1 Awař nni dd-iffɣen zi SIDI ɣar Irmiya, inna: 2 “Bedd di tewwart n Taddart n SIDI uca řaɣa dinni awař aya, ini: ‘Sřem awař n SIDI, a Yahuda marra, kenniw inni ittadfen zi tewwura aya ḥima ad tsejdem i SIDI. 3 Ammu i iqqar SIDI n řɛeskarat, AREBBI n Israil: Ɛedřem ibriden nnem d tmegga nwem, xenni Necc ad kenniw sszedɣeɣ deg wemcan-a. ^■   4 War ttcařem x wawařen n ixarriqen am teqqarem: ‘Zzawect Tameqqrant n SIDI, Zzawect Tameqqrant n SIDI, Zzawect Tameqqrant n SIDI, aqa-tt d ta zeɛma!’ 5 Maca mařa tɛedřem ibriden nwem d tmegga nwem nican, mařa s tidett tᵉtteggem s řḥeqq jar weryaz d umeddukkeř nnes, ^■   6 war ḥeṣṣarem abarrani, ayujiř d tajjač, u war ssizziřem idammen imezdagen deg wemcan-a u war ḍeffarem irebbiten nneɣni i uḍeyyeɛ nwem, ^■   7 xenni necc ad kenniw sszedɣeɣ deg wemcan-a, di temmurt i wciɣ i ibabaten nwem, zi řebda ař řebda. 8 Xzar, kenniw tᵉttcařam x ixarriqen nni war ineffɛen di walu. 9 Tᵉttacarem, tneqqem, tzennam, tᵉttjaǧam ẓur, tᵉttqeddamem tiwhibin n řebxur i Baɛl u tḍeffaram irebbiten nneɣni nni war tessinem,

10 uca xenni ad dd-tasem tbeddem zzat i wudem inu di Taddart-a min xef ittwabarreḥ s Yisem inu, teqqarem: ‘Neccin nettwasenjem!’, u xenni tᵉttɛawadem tᵉtteggem marra jjɛayef-a?

11 Ma tedweř Taddart-a min xef ittwabarreḥ Isem inu d ifri n ixewwanen di tiṭṭawin nwem? Xzar, Necc ẓriɣ t mliḥ!’, ammu i iqqar SIDI.” ^■  

12 “Minzi uyurem maca ɣar wemcan n Tzeddiɣt inu di Cilu mani tuɣa sszedɣeɣ Isem inu deg umezwaru. Xzarem min zzayes ggiɣ zi ssibbet n řɣar n řgens inu Israil. ^■  

13 Xenni řexxu, minzi kenniw teggim marra timegga-ya, ammu i iqqar SIDI, u Necc ssiwřeɣ akidwem zeg umezwaru maca kenniw war tesřim ca, u Necc řaɣiɣ-dd xawem, maca kenniw war dd-tarrim, ^□  ■  

14 s uyenni Necc ad ggeɣ ak-d Taddart-a min xef ittwabarreḥ Isem inu u min xef tᵉttcařam, u ak-d wemcan-a nni wciɣ i kenniw d ibabaten nwem, am mammec ggiɣ ak-d Cilu.

15 Necc ad kenniw nḍareɣ zi zzat n wudem inu, am mammec nḍareɣ marra aytmatwem, marra zzariɛet n Ifrayim.”

16 “Cek maca, war ttẓaǧa ca i řgens-a u war sgeɛɛed tmijja nnek ḥima ad trud niɣ ad tẓaǧed u war ttɣimi tᵉttrud-dd ɣari, maɣar Necc war ɣarek dd-ttesřiɣ. ^■  

17 Ma war tᵉttwiřid min tteggen nitni di tneddam n Yahuda u deg ibriden n Urcalim?

18 Iḥenjiren ssmunam akeccuḍ, ibabaten nsen ssraqqan timessi, u timɣarin tteggwent arecti ḥima ad sswejdent tifḍiřin i tjeǧidt n ujenna u ḥima ad farrɣent tiwhibin n useyyeb zzat i irebbiten nneɣni maḥend ad ayi sɛaren. ^■  

19 Ma sɛaren ayi, iqqar SIDI? Ma war t tteggen i yixef nsen i řefḍiḥet n simant nsen?” 20 “S uyenni, ammu i iqqar Sidi inu, SIDI, xzar, ad ittwafarreɣ weɣḍab inu d wesɛar inu x wemcan-a: x iwdan, x imuddaren, x tcejjura deg iyyar u x řɣiǧet n wudem n temmurt. Ad yareqq wah, u war izemmar ad ittwasexsi.”

21 “Ammu i iqqar SIDI n řɛeskarat, AREBBI n Israil: ‘Smunem tiɣarṣa n wecmaḍ nwem ak-d tɣarṣa nwem uca ccem aysum. ^■   22 Maɣar deg wass nni di ten ssuffɣeɣ zi temmurt n Miṣra, war ssiwřeɣ ak-d ibabaten nwem maḥend ad asen weṣṣiɣ x tɣarṣa n wecmaḍ d tɣarṣi. 23 Maca Necc umureɣ tamesřact-a umi nniɣ: ‘Sřem-dd ɣar tmijja inu, xenni Necc ad awem iřiɣ d AREBBI u kenniw ad ayi tiřim d řgens u ad tuyurem di abrid marra nni d awem i ɣa umureɣ maḥend ad tiřim mliḥ!’ ^■   24 Nitni maca war sřin u war d ayi wcin umezzuɣ, maca nitni ḍfaren ixarriṣen d řeqsaḥet n wuř aɛeffan nsen, u nitni dewřen ɣar ḍeffar, war iǧi ɣar zzat. ^■   25 Zeg wass nni di ffɣen ibabaten nwem zi Miṣra ař ass-a, ssekkeɣ-dd ɣarwem marra imsexxaren inu, inabiyyen. 26 Nitni war ɣari sřin u war d ayi wcin amezzuɣ. Nitni arnin di řeqsaḥet mahu ibabaten nsen. ^■   27 Ad kidsen tessawařed marra awařen-a, maca nitni war d ak ttesřin ca. Cek ad asen třaɣid, maca war xak dd-ttarrin. 28 S uya ini asen: ‘Wa d řgens i war ittesřin ɣar tmijja n SIDI, AREBBI nnes, u war ittejjin ixef nnes ad ittwawebbex. Aqa tidett tᵉttwareddeǧ u tᵉttwaqess zeg uqemmum nsen!’ ” ^■  

29 “Ḥeff acewwaf nnem uca nḍar i-t, wwet s igejduren x řegɛudi mani ttwehhben ddbayeḥ, maɣar SIDI inḍar jjiř min xef idduqqez ufugem nnes, uca ijja i-t. ^■   30 Maɣar iḥenjiren n Yahuda ggin min iǧan d aɛeffan di tiṭṭawin inu, ammu i iqqar SIDI. Nitni ssbedden nnɛawat nsen n ṣṣanam di Taddart min xef ittwařaɣa s Yisem inu maḥend ad tt ssxemmjen. 31 Nitni ssbedden řegɛudi n Tufat mani ttwehhben ddbayeḥ, d tenni iǧan di Teɣzurt n mmis n Hinnum, ḥima ad sscemḍen iḥenjiren d tḥenjirin nsen di tmessi, min ɛemmarṣ war d asen umureɣ d min ɛemmarṣ war d ayi dd-iddaren ɣar řbař.” ^□  ■  

32 “S uya, xzar, ad dd-asen wussan, ammu i iqqar SIDI inu, war d as ttřaɣan ɛad Tufat niɣ Taɣzurt n mmis n Hinnum, maca Taɣzurt n Wenɣay, uca di Tufat ad neḍřen imettan, minzi mani nneɣni war din amcan. 33 Řxecbat n řgens-a ad dewřent d macca i ijḍaḍ n ujenna u i řmař n yeyyar uca uřa d ijj war ten issiggʷid. ^■   34 Zi tneddam n Yahuda u zeg ibriden n Urcalim ad ssbeddeɣ tmijja n usřiwřew d tmijja n řefraḥet, tmijja n muřay d tmijja n tesřit, maɣar tammurt ad tedweř d řxarbet.”^■