1 “Uyurem di dcurat n Urcalim, uca xzarem mliḥ, iřim tfetnem u arzum deg izuraj nnes, ma ad tafem ijjen, ma din ijj ittegg tasegda, ijjen wenni yarezzun tidett, xenni Necc ad as ɣfareɣ i Urcalim. ^□   2 Nitni qqaren: ‘S tidett am iddar SIDI!’, waxxa amenni nitni ttjaǧan ẓur.”

3 “A SIDI, ma war ḥeṭṭant tiṭṭawin nnek x tidett? Cek tewtid ten, maca war ucin ak-d řeḥriq, cek teqḍid ten, maca war xsen ad ttwarebban. Nitni ggin tanyart nsen iqesḥen x weẓru, nitni ugin ad dd-dewřen. ^■  

4 Necc nniɣ: ‘Ah, nitni d řmusakin, tteggen tubbuheřya, minzi nitni war ssinen abrid n SIDI, tasegda n AREBBI nsen. 5 Necc maca ad uyureɣ ɣar imeqqranen uca ad kidsen ssiwřeɣ, minzi nitni war ssinen ca abrid n SIDI, tasegda n AREBBI nsen.’ Nitni jmiɛ maca arẓin zzayřet, qeṭṭsen iseɣwan. 6 S uyenni iwwet i-ten wayrad n tagant, imezzeq i-ten wuccen zi řewḍat, ittḥama uɣiřas tineddam nsen. Kuř ijj wenni dd ɣa iffɣen zi tendint, ad t carrgen, maɣar iɛeddiyen nsen d aṭṭas u aḥeyyed nsen imɣar.” ^□  ■  

7 “Mammec zemmareɣ ad awem ɣfareɣ man aya? Iḥenjiren nnek semḥen dayi uca jjuǧen ɣar min war iǧi d AREBBI. Řami ten ssjiwneɣ, zennan nitni, uca ssmunen s ddḥas ɣar wexxam n temɣart n farq-ccɣeř. 8 Nitni d ikidaren iɛeřfen ittelɛen. Kuř ijj issneḥniḥ ɣar temɣart n wenneɣni. ^■   9 Ma war tᵉttɛiqibeɣ x man aya, ammu i iqqar SIDI, niɣ war ittentiqim řeɛmar inu zi řgens am wanita?” ^■  

10 “Gaɛɛdem x řeḥyuḍ nnes uca hedmem ten, maca war ten messḥem qaɛ zi temmurt. Qeřɛem izbiren nsen, maɣar nitni war ǧin ca n SIDI. ^■  

11 Taddart n Israil d taddart n Yahuda maca ɣdaren ayi s waṭṭas, ammu i iqqar SIDI. ^■  

12 Nitni nekkaren SIDI, qqaren: ‘Netta war din iǧi, war d aneɣ iřeqqef řɣar, war nettwiři ssif uřa d řaẓ.’

13 Inabiyyen ad dewřen am usemmiḍ uca war din iǧi wenni zzaysen issawařen. Ammu i d asen ɣa imsar.”

14 “S uya iqqar SIDI, AREBBI n řɛeskarat: ‘Minzi kenniw teqqarem awař-a, xzar, Necc ad ggeɣ awařen inu deg uqemmum nnek d timessi uca řgens-a ad t ggeɣ d akeccuḍ, uca ad ten tecc tmessi. ^■  

15 Xzar, a taddart n Israil, Necc ad xawem ssiwḍeɣ ijj n řgens zi řaggʷaj, ammu i iqqar SIDI. Aqa-t d řgens iwɛar, řgens zeg wecḥař uya, řgens i zi war tessined cek awař nnes, u war tfehhmed min qqaren nitni. ^■  

16 Azeɛbuř nnes n fřitcat igga am ijj n wenḍeř yarezmen, nitni marra d ayt n bu-teɣruḍt.

17 Ad icc řgens nni ṣṣabet nnem d weɣrum nnem, ad icc iḥenjiren nnem d yessim, ad icc uǧi nnem d ifunasen d tfunasin nnem, ad icc tazayart nnem d wartu nnem, uca s ssif ad iwwet tineddam nnem ifaryen min xef tᵉttecřed.” ^■  

18 “Maca uřa deg wussan nni, ammu i iqqar SIDI, Necc war kenniw qeṭṭiɣ marra. ^■  

19 Mařa xenni kenniw teqqarem: ‘Mayemmi i d aneɣ igga SIDI, AREBBI nneɣ, marra aya?’, xenni ad asen tinid: ‘Am mammec kenniw dayi tsemḥem, tᵉttsexxarem i irebbiten iɣriben di temmurt nwem, ammu i ɣa tsexxarem i ibarraniyyen di temmurt war iǧi nwem.’ ” ^■  

20 “Barrḥem aya i taddart n Yaɛqub uca jjem ad t sřen di Yahuda, ini: 21 ‘Sřem i waya, a cek řgens abuhaři u nehřa wuř! Kenniw ɣarwen tiṭṭawin, maca war ttwiřin, imezzuɣen, maca war ttesřin. ^■   22 Ma war d ayi tteggʷedem, ammu i iqqar SIDI. Ma war tᵉttexsem tᵉttarjijim zzat i wudem inu, i Necc wenni iggin i řebḥar ijdi d weymir, d ict n tewṣeyyet i řebda tenni war zemmaren ad ɛdun řemwaj. Aqa ttenhezzan, maca waxxa amenni war zemmaren, tthajan, maca waxxa amenni war tt ɛeddun.’ ^■   23 Maca řgens-a ɣares uř iḥeyyden d iɣewwɣen. Nitni ḥeyyden x webrid uca ffɣen. 24 Nitni war qqaren deg yixef nsen: ‘Ejj aneɣ ad neggʷed SIDI, AREBBI nneɣ nni itticen anẓar di řweqt nnes, ammu anẓar n zic uřa d anẓar n řexmim, wenni iḥeṭṭan simanat ittwaggen n tmeyra i neccin.’ ^■   25 Řmuɛṣiyyat nwem menɛent man aya u ddnub nwem ṭṭfen xawem min icnan.

26 Wah, aqa ufin iɛeffanen di řgens inu. Nitni ttḥaman am iyemmaren n yejḍaḍ. Ssbeddan taxceft ineqqen, arzun ad ṭṭfen iwdan. 27 Am řeqfez iccur s ijḍaḍ, ammu tudrin nsen ccurent s řɣecc. Zeg uya dewřen nitni d imeqqranen d ayt n bu-wagřa. 28 Aqa nitni uffen s tadunt, aqa aten d iḥraymiyyen, s tmegga nsen ssɛeddun nitni timegga tiɛeffanin aṭṭas. War ḥekkmen s řḥeqq di ddeɛwet, uřa di ddeɛwet n uyujiř, waxxa amenni nitni feřḥen. Ɛawed war cciten x tesɣart n imezřaḍ. ^■   29 Ma war ttɛiqibeɣ x man aya, ammu i iqqar SIDI, niɣ ma war ixeǧef řeɛmar inu zi řgens am wanita?” ^■  

30 “Min ittenexřaɛen u min iǧan d nnɛi aqa imsar di temmurt. 31 Inabiyyen ttnebban s ixarriqen uca ikehhanen ttṣeǧḍen sadu ufus nsen, uca řgens inu ittexs i-t ammu. Min i ɣa teggem xmi dd ɣa yaweḍ qeṭṭu?” ^■