1 Suliman, mmis n Dawud, ittwaḍmen di tgelda nnes, minzi SIDI, AREBBI nnes, tuɣa-t akides uca yarni di řemɣaret nnes ař ṭṭarf. 2 Suliman issiweř ak-d marra Israil, ak-d imeqqranen x wařef u x mya u ak-d řquḍat u ak-d marra imeqqranen di marra Israil, izeǧifen jar ibabaten n řaǧat. 3 Nitni ṭṭfen abrid, Suliman d marra agraw n řgens akides, ɣar řgeɛɛdet nni iǧan ɣar Jibɛun, minzi dinni i tuɣa Aqiḍun n Umsagar n AREBBI i igga Musa, amsexxar n SIDI, di řexřa. 4 Maca Dawud yiwi Ttabut n AREBBI zi Qiryat-Yaɛarim ɣar wemcan i dd as issewjed Dawud, minzi netta iwta ijj n Uqiḍun i Ttabut di Urcalim. 5 Aɛalṭar n nnḥas nni igga Baṣaliyil, mmis n Uri, mmis n Ḥur, tuɣa din di Jibɛun zzat i Uqiḍun n Umsagar n SIDI. Suliman yarzef din jmiɛ ak-d marra agraw n řgens 6 uca issgeɛɛed din Suliman, zzat i wudem n SIDI, ict n tɣarṣt x uɛalṭar n nnḥas nni iǧan ɣar Uqiḍun n Umsagar. Netta iqeddem xas ařef n tɣarṣa n wecmaḍ.

7 Di ǧiřet nni, iban-dd AREBBI i Suliman, inna as: “Ttar, min texsed ad ac t wceɣ!” 8 Suliman inna i AREBBI: “Cek tessecned i baba Dawud tamexsiwt nnek icewwaren u teggid ayi d ajeǧid deg wemcan nnes. 9 Xenni řexxu, a SIDI AREBBI, ejj ad iffeɣ wawař i tessiwřed ak-d baba Dawud s tidett, minzi teggid ayi d ajeǧid x ijj n řgens iwseɛ am tɛejjajt n temmurt.

10 Ewc ayi řexxu tiɣit d tussna, ḥima ad ffɣeɣ u ad dd-adfeɣ zzat i wudem n řgens-a, minzi wi izemmaren ad iḥkem x řgens-a ameqqran s řḥeqq?”

11 Xenni inna AREBBI i Suliman: “Minzi aya ɣarek deg wuř u minzi cek war tᵉttared agřa, řeksibet niɣ ccan niɣ tudart n yinni i cek icarrhen u war tᵉttared tudart tazirart, maca minzi tᵉttared tiɣit d tussna ḥima ad tgewwded řgens inu s řḥeqq, i wenni umi i x cek ggiɣ d ajeǧid,

12 aqa temmewc ac řexxu tiɣit d tussna, u ad ac wceɣ agřa d řeksibet d ccan am mammec war ten iṭṭif uřa d ijj n ujeǧid qibař nnec u war ttiřin ɛad ammu awarni ac.

13 Zi řgeɛɛdet i x wehhben tiɣarṣa, tenni iǧan di Jibɛun arendad n Uqiḍun n Umsagar, yiweḍ-dd Suliman ɣar Urcalim uca iḥkem x Israil.

14 Suliman issmun ikarruten d imnayen. Netta tuɣa ɣares ařef u-arebɛa-mya n ikarruten d tenɛac-ařef n imnayen uca yiwyi ten ɣar tneddam n ikarruten u ɣar ujeǧid di Urcalim.

15 Ajeǧid igga nnuqart di Urcalim anect n yeẓra nni tuɣa din iǧan uca igga ticejjura n tengelt anect izemmuren nni tuɣa din iǧan di Temmurt Iwaṭan s waṭṭas.

16 Iwyen-dd iysan i Suliman zi Miṣra, zi Qiwi. Isebbaben n ujeǧid iwyen ten s yijj n ttaman imetnen zi Qiwi.

17 Iwyen-dd ijj n ukarru uca ssuffɣen t-i-dd zi Miṣra s ijj n ttaman n setta-mya n iciqlen n nnuqart u ijj n uyis s mya u-xemsin n iciqlen. Ammu i ssuffɣen ten s ufus nsen i marra ijeǧiden n Iḥittiyyen u i ijeǧiden n Aram.

18 Suliman yumur ḥima ad tᵉttwabna ict n Taddart i Yisem n SIDI d ict n taddart i tgeldit nnes.