1 Imsar deg wussan n Aḥacwiruc - netta d Aḥacwiruc wenni tuɣa iḥekkmen zi temmurt n Řhend ař tammurt n Kuc x mya u-sebɛa u-ɛicrin n lɛamalat - 2 wah deg wussan nni, umi iqqim ujeǧid Aḥacwiruc x řɛarc n tgeldit nnes di řeqṣar n Cucan, 3 deg useggʷas wiss třata n řeḥkam nnes, aqa igga ict n zzardet i marra řḥukkam d imsexxaren nnes. Tuɣa ikumandaren n řɛeskar di temmurt n Lfurs d Maday uřa d tarwa n taṣiřet d řḥukkam n lɛamalat ttmunan zzat i wudem nnes, 4 umi isscen agřa n uɛuǧi n tgeldit nnes d ccan d řemřaḥet n řemɣaret nnes deg waṭṭas n wussan, aqa di mya u-tmanyin n wussan. 5 Umi ɛdun wussan nni, xenni tuɣa issewjad ujeǧid ict n zzardet i marra řgens nni tuɣa din di lqelɛa n Cucan, zeg umeqqran ař ameẓyan, sebɛa n wussan, deg wazzay n weḥwic n řeqṣar n ujeǧid. 6 Aqa din arwaqat d icemřařen d izizawen d idehmanen mmuden s ifiřan n řeqṭen azdad d ufiřu arjuwani ggin tent di texřazin n nnuqart u ɣar ipilaren n řmarmur. Řemṭarbat n wureɣ d nnuqart mmarsent x tisi n zzellij dayes aẓru aziza am smaraxt d weẓru d acemřař d weẓru am tyaqut d weẓru d abarcan. 7 Temmewc tsessi di řeqcuɛ n wureɣ u tuɣa řeqcuɛ msebḍan, ta war tarwis ta, u tuɣa din binu igellden s waṭṭas, anect i tuɣa izemmar ufus n ujeǧid ad t iwc. ^□   8 Tuɣa swin ɛlaḥsab řumur, war iǧi s uɣiř, minzi ammu i iweṣṣa ujeǧid i marra imeqqranen n taddart nnes, maḥend ad ggen řxaḍar i marra. 9 Tegga tjeǧidt Wacti uřa d ict n zzardet i temɣarin di taddart igellden. tenni tuɣa n ujeǧid Aḥacwiruc.

10 Deg wass wiss sebɛa, umi idweř wuř n ujeǧid ifarḥ s binu, inna i Mahuman, Bizta, Ḥarbuna, Biɣta d Abaɣta, Zitar d Karkas, aqa nitni d sebɛa n imsexxaren icenɛen i tuɣa isexxaren zzat i wudem n ujeǧid Aḥacwiruc,

11 ḥima ad awyen tajeǧidt Wacti zzat i wudem n ujeǧid s ttaj igellden maḥend ad isscen aẓri nnes i řegnus u i řḥukkam minzi nettat tuɣa dayes aẓri.

12 Maca tajeǧidt Wacti tugi ad dd-tas ɛlaḥsab awař n ujeǧid nni d as dd-yusa s ufus n imsexxaren icenɛen. Iffugem ujeǧid aṭṭas uca ikkar dayes wesɛar.

13 Xenni inna ujeǧid i imiɣisen inni ifehhmen ikuden, - minzi ammu i tuɣa tᵉttwagg tmesřact n ujeǧid zzat i yenni issnen azerf u řeḥkam - ,

14 i Karcana, Citar, Admata, Tarcic, Maras, Marsana d Mamukan, sebɛa n řḥukkam n Lfurs d Maday, inni tuɣa yudsen aṭṭas u zemmaren ad ẓaren udem n ujeǧid u ksin imucan imezwura di tgeldit:

15 “Min d aneɣ ittxeṣṣa ad negg ak-d tjeǧidt Wacti ɛlaḥsab řqanun, minzi nettat war teggi awař n ujeǧid Aḥacwiruc i dd-issekk s ufus n imsexxaren nnes icenɛen?”

16 Xenni inna Mamukan zzat i wudem n ujeǧid d řḥukkam: “Tajeǧidt Wacti war teggi ca řɛib deg ujeǧid d řḥukkam waha, maca uřa di marra řḥukkam d marra řegnus di marra lɛamalat n ujeǧid Aḥacwiruc.

17 Minzi min tegga tjeǧidt ad iffeɣ ɣar marra temɣarin uca ad yarr iryazen nsent ad ttwaseḥqaren jar tiṭṭawin nsent xmi qqarent: ‘Ajeǧid Aḥacwiruc inna ad ssekken ɣar tjeǧidt Wacti maḥend ad dd-tas zzat i wudem nnes, maca nettat war dd-tusi ca.’

18 Uřa d timɣarin n řḥukkam n Lfurs d Maday, tinni isřan i twarrit n tjeǧidt, ad inint ammu ass-a i marra řḥukkam n ujeǧid uca ammu i din ɣa yiři useḥqar d uduqqez n weɣḍab aṭṭas.

19 Mařa iɛjeb as řḥař i ujeǧid, ejj i-t xenni ad issuffeɣ ijj n řumur, ad t izemm di řqawanin n ayt n Lfurs d Maday maḥend war t ttɛeddan, u war ittejji ad dd-tas tajeǧidt Wacti ɛad zzat i wudem n ujeǧid Aḥacwiruc uca ejj ajeǧid ad iwc tagelda nnes i ḥed nneɣni zzates, ad tiři ḥsen zzayes. 20 Xmi i ɣa ittwaseř řumur n ujeǧid nni i ɣa yegg di marra tageldit nnes, tenni d tameqqrant, xenni ad dewřent marra timɣarin ad weqqarent iryazen nsent, zeg umeẓyan ař ameqqran.” 21 Tuɣa awař-a d lemliḥ di tiṭṭawin n ujeǧid d řḥukkam uca igga ujeǧid ɛlaḥsab awař n Mamukan. 22 Issekk tibratin ɣar marra lɛamalat n ujeǧid, i kuř lɛamala s tira nnes, u i kuř řgens s yiřes nnes, ḥima kuř aryaz ad yiři d bab n taddart nnes uca ad issiweř s yiřes n řgens nnes.