1 Deg wass nni ɣrin deg imezzuɣen n řgens zeg wedlis n Musa uca ittwaf aqa tura dayes belli ijj n Uɛammuni d ijj n Umu’abiy ɛemmarṣ war zemmaren ad adfen ɣar wegraw n řgens n AREBBI i řebda, ^■   2 maɣar nitni war ffiɣen ɣar ayt n Israil s weɣrum d waman, maca cran Bilɛam ḍidd nsen maḥend ad ten inɛeř uca xenni yarra AREBBI nneɣ nneɛřet d lbaraka.^■   3 Umi sřin Ccariɛa-ya, imsar, aqa farzen x Israil marra inni ixeǧḍen zi taṣiřet.

4 Qbeř igga Ilyacib, akehhan, wenni tuɣa x ixxamen n Taddart n AREBBI nneɣ, u aqa ittas as-dd i Ṭubiya, 5 ijj n wexxam d ameqqran i Tubiya, mani tuɣa xemmřen qbeř tawhibt n řɣiǧet, jjawi d řeqcuɛ, řeɛcur n imendi, n binu n jdid uřa n zzect nni ttwaggen i Ilawiyyen, i imedyazen u i iɛessasen n tewwura, uřa d tɣarṣt n usgeɛɛed n ikehhanen.

6 Di marra man aya war d ayi tuɣi ca di Urcalim, maɣar deg useggʷas wiss tnayen u-třatin n Artaḥcasta, ajeǧid n Babil, tuɣa ɛeqbeɣ-dd ɣar ujeǧid. Awarni ijj n řmijař n wussan ttareɣ zeg ujeǧid ttesriḥ maḥend ad dd-ɛeqbeɣ. 7 Umi iwḍeɣ ɣar Urcalim, iban-dd ayi řɣar nni igga Ilyacib di ṭṭweɛ n Ṭubiya umi i d as igga ijj n wexxam di řemraḥat n Taddart n AREBBI. 8 Tuɣa aya d ict n tmesřact d taɛeffant aṭṭas di tiṭṭawin inu uca nḍareɣ marra řeqcuɛ n Ṭubiya zeg wexxam ɣar barra. 9 Nniɣ aqa ittxeṣṣa asen ad ssizedgen ixxamen uca arriɣ daysen řeqcuɛ n Taddart n AREBBI, uřa d tawhibt n řɣiǧet d jjawi.

10 Ttwassargbeɣ ɛawed, aqa tiseqqar i dd-ittasen i Ilawiyyen war d asen mmewcen ařami Ilawiyyen d imedyazen nni iggin řxedmet, arewřen, kuř ijj ɣar yeyyar nnes.

11 Mmcubbceɣ ak-d imḍebbaren, nniɣ: “Mayemmi tᵉttwasmeḥ Taddart n AREBBI?” U necc ssmuneɣ ten uca arreɣ ten-i-dd deg wemcan nsen.

12 Xenni yiwi-dd marra Yahuda řeɛcur n imendi uřa n binu n jdid uřa n zzect deg ixxamen n txubay. ^□  

13 Ggiɣ imeqqranen x ixxamen n txubay: akehhan Calamya d umarir Ṣaduq d Fadaya zeg Ilawiyyen uca ggiɣ asen ɣar uɣezdis Ḥanan, mmis n Zakkur, mmis n Mattanya, maɣar tuɣa ttwaḥesben d imtiqqan. Nitni xasen maḥend ad bḍan aya i aytmatsen.

14 Idar ayi i man aya, a AREBBI inu, u war tmeḥḥid tamexsiwt inu icewwaren nni ssecneɣ i Taddart n AREBBI inu u i tsexxart i dayes iǧan.

15 Deg wussan nni ẓriɣ aqa din di Yahuda inni ittcuqan di tsirt deg wass n ssebt uřa d inni dd-iwyen icewwafen n imendi, arbun tent x yeɣyař, uřa d binu, aḍiř, tazart d ɛřam kuř řeḥmuř nni iwyen deg wass n ssebt di Urcalim u necc tuɣa ayi d acehhad ɛawed aqa nitni zzenzen macca deg wass n ssebt.

16 Tuɣa ayt n Ṣur zeddɣen dinni, iwyen-dd iseřman d marra sseřɛet, zznuzan aya di ssebt i ayt n Yahuda u di Urcalim.

17 Ɛeyyareɣ tarwa n taṣiřet n Yahuda, nniɣ asen: “Man tuɛeffna i tᵉtteggem i zi tessɛiǧem ass n ssebt! ^■  

18 Ma war ggin ibabaten nwem amenni uca xenni ma war dd-issiweḍ AREBBI nneɣ marra řɣar-a xaneɣ u x tendint-a? U kenniw tarennim ɛad di řḥaduq n weɣḍab nnes x Israil umi tessɛiǧem ssebt.”

19 Uca imsar xmi dd ɣa tewḍa taǧest di tewwura n Urcalim, qbeř ma ad dd-yaweḍ ssebt, aqa nniɣ ad ttwabellɛent tewwura uca arniɣ nniɣ ad tent arzmen awarni i ssebt waha. Uca ssbeddeɣ iḥudriyyen inu ɣar tewwura, maḥend war ssidifen uřa d ijj n řeḥmeř deg wass n ssebt. 20 Uca ammu issensen isebbaben d imzenzan n ɛřam kuř sseřɛet ict niɣ tnayen n twařawin barra zzat i řeḥyuḍ n Urcalim. 21 Uca cehdeɣ xasen, nniɣ asen: “Mayemmi tᵉttnusam kenniw x uɣezdis n řḥiḍ? Mařa kenniw teggim t twařa nneɣnit, ad xawem wteɣ afus.” Ssenni war dd-usin ɛad di ssebt.

22 Nniɣ ɛawed i Ilawiyyen ad ssizdegen ixef nsen, ad bedden d iɛessasen ɣar tewwura n tendint, maḥend ad qeddsen ass n ssebt.

Uřa i uya idar ayi, AREBBI inu,

u ḥinn xafi

ɛlaḥsab řemɣaret n tmexsiwt nnek icewwaren.

23 Deg wussan nni ẓriɣ ɛawed Udayen nni issezdɣen ɣarsen timɣarin n Acdud d Ɛammun d Mu’ab. 24 Azyen n iḥenjiren nsen ssawařen s iřes n Acdud, war zemmaren ad ssiwřen iřes n Tyahudect, maca kuř ijj tuɣa issawař ɛlaḥsab iřes n kuř řgens. ^□   25 Ɛeyyareɣ ten u neɛřeɣ ten u wtiɣ ca n yeryazen zzaysen, qeřɛeɣ acewwaf nsen u jjiɣ ten ad jjaǧen ɣar AREBBI: “Ɣarwem ad tewcem tiḥenjirin nwem i iḥenjiren nsen u ɣarwem ad tawyem tiḥenjirin nsen i iḥenjiren nwem niɣ i ixef nwem d tamɣart!” 26 Ma war ixḍi Suliman, ajeǧid n Israil, di tmesřact-a? D man aya tuɣa umi war din iǧi d ajeǧid am netta jar waṭṭas n řegnus uca tuɣa ittexs i-t AREBBI u AREBBI igga i-t d ajeǧid x marra Israil? Waxxa amenni ɣarrent t temɣarin tibarraniyyin maḥend ad ixḍa uřa d netta. ^■   27 Ma xenni ad ɣarwem nseř ɛad ktar umi tᵉtteggem marra řɣar-a ameqqran u tɣeddarem AREBBI uca tessezdaɣem timɣarin tibarraniyyin akidwem?

28 Ijjen zeg iḥenjiren n Yuyadaɛ, mmis n Ilyacib, arrays n ikehhanen tuɣa d aḍeggʷař n Sanballaṭ zi Ḥurun. S uya uẓẓřeɣ xas zi ɣari

29 Idar asen, a AREBBI inu, minzi nitni ssxemjen tukehhant, řxedmet n ikehhanen, d řɛahd n tukehhant u n Ilawiyyen.

30 U necc ssizedgeɣ ten zi marra min tuɣa d abarrani u areccḥeɣ aḥeṭṭu n ikehhanen d Ilawiyyen, iṭṭef kuř ijj řxedmet nnes, 31 uřa i tewhibt n ukeccuḍ, di řweqt nnes ittwaggen, u i tmenzut n ṣṣabet.

Idar ayi, a AREBBI inu, i řxar.