1 “Sřem awař i zi ɣarwem dd-issawař SIDI, a taddart n Israil! 2 Ammu i iqqar SIDI: ‘War řemmdem abrid n řegnus i yixef nnek u war ttnexřiɛem zi řeɛřamat n ujenna, waxxa řegnus ttnexřaɛen zzaysent. 3 Maɣar min zi ttweṣṣan řegnus ad ifna, minzi aqa aya d akeccuḍ nni dd-qessen zeg wezɣar, d řxedmet n ifassen n bu-ṣṣenɛet nni igga s imeydi n wemziř. ^□  ■   4 Zewwqen tt s nnuqart d wureɣ, s imesmiren d ifḍisen ssmetnen tt ařami war teqqim tᵉttenxuxuř. ^■   5 Řexyařat-a aqa atent amecnaw ameyḍa i dd-iffɣen zi ṭṭabřa n usuyday, war zemmaren ad ssiwřen, ittxeṣṣa ad tent arbun, minzi war zemmarent ad uyurent. War zzaysent teggʷedem ca, maɣar nitenti war zemmarent ad ggent min iɛeffnen, u war zemmarent ad ggent min iṣebḥen.’ ” ^■  

6 “Uřa d ijj ma am Cek, a SIDI! Cek d ameqqran u Isem nnek d ameqqran s jjehd. ^■   7 Man wen war Cek itteggʷiden, Cek, a Ajeǧid n řegnus? Minzi aya yusa-dd xak, maɣar jar marra imiɣisen n řegnus u di marra tageldit nsen uřa d ijj ma am Cek.” ^■  

8 “Aqa-ten jmiɛ d ifɣar d ibuhařiyyen, minzi ttarbiyyet n řexyařat ibeṭṭiřen teffeɣ-dd zeg ukeccuḍ waha. ^■   9 Iwyen-dd nnuqart ittwabezzɛen zi Tarcic d wureɣ zi Ufaz, řxedmet n uḥrayfi uřa n ifassen n wemziř n wureɣ. Arruḍ nsen n ifiřan idehmaniyyen d arjuwaniyyen, marra řexyařat ggin tent yeryazen imiɣisen.”

10 “SIDI AREBBI d Tidett, Netta d AREBBI iddaren, d Ajeǧid n řebda. Tammurt tᵉttenhezza s uduqqez n weɣḍab nnes uca řegnus war zemmaren ad ksen asxeḍ nnes.”

11 “D man aya d asen i ɣa tinim: ‘Irebbiten nni war iggin ajenna uřa d tammurt, nitni ad ttwaqḍan zi temmurt d sadu ajenna.’ ”

12 “Netta maca igga tammurt s jjhed nnes, igga ddunect zi tiɣit u s řefhamet nnes ibezzeɛ ajenna. ^■  

13 Řami ittejja tmijja nnes ad tt sřen, xenni tegga am ucarcur n waman deg ujenna. Iseynuten issgeɛɛad i-ten zeg ineggura n ddunect, ittegg assam ak-d wenẓar u issekka-dd asemmiḍ zeg ixxamen n txubay nnes.” ^■  

14 “Kuř bnadem d agarruḍ, břa tussna, kuř amziř n wureɣ ittseḍḥa zi ssibbet n řexyař ineqcen i igga, maɣar řexyař nnes ifesyen d ixarriqen, war dayes iǧi buḥbeř.^■  

15 Řexyařat n ṣṣanam aqa fennant, aqa atent d timesřayin n tseḍḥact. Di řweqt mani tent i ɣa ɛaqben, ad fnant.”

16 “Tasɣart n Yaɛqub war teǧi amecnaw tasɣart nsent, minzi Netta d Wenni iggin marra, uca Israil d taqbič n tesɣart nnes, aqa SIDI n řɛeskarat d Isem nnes.” ^■  

17 “Sarweř sseřɛet zi temmurt nnem, a cem tamɣart nni izeddɣen di lqelɛa!

18 Maɣar ammu i iqqar SIDI: ‘Xzar, twařa aya ad nḍareɣ imezdaɣ n temmurt ɣar řaggʷaj uca ad asen dd-awyeɣ di řeḥṣaret, ḥima ad ttwaṭṭfen!’ ” ^■  

19 “Uct inu zi ssibbet n treẓẓit inu, ayezzim inu itteqqes ayi aṭṭas. Waxxa necc nniɣ: ‘Aya d ijj n řehřac u necc ad t ksiɣ!’ 20 Ittwaxarreb Uqiḍun inu u marra imurar n uqiḍun qeṭṭsen, iḥenjiren inu uyuren xafi u war da ǧin ɛad. War din wi i ɣa issbedden Aqidun inu uca ad xas yayeř tijartiřin nnes.”

21 “Maɣar imeksawen tuɣa qejḥen, SIDI war xas arzun. S uyenni tuɣa war geɛɛden u marra taḥimart n ddmani nsen tᵉttwazuzzar. ^□   22 Řeḥweř d ameqqran, aqa da, ddriz zi temmurt di ccamal, ḥima ad areddǧen tineddam n Yahuda, maḥend ad tt arren d tammurt n tzeddiɣt i wuccanen n řexřa.” ^■  

23 “Necc ssneɣ, a SIDI, aqa war dd-teqqim ɣar bnadem ad ixḍar abrid nnes, uřa i weryaz iggur maḥend ad indeh iṣuraf nnes. ^■   24 Seggem ayi, SIDI, maca s řḥeqq, war iǧi deg weɣḍab nnek, ḥima war d ayi tarrid d walu. ^■   25 Zeǧeɛ asɛar nnek x řegnus nni war Cek issinen, u x tqebbař nni war ittřiɣin Isem nnek, minzi nitni ṣarḍen Yaɛqub, ṣarḍen t uca qḍan xas uca hedmen amcan n tzeddiɣt nnes.” ^■