144
1 N Dawud. Ad ittwabarek SIDI, Taṣḍart inu,
wenni isseřmaden ifassen inu i umenɣi,
iḍewḍan inu i řḥarb. ■
2 Cek d tamexsiwt inu icewwaren d lburj inu,
lburj inu yuɛřan d amsenjem inu,
taseddart inu i useřqi d wenni xef ttecřeɣ,
d wenni d ayi isswaḍḍɛen řgens inu. ■
3 A SIDI, min iɛna bnadem, aqa Cek tessned t,
mmis n bnadem, aqa Cek txarriṣed dayes? ■
4 Bnadem d řefwar d ijjen,
ussan nnes ad ɛdun am tiři. ■
5 Meyyeř ijenwan nnek, a SIDI, hwa-dd.
Ḥada idurar, xenni ad ggen ddexxan.■
6 Ẓaryeḍ assamen u zeǧeɛ i-ten,
sekk fřitcat nnek u sxarweḍ i-ten. ■
7 Swiẓẓeḍ ifassen nnek zi sennej,
suffeɣ ayi-dd u fekk ayi zi řḥemřat n waman timeqqranin,
zeg ufus n ibarraniyyen,
8 maɣar aqemmum nsen iqqar ixarriqen,
afus nsen afusi d ijj n ufus iccur s řɣecc.
9 A AREBBI, ad ac ɣennjeɣ ijj n yezři d n jdid i Cek,
s lharpa u s lɛud s ɛecra n ifiřan ad ac zehhdeɣ.
10 Cek d wenni issawaḍen asenjem i ijejǧiden,
d wenni ifekken amsexxar nnes Dawud zi ssif aɛeffan.
11 Suffeɣ ayi-dd u fekk ayi zeg ufus n tarwa n ubarrani,
zeg wenni ɣar iǧa uqemmum iqqar mɣir ixarriqen,
u zeg wenni ɣar iǧa ufus afusi iccur s řɣecc,
12 ḥima iḥenjiren nneɣ ad iřin am iɣeddiwen,
inni imɣaren ɛad di temẓi nsen,
yessitneɣ am tɣemmar i ggin s ukeccuḍ s ɛřam kuř arcamen,
ggin ten i yict n zzawect iqeddsen.
13 Maɛlik řehrit nneɣ ccuren,
ad wcen zzad awarni zzad,
ad yarni wuǧi nneɣ s řuřuf n tseqqar,
s ɛecra n řuřuf n tseqqar di ddmani n tarewsa nneɣ.
14 Ad ḥemřen imwan nneɣ mliḥ,
war iṭṭiři ɛad uhjam niɣ d uffuɣ i umenɣi
uřa d iɣuyyan deg imesraq nneɣ.
15 Sseɛd n řgens nni iǧan amya.
Sseɛd n řgens nni zi AREBBI nsen d SIDI.