6
1 “Siwḍem ixef nwem di řaman, a ayt n Binyamin, zi řwest n Urcalim, uca ṣuḍem deg uyicc n icarri di Taquɛa. Sgeɛɛdem acenyal s ddexxan zi Bayt-Ha-Karim, minzi issigʷad řɣar zi ccamal, lmuṣiba tameqqrant. ■ 2 Tamɣart icnan icewwaren, tayeǧit Ṣihyun ad tt sshellkeɣ. 3 Imeksawen ad ɣares dd-asen ak-d tḥimriwin nsen, nitni ad as dd-qewwaren am i ɣa wten iqiḍan nsen xas, kuř ijj ad yarwes di tesɣart nnes. □ 4 Qeddsem amenɣi ḍidd nnes, kkarem uca jjem aneɣ ad ɣares ngeɛɛed s uziř. Uct xaneɣ, maɣar ass ɛřayen iɛdu, minzi tiřiwin n tmeddit ttsarrḥent-i-dd. 5 Kkarem, jjem aneɣ ad ngeɛɛed s ǧiřet uca ad nehdem řeqṣur nnes!” 6 “Maɣar ammu i iqqar SIDI n řeskarat: ‘Qessem ticejjura, sbeddem acbar i řeḥṣaret ḍidd i Urcalim. Ta d tandint i ggur ad tᵉttwaɛaqeb, aqa-tt ddeǧ di řwest nnes marra. 7 Am wanu ittejja aman nnes ttbeqbuqen, ammu i tᵉttejja Urcalim ad ibbeqbeq min war iḥřin. Lɛunf d wareddeǧ ttwasřen dayes, řeḥřac d teyyita řebda zzat i tiṭṭawin inu. 8 Ejj i cem ad tᵉttwawebbxed, a Urcalim, ḥima řeɛmar inu war xam tᵉttemsebḍi, ḥima war cem ttarriɣ d řxarbet, d tammurt ixřan zeg imezdaɣ.’ ” 9 “Ammu i iqqar SIDI n řɛeskarat: ‘Am tzayart ad řeqḍen min iqqimen n Israil s cḍaret. Arr afus nnek ɣar tseḍwin, am wenni iřeqqḍen aḍiř. ■
10 Wi ɣar i ɣa ssiwřeɣ niɣ umi ɣa ɛeřmeɣ Necc, ḥima ad sřen? Xzar, amezzuɣ nsen war ittwaxten, ařami war zemmaren ad sřen i walu. Aqa da, awařen n SIDI ttafen ten d aḥecci, war ten ḥdijen.’ ” ■
11 “S uyenni ccureɣ s wesɛar n SIDI, aqa uḥřeɣ ad t menɛeɣ. Zeǧeɛ asɛar nnek xenni x iḥenjiren deg webrid uřa x umuni n iḥudriyyen, maɣar ɛad aryaz d temɣart ad ten ḥebbsen, ammu uřa d amɣar d uwessar.
12 Tudrin nsen ad dewřent i inneɣni, jmiɛ ak-d iḥwicen, uřa d timɣarin, maɣar Necc ad swiẓẓḍeɣ s ufus inu ḍidd imezdaɣ n temmurt-a, ammu i iqqar SIDI. ■
13 Maɣar zeg umeẓyan ař ameqqran arezzun marra nitni tizi nsen uca zeg unabi ař akehhan marra tcemmet. ■
14 Tareẓẓit n řgens inu xsen ad tt ssgenfan s řehwen, qqaren: ‘Řehna, řehna!’, maca war din iǧi řehna. □ ■
15 Ma ad sseḍḥan minzi tteggen jjɛifect? Nitni war ttseḍḥin ca, řeḥya war t ssinen. S uyenni nitni ad wḍan jar inni iweṭṭan. Ɣar řweqt nni ad zzaysen xeřfeɣ ad nnqarḍen, ammu i iqqar SIDI.”
16 “Ammu i iqqar SIDI: ‘Beddem ɣar ibriden, uca ḥdam, seqsam x ibriden n wecḥař uya, mani iǧa webrid nican uca uyurem xas, ammu i ɣa tafem arraḥet i řeɛmar nwem!’ Nitni maca qqaren: ‘Neccin war xas neggur!’ ■
17 Necc ggiɣ awem iɛessasen, nniɣ: ‘Sřem i uṣuḍi deg uyicc n icarri!’, maca nitni qqaren: ‘Neccin war ɣares nesḥessi ca!’ ”
18 “S uyenni sřem, a kenniw řegnus, uca ssen min din jar asen, a cem a tamesmunt!
19 Seř, a tammurt, xzar, Necc ad ssiwḍeɣ řɣar d ameqqran x řgens-a, řɣiǧet n inwayen nsen tiɛeffanin, maɣar nitni war xezzaren ca ɣar wawařen inu u nḍaren Ccariɛa inu. 20 Mayemmi i d ayi dd ɣa yawyen jjawi zi Caba d uɣanim uḥemmum ittfuḥen zi temmurt yiggʷejen? Tiɣarṣa n wecmaḍ nwem war d ayi dd-usint i řxaḍar u tiɣarṣa nwem war d ayi ɛjibent.” ■
21 “S uya ammu i iqqar SIDI: ‘Xzar, Necc ad ggeɣ i řgens-a tiɛenkrifin uca nitni ad daysent nnqarḍen jmiɛ ak-d ibabaten d iḥenjiren, ajjar d umɛacar nnes, ammu i ɣa hellken.’ ”
22 “Ammu i iqqar SIDI: ‘Xzar, ad dd-yas ijj n řgens zi ccamal, ijj n řgens ameqqran ad ittwařaɣa zeg ineggura n temmurt. ■ 23 Nitni ṭṭfen řqews d weḥric, aqa-t d ijj n řgens iwɛar, war arreḥmen. Ddriz nsen igga am zzhir n řebḥar uca nitni nyin x yeysan. Am weryaz n umenɣi ammu i issbedd netta ixef nnes ḍidd nnem, a tayeǧit Ṣihyun!”
24 “Neccin nesřa xas řexbar, arxun aneɣ ifassen nneɣ, iřqef aneɣ unedqef, řeḥriq am n temɣart ittarwen. ■ 25 War tteffɣem ɣar barra ɣar yeyyar, war ggurem deg webrid, maɣar aqa din ssif n řeɛdu, tiggʷudi aqa-tt mani mma! 26 A yeǧis n řgens inu, beyset ixef nnem s txancet n wecḍan uca zuzzar xam taɛejjajt, ceḍnet am x uyenni n mmis nnem, sɣuyy s tɣuyyit tamerzagt, maɣar deɣya ad xaneɣ dd-yas umteḥḥay.” ■
27 “Necc ggiɣ cek d ṣṣumɛet n tɛessast di řgens inu, amecnaw lqelɛa, ḥima ad tessned abrid nsen uca ad dayes tarzud.”
28 “Nitni marra d inni iḥeyyden x webrid zi markat iwɛaren qaɛ, gguren ttennḍen di temmurt ttceqqafen, nitni am nnḥas d wuzzař, marra idsen d ayt n bu-imurḍas. ■ 29 Arrabuz icmeḍ, řexfif tecca t tmessi, maca di řbaṭeř issefsi ufessay ammu s wecḍar, iɛeffanen war zemmaren ad ttwafarzen. 30 Qqaren as: ‘Nnuqart immenḍaren!’, maɣar inḍar i-ten SIDI.” ■