg wemcan mani t tuɣa ffareɣ. Xzar, abyas iḍeyyeɛ, war iǧi min umi ɣa infiɛ ɛad.

8 Xenni yusa-dd ɣari wawař n SIDI, inna: 9 “Ammu i iqqar SIDI: ‘Ammu i ɣa ssḍeyyɛeɣ nnfaxet n Yahuda uřa d nnfaxet tameqqrant n Urcalim.

10 Řgens-a aɛeffan wenni yugin ad iseř ɣar wawařen inu, wenni iḍeffaren řeqsaḥet n wuř nnes uca yareddef irebbiten nneɣni maḥend ad ten isexxar u ad asen yaḍar, řgens-a ad idweř amecnaw abyas-a i war ineffɛen i walu ɛad.

11 Maɣar mammec iqqen webyas i tejɛinnatin n weryaz, ammu i arriɣ marra taddart n Israil d marra taddart n Yahuda ad ɣari qqnent, ammu i iqqar SIDI, maḥend ad iřint d řgens inu d Yisem inu d ccan inu d uɛuǧi inu, maca nitni war sřin ca.”

12 “Cek ad asen tinid awař-a: ‘Ammu i iqqar SIDI, AREBBI n Israil: Qaɛ aɣarraf ad ittwaccur s binu. Xenni ad ac inin nitni ‘Ma zeɛma neccin war nessin simant nneɣ nican, aqa qaɛ aɣarraf ad ittwaccur s binu?’

13 Xenni ad d asen tinid: ‘Ammu i iqqar SIDI: Xzar, Necc ad arreɣ ad scaren marra imezdaɣ n temmurt-a, uřa d ijeǧiden nni iqqimen x řɛarc n Dawud, uřa d ikehhanen d inabiyyen d marra imezdaɣ n Urcalim.

14 Necc ad ten wteɣ di iwetwiten, ijj ak-d wenneɣni, ibabaten munen ak-d iḥenjiren, ammu i iqqar SIDI. Necc war ttḥinniɣ, war ssɛizziɣ u war areḥḥmeɣ maḥend war ten ttḍeyyiɛeɣ.’ ”

15 “Sřem u wcem amezzuɣ, war ttnefxem, maɣar SIDI issiweř.

16 Wcem ccan i SIDI, AREBBI nwem, qbeř i dd ɣa tas taǧest u qbeř i ɣa nqarḍen iḍaren nwem x idurar ibbubsen, am tᵉttrajam tafawt, waxxa Netta ad tt yarr d tiři n unuri uřa d aseynu ibbumbes. ^■  

17 Maca mařa kenniw war tesřim ɛad, xenni ad iru řeɛmar inu di tnuffra x nnfaxet nwem, ad iksi deg imeṭṭawen, uca ad dd-ssehwan imeṭṭawen zi tiṭṭawin inu, maɣar taḥimart n SIDI aqa tᵉttwandeh di tmeḥbast.” ^■  

18 “Ini i ujeǧid d yemmas n ujeǧid: ‘Swaḍɛem ixef nwem, qqimem deg wemcan ihwa, maɣar ttaj nwem icuwwaren tewḍa awem-dd x uzeǧif.’

19 Ttwabellɛent tneddam n Temmurt n Ljanub, uca uřa d ijj war tent yarezzem. Aqa ittwandeh marra Yahuda, ittwandeh imun. 20 Sgeɛɛdem tiṭṭawin nwem, u xzarem, man wen i dd-yusin zi ccamal! Mani teǧa tḥimart i d am immewcen, uǧi nnem icewwaren? ^□   21 Min i ɣa tinid mařa Netta ittegg inni i tessřemded maḥend ad iřin d imeddukkař nnem iɛizzen d azeǧif xam? Ma war cem dd-mennɛen řewjeɛ am ict n temɣart ittarwen?’ ”

22 “Xmi i ɣa tinid deg wuř nnem: ‘Mayemmi i d ayi iřqef marra aya?’, ssen aqa: ‘X ubarru n řmuɛṣiyyet nnem ttwasgeɛɛdent xam timmawin n warruḍ, ttwadeǧen inirzen nnem’. ^■   23 Ma izemmar ijj n weryaz zi temmurt n Kuc ad ibeddeř smex n teřmect nnes? Niɣ aɣiřas areqqiɛen nnes? Ma tzemmarem uřa d kenniw xenni ad tɛedřem, kenniw inni innumen tuɛeffna. 24 S uyenni Necc ad ten zuzzareɣ am uřum nni iṭṭawen s uṣuḍi n usemmiḍ n řexřa. ^□   25 Wa ggur ad yiři d zzhar nnem i d am dd-ikkaren zzayi, ammu i iqqar SIDI, minzi cem tᵉttud ayi u tᵉttecřed x ixarriqen. 26 Xenni uřa d Necc ad ssgeɛɛdeɣ ibeḥruren n warruḍ nnem ɣares ař tiwa aɣembub nnem uca ad ẓaren řefḍiḥet nnem: 27 zzina nnem d usneḥneḥ inezren nnem, farq-ccɣeř nnem infeḍḥen. X tewririn u deg iyyar ẓriɣ nnɛawat nnem n ṣṣanam. Uct xam, a Urcalim, war tᵉttwasizdiged ca! Ař meřmi ɛad awarni man aya?”