1 Deg useggʷas amezwaru n ujeǧid Kurac n Lfurs, ḥima ad ittwakemmeř wawař n SIDI zeg uqemmum n Irmiya, issekkar SIDI buḥbeř n Kurac ajeǧid n Lfurs maḥend ad ittwabarreḥ di marra tageldit nnes s uqemmum d tira:

2 “Ammu i iqqar Kurac, ajeǧid n Lfurs: ‘SIDI, AREBBI n ijenwan, iwca ayi marra tigeldiwin n temmurt uca netta igga xafi, ad as bniɣ ict n Taddart di Urcalim, tenni iǧan di Yahuda. 3 Man wen zzaywem zi řgens nnes, ad yiři AREBBI akides, ejj i-t ad igeɛɛed ɣar Urcalim, tenni iǧan di Yahuda, ad ibna Taddart n SIDI, AREBBI n Israil. Aqa-t d AREBBI wenni izeddɣen di Urcalim. 4 Qaɛ wenni iqqimen izeddɣen di ca n marra imucan mani izdeɣ d abarrani, ad kkaren iryazen n wemcan nnes ad as wcen afus s nnuqart d wureɣ, s wagřa d řmař, u man aya sennej i tewhibt immewcen s řxaḍar i Taddart n AREBBI, tenni iǧan di Urcalim.’ ”

5 Xenni kkaren izeǧifen jar ibabaten n řaǧat n Yahuda d Binyamin uřa d ikehhanen d Ilawiyyen u marra inni umi issfaq AREBBI buḥbeř maḥend ad geɛɛden ḥima ad bnan Taddart n SIDI wenni izeddɣen di Urcalim. 6 Marra inni d asen dd-innḍen wcin asen afus s řeqcuɛ n nnuqart, s wureɣ, s wagřa, s řmař u s řeqcuɛ iɣřan, břa min immewcen s řxaḍar. 7 Ajeǧid Kurac issuffeɣ řeqcuɛ n Taddart n SIDI, tinni tuɣa iksi Nabuxadnaṣṣar zi Urcalim, igga i-ten di taddart n arebbi nnes. ^■   8 Kurac, ajeǧid n Lfurs, issuffeɣ i-tent ɣar barra s ufus n Mitradat, bab n txubay, uca iwca i tent s řeḥsab i Cicbaṣṣar, ameqqran n Yahuda. ^■  

9 Wa tuɣa d řqedd nsen: třatin n ṭṭbaṣa n wureɣ, ařef n ṭṭbaṣa n nnuqart, tesɛa u-ɛicrin n řemwas,

10 třatin n ifenjařen n wureɣ, arebɛa-mya u-ɛecra n ifenjařen inneɣni n nnuqart d wařef n řeqcuɛ nneɣnit.

11 Marra řeqcuɛ n wureɣ d nnuqart tuɣa iwḍen xemsa-ařaf u-arebɛa-mya. Marra aya yiwyi t Cicbaṣṣar akides, jmiɛ ak-d imenfiyyen inni ittwanedhen zi Babil ɣar Urcalim.