8
1 “Di řweqt nni, ammu i iqqar SIDI, ad ssuffɣen ixsan n ijeǧiden n Yahuda, ixsan n řḥukkam nsen, ixsan n ikehhanen nsen, ixsan n inabiyyen nsen d yexsan n imezdaɣ n Urcalim zeg imeḍřan nsen. 2 Ad bezzɛen ixsan i tfuct d tziri u i marra itran n ujenna, inni tuɣa ttexsen, inni umi tuɣa ttsexxaren, inni tuɣa iḍeffaran d yenni tuɣa zzaysen arezzun ccwar d yenni umi tuɣa ttaḍaren. War ten dd-yarrwen, war ten neṭṭřen, maca ad iřin d řeɣbar x wudem n temmurt. ■ 3 Nitni ad xsen řmewt x tudart jar marra inni iqqimen zeg yenni ittwasnejmen n teqbič n řgens-a taɛeffant, di marra imucan mani ǧan inni ittwasnejmen, mani xasen uẓẓřeɣ Necc, ammu i iqqar SIDI n řɛeskarat.” 4 “Ini asen: ‘Ammu i iqqar SIDI: Ma ad wḍan ař ɣa qqimen war ttekkaran ɛad? Ma ad xafi ḥeyyden u war dd-ttɛiqqiben? 5 Mayemmi iḥeyyed řgens-a, Urcalim tanita, řebda zzayi? Nitni cebbaren deg wecmat, ugin ad ɣari dd-dewřen. 6 Necc ssḥesseɣ, sřiɣ: min ssawařen war iǧi amenni, uřa d ijjen war indim x řɣar nnes, ad yini: Min ggiɣ? Kuř ijj iqqim ittazzeř am uyis ittazzřen ɣar umenɣi. 7 Uřa d abellarj deg ujenna issen ikuden ittwaggen nnes. Tajlilleḥt d tfařǧest nni iṭṭawen deg wenneḍ, ḥḍant řmijař n wuffuɣ nsent, řgens inu maca war issin řḥukm n SIDI. ■
8 Mammec teqqarem: Neccin d imiɣisen d Ccariɛa n SIDI aqa-tt akidneɣ! S tidett, xzar, řeqřem n ixarriqen n imariren igga Ccariɛa d axarriq. 9 Imiɣisen ttseḍḥan, tteggʷeden uca ttwaḥebbsen. Xzar, nḍaren awař n SIDI, xenni mammec i teǧa tiɣit i ɣarsen?”
10 “S uyenni ad wceɣ timɣarin nsen i inneɣni, iyyaren nsen i yenni i ɣa iḥewwsen tammurt, maɣar zeg umeẓyan ař ameqqran arezzun marra nitni tizi nsen, uca zeg unabi ař akehhan marra tcemmet. ■
11 Tareẓẓit n řgens inu xsen ad tt ssgenfan s řehwen, qqaren: ‘Řehna, řehna!’, maca war din iǧi řehna.
12 Ma ad sseḍḥan nitni, minzi tteggen jjɛifect? Nitni war ttseḍḥin ca, řeḥya war t ssinen. S uyenni ad wḍan jar inni iweṭṭan di řweqt meřmi zzaysen i ɣa xeřfeɣ ad nnqarḍen, ammu i iqqar SIDI.”
13 “Necc ad ten řeqḍeɣ qaɛ, ammu i iqqar SIDI. War iqqim ɛad uḍiř ɣar tzayart u war teqqim ɛad tazart ɣar tcejjart n wartu, ɛad tifray wḍant. Necc ad ɣarsen awyeɣ inni xasen i ɣa iɛefsen.”■
14 “Mayemmi da neqqim? Smunem ixef nwem, ejj aneɣ ad nadef ɣar tneddam ifaryen uca ad din nesqar. Aqa SIDI, AREBBI nneɣ, yarra aneɣ ad nesqar uca iwca aneɣ aman ismumen maɣar nexḍa x SIDI. ■
15 Nessittim di řehna, maca war din min iṣebḥen, di řweqt n usgenfi, maca xzar, mɣir asnexřiɛ. ■
16 Zi Dan ittwaseř usaḥart n yeysan nnes, zeg wesneḥneḥ n yeysan nnes tenhezza marra tammurt. Nitni ad dd-asen ad ccen tammurt d řɣiǧet nnes, tandint s imezdaɣ nnes. ■
17 Maɣar xzar, Necc ad ssekkeɣ jar awem ifiɣran, ifiɣran n arrhaj, akidsen war ineffeɛ uɛezzem. Ina ad kenniw zeɛfen, ammu i iqqar SIDI.” ■
Řeḥřiq deg wuř n Irmiya
18 “Amḥad inu aqa idweř d acḍan, uř inu yuḥeř deg ixef inu.
19 Xzar, řḥess n iɣuyyan n yeǧis n řgens inu zi temmurt tiggʷej: ‘Ma SIDI war iǧi di Ṣihyun, ma war dayes iǧi ujeǧid nnes?’ ”
“Mayemmi i d ayi sɛaren s řexyařat nsen ineqcen, s l’aṣnam nsen ifennan n ibarraniyyen?”
20 “Teɛdu tmeyra, iffeɣ unebdu, u neccin ɛad war nenjim.”
21 “Necc ttwarẓiɣ zi ssibbet n tareẓẓit n yessis n řgens inu. Necc arḍeɣ arruḍ d abarcan, icebbar dayi unexřiɛ. □ 22 Ma war din iǧi balsam di Jilɛad? Ma war dinni iǧi umesgenfu? Mayemmi war inniḍ uyezzim n yeǧis n řgens inu? ■ 23 Ax, mři azeǧif inu maca d aman, tiṭṭ inu d řɛunṣar n imeṭṭawen, xenni aziř d ǧiřet iři ruɣ x yenni ittwanɣen n yeǧis n řgens inu.” ■