1 “Qqaren: ‘Xzar, ijj n weryaz iǧef i temɣart nnes u nettat tuyur as, tedweř d tamɣart n ijj nneɣni, ma iɛeddeř ad ɣares dd-iɛqeb xenni? Ma war texmij temmurt nni aṭṭas?’ Cem maca tfesded ixef nnem ak-d ijj n ubarru n imeddukkař, ma xenni tzemmared ad ɣari dd-tɛeqbed, ammu i iqqar SIDI? ^■   2 Sgeɛɛed tamuɣři nnem di řegɛudi i xef wehhben tiɣarṣa, xzar, mani war cem xarḍen? Aqa tuyured ad teqqimed deg ibriden marra am ijj n Weɛrab di řexřa. Ammu i tessfesded tammurt s farq-ccɣeř nnem d řɣar nnem. 3 S uya ittwamneɛ wenẓar uca war dd-iwti wenẓar ajuri. Maca cem tuɣa ɣarem tanyart teqjar n temɣart n farq-ccɣeř, war texsed ad tesseḍḥid. 4 Ma zi řexxu d tsawent war d ayi tᵉttřiɣid ‘Baba! Cek d Ameddukkeř inu zi temẓi inu!? 5 Ma ad iqqim weɣḍab nnes ittbedda i řebda? Ma Netta ad t iḥḍa i řebda?’ Xzar, ammu i teqqared, am tᵉttegged mařa timesřayin nni tiɛeffanin u tᵉttxarrṣed aqa aya iɛeddeř ad ittwagg.”

6 SIDI inna ayi deg wussan n Yuciya: “Ma teẓrid min tegga temɣart Israil ikfaren? Nettat tgeɛɛed kuř adrar yuɛřan uca tezzeř sadu kuř tacejjart tazizawt uca tegga din am temɣart n farq-ccɣeř! ^□  ■   7 Awarni řami tegga aya, nniɣ as: ‘Dweř-dd ɣari!’ , maca nettat war dd-tedwiř ca. Xenni teẓri aya učmas iɣeddaren Yahuda. 8 Ẓriɣ, umi d as ǧfeɣ zi ssibbet n marra man aya min zi tezna temɣart Israil ikfaren, aqa aya war issnexřiɛ učmas taɣeddart Yahuda, maca nettat tuyur, tessefsed ixef nnes uřa d nettat s farq-ccɣeř nnes. 9 S farq-ccɣeř nnes ihewnen, tᵉttwasexmej temmurt, maɣar nettat tezna s weẓru d ukeccuḍ.

10 Di marra aya war dd ɣari teɛqib s marra uř nnes uřa d učmas Yahuda taɣeddart, maca tessniɛmiř waha, ammu i iqqar SIDI.”

11 S uya inna ayi SIDI: “Tawečmat Israil ikfaren, aqa tarra ixef nnes tban-dd tsegged ktar x učmas Yahuda taɣeddart.

12 Uyur, řaɣa awařen-a ɣar ccamal, ini: ‘Dweř-dd, a cem Israil ikfaren!’ , ammu i iqqar SIDI. Aɣembub inu war ittbarcin, maɣar Necc ccureɣ s tmexsiwt icewwaren, ammu i iqqar SIDI. Necc war ttiřiɣ ttfugmeɣ řebda. ^■  

13 Maca nɛem s řmuɛṣiyyet nnem, aqa tɛeddid x SIDI, AREBBI nnem, uca teffɣed zeg webrid ɣar marra iɣezdisen ɣar ibarraniyyen, sadu kuř tacejjart tazizawt, maca kenniw war tesřim ca ɣar tmijja inu, ammu i iqqar SIDI inu.”

14 “Dewřem-dd, a tarrawt ikfaren!, ammu i iqqar SIDI, maɣar Necc dewřeɣ d aryaz nwem, Necc ad kenniw qebřeɣ ɛawed, ijj zeg ict n tendint, u tnayen zeg ijj n řaǧ, u Necc ad kenniw awyeɣ ɣar Ṣihyun.

15 Necc ad awem wceɣ imeksawen i ixs wuř inu, inni kenniw i ɣa yarewsen s tussna d řeɛqeř. ^■  

16 Xmi i ɣa temmarenyem deg wussan nni uca ad dd-tawyem řɣiǧet di temmurt, iqqar SIDI, ad tafed war qqaren ɛad ‘Ttabut n Řɛahd n SIDI!’ War dd asen tᵉttaři ɣar řbař, war tt ttidaren, war tt feqqden ɛad uca war ggur ad t sennɛen ɛad.”

17 “Di řweqt nni ad inin i Urcalim ‘Řkursi n SIDI!’, uca marra řegnus ad ɣares dd-nnyarwen di ṭṭweɛ n Yisem n SIDI, ɣar Urcalim, uca war ttɣimin gguren ca ɛlaḥsab řeqsaḥet n wuř nsen aɛeffan.

18 Deg wussan nni ad tuyur taddart n Yahuda ɣar taddart n Israil uca nitenti ad ffɣent munent zi temmurt n ccamal ɣar temmurt nni wciɣ d tasɣart i ibabaten nwem.”

19 “Necc tuɣa nniɣ: ‘Mammec zemmareɣ ad kenniw arreɣ d iḥenjiren inu uca ad awem wceɣ tammurt iɛizzen, tasɣart nni iǧan d talwizt n řɛeskarat n řegnus?’ Necc nniɣ: ‘Kenniw ad ɣari řaɣan: Baba! uca war xafi tᵉttḥeyyidem ɛad’. 20 S tidett, am temɣart teɣdar ameddukkeř nnes, ammu uřa d kenniw tiɣdarem ayi, a taddart n Israil, ammu i iqqar SIDI.”

21 Ittwaseř ijj n řḥess x tewririn iqeccaren, anixses d tutra n ayt n Israil, minzi nitni uyuren ibriden farɣen uca SIDI, AREBBI nsen, ttun t.

22 “Dewřem-dd, a tarrawt ikfaren!”, Necc xseɣ ad ssgenfiɣ akfar nwem.

“Xzar, aqa aneɣ da, neccin nusa-dd ɣarek, maɣar Cek d SIDI, AREBBI nneɣ!”

23 “Nican, x walu i ittraja bnadem zi řegɛudi n tewhibin d ǧɣareɣ x idurar. D tidett, di SIDI, AREBBI nneɣ, aqa iǧa usenjem n Israil. ^■   24 Řefḍiḥet tecca řxedmet n ibabaten nneɣ, zi temẓi nneɣ: uǧi nsen d ifunasen d tfunasin nsen, iḥenjiren nsen d tḥenjirin nsen. 25 Neccin nezzeř di řefḍiḥet nneɣ uca řeḥya nneɣ tedřa aneɣ, maɣar neccin nexḍa ak-d SIDI, AREBBI nneɣ, neccin d ibabaten nneɣ, zi temẓi nneɣ ɣares ař iḍa. Neccin war nesři ca ɣar tmijja n SIDI, AREBBI nneɣ.”