1 “Mařa necc ggur ad carrɛeɣ akidek, a SIDI, Cek ad tbaned d amsegged. Qaɛ amenni ttexseɣ necc ad siwřeɣ akidek x řeḥkamat nnek: mayemmi abrid n iɛeffanen iseggem, u mayemmi iɣeddaren řebda di arraḥet? ^■   2 Cek teẓẓud ten u nitni wtin iẓewran, nitni ɣemyen-dd u iwyen-dd řɣiǧet. Cek aqa tudsed aqemmum nsen, maca tiggʷejed x tiẓẓař nsen. ^□  ■  

3 Cek, a SIDI, tessned ayi, tᵉttwarid ayi u tqeǧbed uř inu, ma aqa-t akidek. Jbed i-ten am wuǧi i tɣarṣt u sqeddes i-ten i wass n řmewt. ^□  ■   4 Mecḥař ɛad i ɣa tekk temmurt tecḍen u afsu aziza ad yaẓeɣ deg iyyar marra? S tuɛeffna n yinni din izeddɣen, ḍeyyɛen řmař d yejḍaḍ, maɣar nitni qqaren: ‘Netta war ittwiři aneggar nneɣ.” ^■  

5 “Mařa tuzzřed ak-d inni ittazzřen x iḍaren, nitni ssaḥaren cek, mammec texsed ad tegged xenni ḥamat ak-d iysan? Mařa tᵉttacid aqa cek di řaman mɣir di temmurt n řehna, mammec i ɣa tegged xenni di cbarq iqqnen n yeɣzar n L'Urdun? 6 Maɣar uřa d aytmac d taddart n babac, uřa d nitni ɣeddaren cek, uřa d nitni sɣuyyun s jjhed awarni ac. War ten ttiqqim, waxxa ssawařen akidek mliḥ.” ^■  

7 “Necc semḥeɣ di taddart inu, Necc nḍareɣ tasɣart inu. Tenni issɛizz řeɛmar inu sellmeɣ tt deg ufus n řɛedyan nnes. 8 Tasɣart inu tedweř-dd akidi am ijj n wayrad deg wezɣar. Tessgeɛɛed-dd akidi tmijja nnes, x uyenni Necc dewřeɣ carrheɣ tt. ^□   9 Tasɣart inu i Necc am ujḍiḍ ibeqqḍen ittkeccaḍen, ttennḍen as ijḍaḍ ikeccḍen. Kkarem, munem-dd, marra řmař n yeyyar, ejj i-ten ad dd-asen ḥima ad ccen! ^■  

10 Imeksawen aṭṭas xarrben amarjuɛ inu n uḍiř, ɛefsen x yeyyar inu, aqa arrin iyyar iɛizzen inu d ijj n řexřa ixwa. ^□  ■  

11 Arrin iyyar d řxirbet, aqa ittwaxarreb, izzeř zzati icḍen. Marra tammurt txarreb minzi uřa d ijj war d as yecqi.

12 X marra tiwririn iqeccaren di řexřa usin-dd imteḥḥayyen, maɣar ssif iṣarḍ zi ṭṭarf n temmurt ař ṭṭarf nneɣni n temmurt. War din bu řehna i marra ddat.

13 Nitni zarɛen irden, maca mjaren isennanen, nitni uḥřen, maca břa inadan. Nitni ad sseḍḥan x ṣṣabet nwem zi ssibbet n řḥaduq n weɣḍab n SIDI.” ^■  

14 “Ammu i iqqar SIDI: ‘Marra ajjaren inu iɛeffanen nni i ɣa iḥadan tasɣart inu i wciɣ i řgens inu Israil d tasɣart, xzar, Necc ad ten qeřɛeɣ zi temmurt, maca taddart n Yahuda ad tt qeřɛeɣ zi řwest nsen. ^■  

15 Awarni řami ten qeřɛeɣ, ad dd-dewřeɣ u ad xasen ḥinneɣ uca Necc ad ten arreɣ ad ɛeqben, kuř ijj ɣar tesɣart nnes u kuř ijj ɣar temmurt nnes.

16 Xmi i ɣa řemden s tidett ibriden n řgens inu maḥend ad jjaǧen ɣar Yisem inu: ‘S tidett am iddar SIDI!’, amecnaw mammec nitni ssřemden řgens inu maḥend ad jjaǧen ɣar Baɛl, xenni ad ttwasbedden nitni di řwest n řgens inu.

17 Maca mařa nitni war ttexsen ad sřen, xenni Necc ad qeřɛeɣ řgens nni uca ad ten areddǧeɣ, ammu i iqqar SIDI.” ^■