1 Uca inna ujeǧid Dawud i marra agraw n řgens: “Mmi Suliman d ayenni wenni ifarz i-t AREBBI. Netta ɛad d ameẓyan d arexfen uca řxedmet d tameqqrant, maɣar war iǧi řeqṣar i yijj n bnadem maca i SIDI AREBBI. 2 S marra tizemmar inu sswejdeɣ i Taddart n AREBBI inu ureɣ i řeqcuɛ n wureɣ, nnuqart i řeqcuɛ n nnuqart, nnḥas i řeqcuɛ n nnḥas, uzzař i řeqcuɛ n wuzzař, akeccuḍ i řeqcuɛ n ukeccuḍ, d iẓra n ‘biril’ d iẓřa i ɣa ttwaggen di tcuyar, d iẓra ibarcanen yareqqen uřa d iẓra ittwasqareqcen, uřa ɛad ɛřam kuř iẓra iɣřan, uca xenni aṭṭas n iẓra n řmarmur d acemřař. 3 Zi tayri inu i Taddart n AREBBI inu, ad arzfeɣ zeg wagřa inu ɛad ureɣ d nnuqart, tiwa i min sswejdeɣ i Taddart n Zzawect Iqeddsen, 4 ɛad teřt-ařaf n talintat n wureɣ zeg wureɣ n Ufir d sebɛa-ařaf talintat n nnuqart iṣfan maḥend ad zzaysen ḥenncen řeḥyuḍ n ixxamen. 5 Ureɣ i řeqcuɛ n wureɣ d nnuqart i řeqcuɛ n nnuqart, i marra řxedmet i ɣa tᵉttwagg s ufus n iḥrayfiyyen. Man wen xenni ixsen ass-a ad iccur afus nnes s tewhibin i SIDI?”

6 Xas uca iwyen imeqqranen n tudrin n ibabaten d imeqqranen n tqebbař n Israil d řqebṭanat x wařef d řqebṭanat x mya tiwhibin nsen s řxaḍar, jmiɛ ak-d imeqqranen x řxedmet n ujeǧid. 7 Nitni arzfen i tsexxart n Taddart n AREBBI xemsa-ařaf n talint n wureɣ d ɛecra-ařaf n draxmat d ɛecra-ařaf n talintat n nnuqart d tmenṭac-ařef n talintat n nnḥas d myat-ařef n talintat n wuzzař. 8 Wenni ɣar ufin iẓra iɣřan, iwca i-ten i wexxam n txubay n Taddart n SIDI wenni tuɣa sadu ufus n Yaḥiyil, Ajarcuni. 9 Ifarḥ řgens s tewhibin nsen i immewcen s řxaḍar, maɣar nitni wcin zeg wuř imun qaɛ s řxaḍar i SIDI uca ifarḥ ujeǧid Dawud řefraḥet d tameqqrant aṭṭas.

10 Dawud ibarek SIDI zzat i tiṭṭawin n marra agraw n řgens, inna:

“Ad tᵉttwabarked Cek, a SIDI, AREBBI n babatneɣ Israil,

zi řebda ař řebda!

11 I Cek, a SIDI, řemɣaret d ṣṣulṭa d řɛezz d ccan d lɛaḍama,

minzi marra min iǧan deg ujenna u x temmurt aqa-t nnek.

Zzayek, a SIDI, i teǧa tageldit

Cek d Wenni issgeɛɛden Ixef nnek d Azeǧif tiwa marra.

12 Agřa d ccan zzat i wudem nnek

u Cek tṣeǧḍed x marra min iǧan.

Aqa-t jjehd d ṣṣulṭa deg ufus nnek,

aqa-t deg ufus nnek ḥima ad tewced řemɣaret d jjehd i marra.

13 Xenni řexxu, AREBBI nneɣ, neccin nettqada cek

u nettṣebbeḥ deg Yisem n řɛezz nnek.

14 Maɣar min ɛniɣ necc d min iɛna řgens inu,

aqa neccin ɣarneɣ tizemmar ad newc ammu s řxaḍar?

Zzayek dd-ittas marra,

u min i d ac newca, newca i-t zeg ufus nnek.

15 Maɣar neccin mɣir d ibarraniyyen d imeɛzab zzat i wudem nnek,

am řejdud nneɣ.

Ussan nneɣ x temmurt amecnaw tiři,

u řayas war din iǧi.

16 A SIDI, AREBBI nneɣ, zeg ufus nnek yusa-dd marra afeyyeḍ-a i nessewjed,

ḥima ad nebna ict n Taddart i Cek,

i Yisem nnek d amqeddes.

Marra aya d nnek.

17 Necc ssneɣ, a AREBBI inu, aqa Cek tqeǧbed uř

u aqa itteɛjib ac useggem.

Necc, di řeṣfayet n wuř inu, wciɣ marra aya s řxaḍar,

u řexxu aqa uřa d řgens nnek i da iǧan,

- iwa ẓriɣ t s řefraḥet - ,

iwca ac tiwhibin s řxaḍar.

18 A SIDI, AREBBI n řejdud nneɣ, n Ibrahim d Isḥaq d Israil,

ḥḍa xenni i řebda

aqa aya ad yejj ṭṭabeɛ x ixariṣṣen deg wuř n řgens nnek

u ndeh uř nsen ɣarek!

19 Ewc uřa i mmi Suliman ijj n wuř imun qaɛ,

maḥend ad iḥḍa řumurat nnek d cchadet nnek d tiweṣṣa nnek,

u maḥend ad yegg marra u maḥend ad ibna řeqṣar-a n Zzawect Tameqqrant

i x sswejdeɣ necc.”

20 Xenni inna Dawud i marra agraw n řgens: “Sɛuǧem SIDI, AREBBI nwem!” Xenni issɛuǧa marra agraw n řgens SIDI, AREBBI n řejdud nsen. Nitni uḍaren azeǧif uca qqunjřen i SIDI u i ujeǧid. 21 Tiwecca nnes iwyen nitni tiɣarṣa i SIDI. Nitni iwyen ařef n iyenduzen d ařef n icarriyyen d ařef n izmaren ak-d marra tiwhibin n useyyeb d tɣarṣa n wecmaḍ i SIDI u xenni aṭṭas n tɣarṣa i marra Israil. 22 Deg wass nni ccin u swin nitni s řefraḥet tameqqrant zzat i wudem n SIDI u ggin Suliman, mmis n Dawud, d ajeǧid i twařa wiss tnayen u dehnen t d amgewwed zzat i SIDI, u Ṣaduq dehnen t d akehhan. 23 Suliman iqqim x řɛarc n SIDI am ujeǧid deg wemcan n babas Dawud. Netta ifřeḥ u marra Israil isřa as. 24 Marra řḥukkam d ayt n bu-teɣruḍt uřa d marra iḥenjiren n ujeǧid Dawud, wtin deg afus ad qqimen sadu afus n ujeǧid Suliman. 25 Yarra SIDI Suliman ad idweř d ameqqran ař ṭṭarf zzat i tiṭṭawin n Israil. Netta iwca as aweqqar igellden i tuɣa war iǧi uřa ɣar ijj n ujeǧid x Israil qbeř nnes.

26 Ammu i iḥkem Dawud, mmis n Yassa, x marra Israil. 27 Ussan nni tuɣa iḥkem x Israil, aqa aten arebɛin n iseggʷusa. Netta iḥkem di Ḥabrun sebɛa n iseggʷusa u di Urcalim třata u-třatin n iseggʷusa. 28 Netta immut umi icab mliḥ, ijjiwen ussan, agřa d uɛuǧi. Mmis Suliman idweř d ajeǧid deg wemcan nnes. 29 imezruyen n ujeǧid Dawud, imezwura d ineggura, aqa ttwazemmemen deg wedlis n imezruyen n umwařaw Camwil u deg wedlis n imezruyen n unabi Natan u deg wedlis n imezruyen n umwařaw Jad, 30 s marra min yuran x tgeldit nnes u x ṣṣulṭa nnes u x ikuden i xas dd-ikkin uřa x Israil u x marra tigeldiwin n temmura.