Břa ttubet war ittiři weɛqab
4
1 “Mařa texsed ad dd-tɛeqbed, a Israil, ammu i iqqar SIDI, ɛqeb-dd ɣari, u mařa tekksed marra nnɛawat n ṣṣanam x wudem inu, war ttɣimi ca teddurid waha. 2 Jaǧ s tidett, s řḥeqq u s tsegda, ini: ‘S tidett am iddar SIDI!’, xenni ad zzayes ttwabarken řegnus uca ad dayes ssɛuǧen ixef nsen. ■ 3 Maɣar ammu i iqqar SIDI i yeryazen n Yahuda u i Urcalim: ‘Carzem iyyar ixwan i yixef nwem, maca war zarrɛem deg isennanen. 4 Xetnem ixef nwem i SIDI u ssiggʷejem řeɛdařeyyat n wuřawen nwem, kenniw iryazen n Yahuda d kenniw imezdaɣ n Urcalim, ḥima asɛar inu war ittareẓẓi am tmessi, ad icmeḍ břa ma izemmar uřa d ijj ad issexsi, zi ssibbet n tmegga nwem tiɛeffanin.’ ” ■ Ahjam zi řgens i dd-yusin zi ccamal
5 “Barrḥem tt di Yahuda u jjem ad as sřen di Urcalim, inim: ‘Ṣuḍem deg uyicc n icarri di temmurt!’, sɣuyyem s tmijja ijehden, inim: ‘Smunem, asem-dd ɣar tneddam ifaryen!’ 6 Sgeɛɛdem taɛeǧant i Ṣihyun, war ttɣimim tbeddem, maɣar Necc ad ssiwḍeɣ řɣar zi ccamal, lmuṣiba tameqqrant. 7 Ayrad igeɛɛed-dd zi cbarq n řmargeḥ nnes, amteḥḥay n řegnus iruḥ deg webrid, iffeɣ-dd zeg wemcan nnes maḥend ad yarr tammurt nnem d řxarbet. Tineddam nnem ad ttwareddǧent ařami war daysent ittɣimi uřa d ijj n umezduɣ. ■ 8 S uyenni, arḍem txancat n wecḍan, ceḍnem u weɛɛḍem, maɣar war xaneɣ iḥeyyed řḥaduq n weɣḍab n SIDI.” ■
9 Ammu i iqqar SIDI: “Deg wass nni ad imsar, aqa uř n ujeǧid d uřawen n řḥukkam ad asen traḥ taryast u ikehhanen ad nnxeřɛen uca inabiyyen ad tbehten.”
10 Xenni nniɣ: “Ax, Sidi inu, SIDI, s tidett, aqa Cek tcemted řgens-a d Urcalim umi tennid: ‘Ad ɣarwem yiři řehna!’ Xzar, ssif yudef-dd ɛad ɣar řeɛmar nneɣ!”
11 “Deg wass nni ad inin i řgens-a u i Urcalim: ‘Asemmiḍ issecmaḍ zi tewririn tiqeccarin di řexřa aqa-t deg webrid ɣar yeǧis n řgens inu, war ittiři i uzuzzar niɣ i uṣeffi.’
12 ‘Ad iffeɣ zi ɣari ijj n usemmiḍ ijhed x wanita. Řexxu Necc simant inu ad ten ḥekmeɣ.”
13 ‘Xzar, igeɛɛed am iseynuten uca ikarruten nnes ggin am tḥaryaḍt, iysan nnes ttizwaren i igidaren. Uct nneɣ, neccin nettwareddeǧ!’ ”
14 “Sird uř nnem zi tuɛeffna, a Urcalim, maḥend ad tᵉttwasnejmed! Mecḥař ɛad i ɣa kken zeddɣen ixarriṣen iɛeffanen deg wuř nnem? □ ■
15 Minzi tmijja tᵉttbarreḥ zi Dan uca tᵉttwaseř tecti tameqqrant i-dd-ittqarraben zeg idurar n Ifrayim.
16 Barḥem zzayes di Yahuda u jjem ad as sřen di Urcalim, inim: ‘Inni i ɣa iḥṣaren aqa usin-dd zi temmurt tiggʷej, nitni ssgeɛɛaden tmijja nsen ḍidd i tneddam n Yahuda.’
17 Nnḍen as-dd am iɛessasen deg iyyaren, maɣar nettat tɣewweɣ xafi, ammu i iqqar SIDI.”
18 “Tabrit nnem d tmegga nnem iwyen am-dd aya. Aqa-t d actab abarcan nnem, yarzeg, iřeqqef i cem deg wuř nnem.”
19 “Ɛawen ayi, aɛeddis inu, aɛeddis inu, necc ttfarfireɣ s řewjeɛ, a iɣezdisen n wuř inu, uř inu ineggez, necc war zemmareɣ ad seɣdeɣ, maɣar aṣuḍi n uyicc n icarri yudef ɣar řeɛmar inu, uct aṣudi n umenɣi. ■ 20 ‘Ticti x tecti!’, ammu i sɣuyyun, minzi marra tammurt txarreb. Deɣya ttwahedmen iqiḍan inu, deg wermac n wabřiwen tjartiřin n uqiḍun inu! □ 21 Ař meřmi ɛad ad twařiɣ taɛeǧant n umenɣi uca ad sřeɣ i uṣuḍi deg uyicc n icarri?”
22 “Řgens inu d abuhaři, nitni war d ayi ssinen. Nitni d iḥenjiren břa řeɛqeř u war ɣarsen teǧi řefhamet. Nitni d imiɣisen maḥend ad ggen řɣar, maca war ssinen ad ggen min iṣebḥen.”
23 “Necc ẓriɣ tammurt, xzar, tuɣa-tt d řexřa d řxawi u war ufiɣ tafawt deg ujenna. 24 Necc ẓriɣ idurar, xzar, ttarjijin uca marra tiwririn ttenhezzant ttraḥent d ttasent i-dd. 25 Necc twařiɣ, xzar, war din uřa d ijj n bnadem, u marra ijḍaḍ n ujenna tuɣa ḍwin. 26 Necc ẓriɣ, xzar, tammurt isseɣmayen tuɣa d řexřa uca marra tineddam nnes ttwahedment di ssibbet n řḥaduq n weɣḍab n SIDI.”
27 “Maɣar ammu i iqqar SIDI: ‘Marra tammurt-a ad tedweř d řxarbet, maca Necc war ggur ad tt qeṭṭɛeɣ marra. ■ 28 S uya i ɣa tecḍen temmurt uca ad bbarcnen ijenwan sennej, maɣar aqa Necc nniɣ t, Necc ggiɣ xas. Necc war ndimeɣ ca u Necc war ddikkwiřeɣ deg wawař. 29 Zi ddriz n imnayen n yeysan d imjebbaden n řqews tarweř tendint marra. Nitni arezzun ad dd-adfen deg izeɣran uca ad geɛɛden x řejruf, tandint marra tᵉttwajj, war dayes iqqim uřa d ijj n umezduɣ.’ ”
30 “Min i ɣa tegged xenni, a cem tandint tᵉttwareddeǧ? Waxxa ad tyarḍed arruḍ d azeggʷaɣ niɣ ad teqqned řehzuṭ n wureɣ niɣ ad tkeḥḥřed tessemɣarid tiṭṭawin nnem, aqa baṭeř ad tzewwqed ixef nnem. Imeɛcaqen ad cem ssḥeqqaren, ad arzun ad cem nɣen. □ 31 Maɣar necc ttesřiɣ tmijja, axmi zi temɣart ittarwen, axmi zeg icten tḥeṣṣar di tarwa tamezwarut, tmijja n tyeǧit Ṣihyun, třeqqeḍ-dd nnefs, tesswaẓẓaḍ s ifassen nnes uca tesɣuyyu: ‘Uct inu, maɣar řeɛmar inu ifna s yenni ixsen ad ayi nɣen!’ ”