1 Dawud issmun di Urcalim marra imeqqranen n Israil: imeqqranen n tqebbař d imeqqranen n terbiɛin d imsexxaren n ujeǧid d imeqqranen x wařef d imeqqranen x mya d imeqqranen i iǧan x marra agřa d řkesbet n řmař n ujeǧid d iḥenjiren nnes, jmiɛ ak-d imsexxaren icenɛen d ayt n bu-teɣruḍt, wah, kuř bu-teɣruḍt imeḥḍen.

2 Ikkar ujeǧid Dawud, inna: “Sřem-dd ɣari, aytma d řgens inu! Necc simant inu tuɣa-t ɣari deg wuř inu ḥima ad bniɣ ict n taddart n řhudnet i Ttabut n Řɛahd n SIDI u i tnebdat n iḍaren n AREBBI nneɣ. X uyenni sswejdeɣ i řebni. 3 Maca AREBBI inna ayi: ‘Cek war tbennid i Yisem inu Taddart, maɣar cek d ijj n weryaz n imenɣan u tessizřed aṭṭas n idammen.’ 4 SIDI, AREBBI n Israil, ifarz ayi zi marra taddart n baba ḥima ad dewřeɣ d ajeǧid x Israil i řebda, minzi Netta ifarz Yahuda ḥima ad yiři d amgewwed uca xenni taddart n baba zi taddart n Yahuda uca jar iḥenjiren n baba yarḍa dayi ařami igga ayi d ajeǧid x marra Israil. 5 Zi jar marra iḥenjiren inu, maɣar SIDI iwca ayi aṭṭas n iḥenjiren, ifarz Netta mmi Suliman ḥima ad iqqim x řɛarc n tgelda n SIDI x Israil. 6 Netta inna ayi: ‘Mmic Suliman ad ibna Taddart inu d řemraḥat inu, maɣar netta i farzeɣ d mmi u Necc ad as iřiɣ d babas. 7 Necc ad ssmetneɣ tageldit nnes i řebda mařa netta ad iḍfar tiweṣṣa d lfarayiḍ inu s jjehd, am mammec teǧa ass-a.’ 8 Xenni řexxu, ad awem ɛeřmeɣ zzat i tiṭṭawin n marra Israil, agraw n řgens n SIDI, u deg imezzuɣen n AREBBI nneɣ, ḥima ad teḥḍam u ad tarzum marra tiweṣṣa n SIDI, AREBBI nwem, maḥend ad tᵉṭṭfem tammurt taṣebḥant tanita d řwart uca ad tt tejjem d řwart i řebda i warrawen nwem awarni awem. 9 U cek, mmi Suliman, ssen AREBBI n babac u sexxar as s wuř imun d s řeɛmar ixsen, minzi SIDI ittbeqqec marra uřawen uca ifehhem marra min dd-ittasen ɣar ixarriṣen n uzeǧif nneɣ. Mařa cek tarzud xas, Netta ad zzayek ittwaf, maca mařa tsemḥed dayes, ad cek inḍar i řebda.

10 Xzar řexxu, minzi SIDI ifarz i cek ḥima ad as tebnid ict n Taddart d Zzawect Iqeddsen. Iři d aryaz uca egg i-t!”

11 Dawud iwca i mmis Suliman amedya n wesqif n wadaf, n řebniyat d ixxamen n txubay d tɣurfatin d ixxamen n daxeř d wexxam n tqebbart n weṣřaḥ.

12 uřa d ijj n umedya n marra min ɣares-dd yusa s Arruḥ x řemraḥat n Taddart n SIDI u x marra ixxamen i d as dd-innḍen u x marra ixxamen n txubay n Taddart n AREBBI u x ixxamen n txubay n tewhibin ittwaqeddsen

13 uca x terbiɛin n ikehhanen d Ilawiyyen u x marra řxedmet i tsexxart di Taddart n SIDI u i marra řeqcuɛ i tsexxart di Taddart n SIDI.

14 X wureɣ, aqa iwca řewzen nsen n wureɣ i marra řeqcuɛ n tsexxart, uřa i řeqcuɛ n nnuqart iwca řewzen nsen, i marra řeqcuɛ i marra tasexxart.

15 Xenni řewzen i řeqnadeř n wureɣ d řefnarat nsen n wureɣ, s řewzen n kuř řqendiř d řefnarat nnes weḥḥdes, uřa i řeqnadeř n nnuqart řewzen n ijj n řqenḍiř d řefnarat nnes, am mammec dd-yusa ak-d tsexxart n kuř řqenḍiř.

16 Ɛawed řewzen n wureɣ i ṭṭabřat i x bezzɛen aɣrum, i kuř ṭṭabřa weḥḥdes, uřa d řewzen n nnuqart i ṭṭabřat n nnuqart

17 uřa d ureɣ iṣfan i furcayat u i ṭṭawyat i urucci u i ifenjařen n wureɣ, aqa řewzen n kuř afenjař weḥḥdes, uřa i ifenjařen n nnuqart řewzen i kuř afenjař weḥḥdes

18 u i uɛalṭar n řebxur s řewzen nnes s wureɣ iṣfan, uřa ammu ɛawed i umedya n ikarruten, i ikiruben n wureɣ inni ibezzɛen wafriwen nsen uca dřin Ttabut n Řɛahd n SIDI. ^□  

19 Man aya marra, inna Dawud, ittwasefhem ayi s tira zeg ufus n SIDI, marra řexdayem i dd ittasen ak-d umedya n řebni.

20 Xenni inna Dawud i mmis Suliman: “Iři d aryaz u iři tmeḥḍed, u egg i-t! War tteggʷed ca u war arexxu, maɣar SIDI AREBBI, AREBBI inu, ad yiři akidek. Netta war dayek isemmeḥ niɣ cek ittejji ɣares ař akemmeř n marra řxedmet i tsexxart di Taddart n SIDI. 21 Xzar, aqa din tarbiɛin n ikehhanen d Ilawiyyen i marra tasexxart di Taddart n AREBBI u i marra řxedmet aqa din ɣarek marra inni i ɣar teǧa di řxadar nsen ḥima ad tt ggen s tiɣit i kuř řxedmet, uřa d řḥukkam d marra řgens bedden akidek ḥima ad ggen marra awařen nnek.”