1 Ksin řgens n temmurt Yahuyaḥaz, mmis n Yuciya, uca ggin t d ajeǧid di Urcalim deg wemcan n babas. 2 Yahuyaḥaz tuɣa ɣares třata u-ɛicrin n iseggʷusa, umi idweř d ajeǧid. Netta iḥkem třata n iyuren di Urcalim. 3 Ajeǧid n Miṣra ikkes i-t d ajeǧid zi Urcalim uca igga i temmurt ijj n multa n mya n talintat n nnuqart d ict n talint n wureɣ. 4 Ajeǧid n Miṣra igga umas Alyaqim d ajeǧid x Yahuda d Urcalim. Netta ibeddeř isem nnes ɣar Yahuyaqim. Maca umas Yahuyaḥaz iṭṭef i-t Naxu uca yiwyi i-t ɣar Miṣra.

5 Yahuyaqim tuɣa ɣares xemsa u-ɛicrin n iseggʷusa umi idweř d ajeǧid. Netta iḥkem ḥiṭac n iseggʷusa di Urcalim. Netta igga min iǧan d aɛeffan di tiṭṭawin n SIDI, AREBBI nnes. 6 Nabuxadnaṣṣar, ajeǧid n Babil, iffeɣ i umenɣi akides uca icarf i-t s tnayen n ssnaseř n nnuqart ḥima ad t yawi ɣar Babil. 7 Yiwi Nabuxadnaṣṣar uřa d ijj n wezyen n řeqcuɛ zi Taddart n SIDI ɣar Babil uca issars i-ten di zzawect nnes di Babil. 8 Imezruyen iqqimen n Yahuyaqim d jjɛayef i igga u min ɣares ittwafen, xzar, marra aya ittwazemmem deg wedlis n ijeǧiden n Israil d Yahuda. Mmis Yahuyakin idweř d ajeǧid deg wemcan nnes.

9 Yahuyakin tuɣa ɣares tmenṭac n iseggʷusa umi idweř d ajeǧid. Netta iḥkem třata n iyuren d ɛecra n wussan di Urcalim. Netta igga min iǧan d aɛeffan di tiṭṭawin n SIDI.

10 Ɣar ubeddeř n useggʷas ijja ujeǧid Nabuxadnaṣṣar ad t yawi ɣar Babil s řeqcuɛ iɣřan zi Taddart n SIDI. Netta igga umas Ṣidqiya d ajeǧid n Yahuda d Urcalim.

11 Ṣidqiya tuɣa ɣares waḥit u-ɛicrin n iseggʷusa umi idweř d ajeǧid. Netta iḥkem ḥiṭac n iseggʷusa di Urcalim.

12 Igga min iǧan d aɛeffan di tiṭṭawin n SIDI, AREBBI nnes, war isswaḍeɛ ixef nnes zzat i wudem n unabi Irmiya wenni issiwřen x řumur n SIDI.

13 Uřa d netta iɣewweɣ x ujeǧid Nabuxadnaṣṣar, wenni t ijjin ad ijjaǧ ɣar AREBBI. Netta issemḥeḍ iri nnes uca isseqseḥ uř nnes maḥend war dd-iddikkʷiř ɣar SIDI, AREBBI n Israil.

14 U marra imeqqranen n ikehhanen uřa d řgens ruḥen aggʷejen aṭṭas di řeɣdar nsen, ggin am mammec marra jjɛayef n řegnus. Nitni ssxemjen Taddart n SIDI tenni tuɣa issqeddes di Urcalim.

15 SIDI, AREBBI n ibabaten nsen issekk-dd ɣarsen inehharen s ufus n ireqqasen nnes, řexxu niɣ řexmin, maɣar Netta tuɣa izziǧiz as řgens nnes d Tzeddiɣt nnes.

16 Maca nitni stehzan zeg ireqqasen n AREBBI u sseḥqaren awařen nnes. Nitni ggin taḍṣa x inabiyyen nnes, ařami isɛar SIDI x řgens nnes u war iqqim ɛad usgenfu.

17 Netta igga ajeǧid n Ikaldaniyyen ad ɣarsen dd-iffeɣ, wenni inɣin iḥudriyyen nsen s ssif di Taddart n Zzawect nsen Iqeddsen. Netta war issɛizz x iḥudriyyen niɣ x teɛzariyyin uřa x iwessura d imeccaybuten. AREBBI iwca i-ten marra deg ufus nnes.

18 Marra řeqcuɛ n Taddart n AREBBI, řeqcuɛ imeqqranen d imeẓyanen, uřa d txubay n Taddart n SIDI d txubay n ujeǧid d řḥukkam nnes, aqa marra aya yiwyi i-t ɣar Babil.

19 Nitni sscemḍen Taddart n AREBBI, hedmen řḥiḍ n Urcalim uca qqden marra řeqṣur nnes s tmessi u areddǧen marra řeqcuɛ iɣřan aṭṭas zzayes. 20 Wi iqqimen zi ssif indeh i-ten ɣar lmenfa ɣar Babil uca dewřen nitni d imsexxaren i netta u i iḥenjiren nnes ař řeḥkamet n tgeldit n Lfurs, 21 - ḥima ad ittwaseqfeř wawař n SIDI i issiweř s uqemmum n Irmiya - , ařami teksi tammurt iseggʷusa nnes n ssebt. Marra ussan n wareddeǧ tuɣa tammurt tareyyeḥ, ɣares ařami tkemmeř sebɛin n iseggʷusa. ^■  

22 Maca deg useggʷas amezwaru n ujeǧid Kurac, ajeǧid n Lfurs, - ḥima ad ittwakemmeř wawař n SIDI s uqemmum n Irmiya - , issekkar-dd SIDI buḥbeř n Kurac, ajeǧid n Lfurs, uca ijja wanita ad dd-iffeɣ ijj n ubarreḥ di marra tageldit nnes, uřa di tira, maḥend ad yini: 23 “Ammu i iqqar Kurac, ajeǧid n Lfurs: ‘SIDI, AREBBI n ijenwan, iwca ayi marra tigeldiwin n temmurt uca Netta igga xafi ad bniɣ ict n Taddart i Netta di Urcalim di Yahuda. Qaɛ man wen zzaywem zi marra řgens nnes, ad yiři SIDI, AREBBI nnes, akides u ijja i-t ad igeɛɛed!’ ”