1 Tuɣa din ijj n weryaz di temmurt n Ɛuṣ qqaren as Ayub. Aryaz-a tuɣa ikmeř d amsegged, itteggʷed zi AREBBI u ittḥeyyad x min iǧan d aɛeffan. ^■   2 Ttwarwen as-dd sebɛa n iḥenjiren d třata n tḥenjirin. 3 Taḥimart n řmař nnes dayes sebɛa-ařaf n wuǧi u teřt-ařaf n iřeɣman d xemsa-mya n ifunasen n teɣnact d xemsa-mya n teɣyař, arni ɣares abarru n isemɣan. Aryaz-a tuɣa d ameqqran x marra arraw n ccarq.

4 Iḥenjiren nnes nnumen tteggen ijj n umensi, kuř ijj zzaysen s nnubet nnes deg wass nnes di taddart nnes. Ssekkan, ɛarḍen uřa x třata n yessmatsen ad kidsen ccent u ad kidsen swent. 5 Řami ɛdun wussan n umensi, issekk Ayub ḥima ad ten issqeddes. Zic ɣar tuffut ikkar uca yiwi din tiɣarṣi n wecmaḍ anect lɛadad n marra iḥenjiren nnes. Maɣar Ayub inna: “Ad taɣ xḍan iḥenjiren inu u ḥeyyden x AREBBI deg wuř nsen.” Ammu i ittegg Ayub řebda.

6 Deg ijj n wass usin-dd arraw n AREBBI ḥima ad bedden zzat i SIDI, uca yusa-dd uřa d cciṭan di řwest nsen. 7 Inna SIDI i cciṭan: “Manis i dd-tusid cek?” Yarra-dd cciṭan x SIDI, inna: “Usiɣ-dd zeg wetlaɛ x temmurt, kkiɣ tt marra.” ^■   8 Inna SIDI i cciṭan: “Ma teḥḍid amsexxar inu Ayub? Amecnaw netta war iǧi x temmurt: d aryaz ikmeř, iggur nican, itteggʷed AREBBI u ittḥeyyad x min iǧan d aɛeffan!”

9 Yarra-dd cciṭan x SIDI, inna: “Ma amenni waha itteggʷed Ayub AREBBI?

10 Ma war iǧi d Cek wenni iggin ijj n wefray n cbarq ak-d isennanen i netta d taddart nnes d marra min ɣares? Aqa tbarked timegga n ifassen nnes uca řmař nnes imɣar aṭṭas di temmurt.

11 Swiẓẓeḍ mɣir afus nnek ɣares, ḥada marra min iǧan nnes, ma xenni s tidett ad ibeɛɛed x wudem nnek?”

12 Xenni inna SIDI i cciṭan: “Xzar, marra min ɣares aqa-t deg ufus nnek. Mɣir war d as swiẓẓiḍ afus nnek waha!” Xas uca yuyur cciṭan zi zzat n wudem n SIDI.

13 Deg wass min di tuɣa iḥenjiren nnes d yessis ttᵉtten u sessen binu di taddart n umatsen amenzu, imsar,

14 aqa yusa-dd ureqqas ɣar Ayub, inna: “Ifunasen tuɣa carrzen u tiɣyař heddant x uɣezdis nsen.

15 Xenni hejmen ayt n Saba, ksin ten uca nɣin iḥudriyyen s řeqḍeɛ n ssif. Mɣir necc waha inejmen, ḥima ad ac t ɛawdeɣ.”

16 Umi tuɣa wa ɛad issawař, yusa-dd ijj nneɣni, inna: “Timessi n AREBBI tewḍa-dd zeg ujenna uca tarɣa deg wuǧi d iḥudriyyen uca tecca i-ten. Mɣir necc waha inejmen, ḥima ad ac t ɛawdeɣ.”

17 Umi tuɣa wa ɛad issawař, yusa-dd ijj nneɣni, inna: “Ayt n Ikaldaniyyen ssbedden třata n bandiyyat, hejmen x iřeɣman, ksin ten uca nɣin iḥudriyyen s řeqḍeɛ n ssif. Mɣir necc waha inejmen, ḥima ad ac t ɛawdeɣ.”

18 Umi tuɣa wa ɛad issawař, yusa-dd ijj nneɣni, inna: “Iḥenjiren nnek d yessic ccin u swin binu di taddart n umatsen, amenzu.

19 Uca xzar, yusa-dd ijj n uṣemmiḍ iwɛar x tiwa n řexřa, iřqef arebɛa n tɣemmura n taddart uca tewḍa taddart x iḥudriyyen d tḥudriyyin uca mmuten nitni. Mɣir necc waha inejmen, ḥima ad ac t ɛawdeɣ.”

20 Xenni ikkar Ayub, icarreg aseřham nnes, iḥeff azeǧif nnes, iwḍa x temmurt uca yuḍar, 21 inna: “D aɛaryan i dd-usiɣ zeg uɛeddis n yemma u d aɛaryan i din i ɣa dewřeɣ. SIDI iwca, SIDI ikkes, ad ittwabarek Isem n SIDI.” ^■   22 Di man aya marra war ixḍi Ayub ca u war inni min war iɛeddřen x AREBBI.